اۆياوتىن تاپشىلىعى: تاياۋ شىعىس شيەلەنىسى ساياحات قۇنىنا قالاي اسەر ەتتى
استانا. KAZINFORM - تاياۋ شىعىستاعى شيەلەنىس پەن ورمۋز بۇعازىنداعى ىركىلىستەر الەم بويىنشا جانارماي باعاسىنىڭ قىمباتتاۋىنا اسەر ەتتى. بۇل جاعداي قازاقستانداعى سىرتقا شىعۋ ءتۋريزمى نارىعىنا دا ىقپالىن تيگىزدى.
«تۋريستيك قامقور» قورى وتىن داعدارىسى قازاقستاندىقتاردىڭ ساياحاتىنىڭ قۇنىنا قالاي اسەر ەتەتىنىن ايتىپ بەردى.
ۇيىم ءتوراعاسى يننا رەيدىڭ ايتۋىنشا، قازاقستانداعى سالىستىرمالى تۇردە تۇراقتى جاعدايعا جانە وتىن لوگيستيكاسىنىڭ جالعاسىپ جاتقانىنا قاراماستان، جاھاندىق پروتسەستەر ءسوزسىز اسەر ەتەدى. اۋە كومپانيالارى حالىقارالىق اۋەجايلاردا كەرى رەيستەرگە جانارماي قۇيادى، ال وندا وتىن باعاسى ايتارلىقتاي وزگەرۋى مۇمكىن.
- ادەتتە كوكتەمگى دەمالىس جانە دەمالىس ماۋسىمىندا تاياۋ شىعىسقا سۇرانىس كوپ بولاتىن. سوڭعى وقيعالاردان كەيىن قىزىعۋشىلىق ايتارلىقتاي تومەندەدى. تۋريستەر ساياحات كۇندەرىن نەمەسە دەمالاتىن ەلدى وزگەرتىپ جاتىر. بۇل ارينە، نارىققا جانە باسقا باعىتتارداعى باعاعا اسەر ەتەدى. دەگەنمەن، كوپ جاعدايدا بولجانعانداي، باعانىڭ ءوسۋى بولعان جوق. نارىق تا، باعالار دا تۇراقتى بولىپ قالدى، - دەپ ءتۇسىندىردى يننا رەي.
دەگەنمەن، قازىرگى ۋاقىتتا تۋرلاردىڭ قىمباتتاۋىنا باستى سەبەپ - جانارماي داعدارىسى. وتىن تاپشىلىعى مەن ونى جەتكىزۋدەگى قيىندىق سالدارىنان كوپتەگەن ەلدە اۆياكەروسين تاپشىلىعى كۇشەيىپ وتىر. بۇل جاعداي جاھاندىق نارىققا اسەر ەتىپ، اۋە كومپانيالارىن تاڭداۋ جاساۋعا ءماجبۇر ەتتى: نە رەيستەر سانىن قىسقارتىپ، كەي باعىتتاردى ۋاقىتشا توقتاتۋ نەمەسە مۇلدە الىپ تاستاۋ، نە ءوسىپ جاتقان شىعىنداردى وتەپ، باعانى كوتەرۋ.
قازاقستاندا جاعداي اناعۇرلىم تۇراقتى بولعانىمەن، اۆياوتىن باعاسى ءوسىپ كەلەدى. بۇل قىمباتشىلىق اۋە ساپارلارىنىڭ وزىندىك قۇنىنا اسەر ەتەدى. اۋە تاسىمالداۋشىلارى تۋروپەراتورلارعا بيلەت باعاسىنىڭ قىمباتتايتىنىن الدىن الا ەسكەرتىپ جاتىر. بۇل اۆياوتىن شىعىندارىن وتەۋگە ارنالعان قوسىمشا تولەم بولىپ وتىر.
- جانارماي الىمى دەگەن ۇعىمنىڭ ءوزى جاڭالىق ەمەس، ول بۇرىننان بار. تەك ءبىز ونى كوپ قولدانعان جوقپىز، سەبەبى جانارماي باعاسى سالىستىرمالى تۇردە تۇراقتى بولدى. قازىر اۋە كومپانيالارى شىعىندارىن وتەۋ ءۇشىن وسى تاسىلگە جۇگىنۋگە ءماجبۇر. سوندىقتان بارىمىزدەن تۇسىنىستىك پەن سابىر قاجەت. بۇل - الىپساتارلىق تا، پايدا تابۋدىڭ امالى دا ەمەس،- دەپ اتاپ ءوتتى سپيكەر.
الدىن الا تولەنگەن تۋرلارعا كەلسەك، قولدانىستاعى زاڭناماعا سايكەس، كولىك تاريفتەرى ايتارلىقتاي وزگەرگەن جاعدايدا جولدامانىڭ قۇنى قايتا قارالۋى مۇمكىن. جانارمايعا بايلانىستى قوسىمشا تولەم تۋروپەراتوردىڭ تابىسى ەمەس، بۇل قاراجات تىكەلەي اۋە كومپانياسىنا اۋدارىلادى.
سپيكەر تۋريستەرگە سابىر ساقتاپ، قاجەت بولعان جاعدايدا قوسىمشا تولەم جاساۋعا كەڭەس بەرەدى. وسىلايشا ساپاردى كەيىنگە قالدىرماۋعا بولادى. سونىمەن بىرگە، كەيبىر تۋروپەراتورلار تۋردىڭ تولىق قۇنىن الدىن الا تولەۋ ارقىلى باعانى بەكىتۋ مۇمكىندىگىن ۇسىنىپ وتىر. مۇنداي جاعدايدا باعانىڭ قىمباتتاۋ سىن- قاتەرىن كومپانيالار ءوز موينىنا الادى، ال تۋريستەر وسى مۇمكىندىكتى پايدالانا الادى.
جالپى، ساراپشى تاياۋ شىعىستاعى داعدارىس اياقتالعان سوڭ جاعداي بىرتىندەپ تۇراقتانىپ، باعا ارزانداۋى مۇمكىن ەكەنىن ايتۋدا. ال ازىرگە سابىر ساقتاپ، ساپاردى جوسپارلاۋعا ۇتىمدى قاراپ، نارىقتا تەڭگەرىمدى باعا ساياساتىن قالىپتاستىرۋعا ۇمتىلۋ قاجەت.
تۇپتەپ كەلگەندە، شەتەلگە شىعاتىن باعىتتاردا جانارماي ءۇشىن قوسىمشا اقى الۋ - الەمدەگى اۋە كومپانيالارى مەن تۋروپەراتورلار تاپ بولعان وبەكتيۆتى ءارى جاھاندىق ماسەلە. سوندىقتان قازاقستاندىق تۋريستەرگە بەرىلەر نەگىزگى كەڭەس - ساپار الدىندا باعاداعى ىقتيمال وزگەرىستەردى ناقتىلاپ، قوسىمشا شىعىندارعا دايىن بولۋ. بۇل جوسپارلانعان دەمالىستى بۇزباي جۇزەگە اسىرۋعا مۇمكىندىك بەرەدى.
ايتا كەتەيىك، پارسى شىعاناعى ايماعىندا قارۋلى قاقتىعىس باستالعاننان بەرى ورمۋز بۇعازى ارقىلى وتەتىن مۇناي تانكەرلەرىنىڭ سانى %90 ازايدى.
