ايدا بالايەۆا كيىز ۇيدە جارتىلاي جالاڭاش بيلەگەندەردىڭ ۆيدەوسىنا قاتىستى پىكىر ءبىلدىردى
استانا. KAZINFORM – ل گ ب ت وكىلدەرىنىڭ كيىز ۇيدە جارتىلاي جالاڭاش بيلەگەن ۆيدەوسى الەۋمەتتىك جەلىدە تاراپ كەتتى. قاسيەتتى قارا شاڭىراقتى بەيادەپ قىلىعىمەن ماسقارالاعانداردىڭ ارەكەتى جەلى قولدانۋشىلارىنىڭ اشۋىن كەلتىردى.
بۇگىن مادەنيەت جانە اقپارات ءمينيسترى ايدا بالايەۆا وسى بەينە جازباعا قاتىستى Facebook پاراقشاسىندا پىكىر ءبىلدىردى.
«قۇرمەتتى دوستار! وزدەرىڭىزگە ءمالىم، اتا زاڭىمىزدا بارلىق ازاماتتىڭ قۇقىعى تەڭ، ولاردىڭ ار- نامىسى مەن قادىر- قاسيەتىن قۇرمەتتەۋگە كەپىلدىك بەرىلگەن. ب ا ق پەن الەۋمەتتىك جەلىلەردىڭ ماڭىزى ارتا تۇسكەن قازىرگى كەزدە قانداي كونتەنت جاسالىپ، ءبولىسىلىپ جاتقانىنا ەرەكشە مۇقيات بولۋىمىز كەرەك. ادامداردىڭ كوڭىلىنە قاياۋ سالىپ، مادەني جانە ۇلتتىق بولمىسىمىزعا سىزات تۇسىرەتىن جازبالار مەن بەينەروليكتەرگە جول بەرىلمەيدى»، - دەپ جازدى مينيستر.
ايدا بالايەۆا ق ر مادەنيەت جانە اقپارات ءمينيسترى رەتىندە كيىز ۇيدە بي بيلەپ، بەيادەپ ارەكەتىمەن قوعام نازارىن اۋدارتقان بەينەروليك تۋرالى ايتقىسى كەلەتىنىن جازدى.
«مۇنداي كونتەنت قوعامدا الاۋىزدىق تۋدىرۋى مۇمكىن. ارانداتۋشىلىققا دا ۇرىندىرۋى ىقتيمال. ارينە، وسكەلەڭ ۇرپاق تاربيەسىنە كەرى اسەرىن تيگىزەدى. ۆيدەونىڭ مازمۇنى قازاق حالقىنىڭ قۇندىلىقتارى مەن سالت-داستۇرلەرىنە قايشى كەلەدى. تاعى ءبىر ماسەلە وتە ماڭىزدى. مەملەكەتتىك الەۋمەتتىك تاپسىرىستار ءداستۇرلى قۇندىلىقتارىمىزدى ساقتاۋ مەن ناسيحاتتاۋدا ەرەكشە جاۋاپكەرشىلىكتى تالاپ ەتەدى. ۇلتتىق قۇندىلىقتاردان باس تارتۋ مادەنيەتىمىزگە، سالت- داستۇرىمىزگە جانە ادەت- عۇرىپتارىمىزعا قاشان دا قاۋىپ توندىرەدى. ال بىرلىگىمىز بەن تۇراقتىلىعىمىزدىڭ مىزعىماس نەگىزىن ساقتاۋ - ورتاق پارىزىمىز»، - دەپ جازدى ايدا بالايەۆا.
ول سونداي- اق، مەديا-پروتسەسستە جۇرگەن بارشا ادامداردى كونتەنت جاساۋدا مۇقيات بولۋعا شاقىردى.
«كەز كەلگەن شىعارماشىلىق جۇمىستا ۇلتتىق سالت-ءداستۇر مەن قۇندىلىقتاردى قۇرمەتتەۋگە باسىمدىق تانىتۋ كەرەك. جۇدىرىقتاي جۇمىلىپ، بىرلەسە جۇمىس ىستەپ قانا حالقىمىزدىڭ باسىن بىرىكتىرىپ، بولشەكتەۋگە بولمايتىن باي مادەني مۇرامىزدى ساقتاپ قالا الامىز»، - دەدى ول.
