اۋىل شارۋاشىلىعى مينيسترلىگىندە سۋ تاسقىنىنان قىرىلعان مال سانى تۋرالى مالىمەت جوق
استانا. KAZINFORM – ق ر اۋىل شارۋاشىلىعى مينيسترلىگى سۋ تاسقىنىنان زارداپ شەككەن مال سانىن شامالاپ بولسىن ايتا الماي وتىر.
مينيسترلىك جەرگىلىكتى اتقارۋشى ورگاندار بۇلىنگەن مۇلىككە قاتىستى وتىنىشتەردى قابىلداپ، كەيىن ءتيىستى ەسەپ جۇرگىزەتىنىن اتاپ ءوتتى.
مال شىعىنىن ورنىن تولتىرۋ ماسەلەسىنە كەلسەك، اۋىل شارۋاشىلىعى مينيسترلىگى كەلتىرىلگەن شىعىندى وتەۋ ماسەلەسىن اكىمدىكتەرگە نەمەسە سۋ تاسقىنىنا قارسى ءىس-قيمىل جونىندەگى رەسپۋبليكالىق شتابقا جولداۋ كەرەك ەكەنىن ايتتى.
ايتا كەتەيىك، بۇعان دەيىن قاراعاندى وبلىسىنىڭ شەت اۋدانىندا بىرنەشە اۋىلدا سۋ تاسقىنىنان 10 باس ءىرى قارا، 72 باس ۇساق مال جانە توعىز جىلقى ولگەنى حابارلانعان بولاتىن.
ال اقتوبە وبلىسىندا ءىرى قارانىڭ ءولۋ كورسەتكىشى ءۇش مىڭعا جەتتى. جەرگىلىكتى اكىمدىكتەر ءالى كۇنگە دەيىن ەسەپ جۇرگىزۋدە، دەسە دە شالعاي ورنالاسقان شارۋا قوجالىقتارىنا قاتىناۋ مۇمكىن بولماي تۇر.
اۋىل شارۋاشىلىعى مينيسترلىگى سۋ باسقان وڭىرلەردە مالدىڭ قىرىلۋىنىڭ الدىن الۋ ماقساتىندا ولاردى قاۋىپسىز جايىلىمدىق ايماقتارعا ورنالاستىرۋ جۇمىستارى ۇيىمداستىرىلعانىن حابارلادى. وسىلايشا، جەدەل دەرەكتەر بويىنشا 30 مىڭعا جۋىق ءتورت تۇلىك قاۋىپسىز جەرگە جەتكىزىلگەن.
ۆەدومستۆونىڭ حابارلاۋىنشا، سۋ تاسقىنى سالدارىنان توتەنشە جاعداي كەزىندە مال قىرىلعان جاعدايدا جەرگىلىكتى بيۋجەتتەردەن، سونداي-اق باسقا دا كوزدەردەن وتەماقى تولەنەدى.
