اتىراۋدى شاڭدى داۋىل باسىپ تۇر، وقۋشىلار قاشىقتان وقۋعا جىبەرىلدى

  بۇگىن اتىراۋدا ەكپىنى كۇشتى جەل سوعىپ تۇر. قاتتى جەل شاڭدى داۋىلدى كوتەرىپ جىبەردى، دەپ حابارلايدى Kazіnform.

وبلىستىق توتەنشە جاعدايلار دەپارتامەنتىنىڭ قوعاممەن بايلانىس توبى شاڭدى داۋىلعا بايلانىستى ەسكەرتۋ جاريالانعانى تۋرالى اقپارات تاراتتى.

«اتىراۋ وبلىسىنىڭ تۇرعىندارى مەن قوناقتارىنان قاۋىپسىزدىك شارالارىن قاتاڭ ساقتاۋدى سۇرايمىز. اسىرەسە تۇنگى مەزگىلدە، داۋىلعا بايلانىستى ەسكەرتۋ جاريالانعان كەزدە ۇزاق ساپارعا شىعۋدان، الىس جەرگە جاياۋ بارۋدان باس تارتۋ قاجەت. كولىك قوزعالىسىنا قويىلاتىن شەكتەۋ مەن اۋا- رايى جاعدايى تۋرالى «112» بايلانىس وپەراتورىنان كەلەتىن SMS حابارلاماداعى اقپاراتپەن ۋاقىتىلى تانىسقان ءجون. بالالاردى قاراۋسىز قالدىرماڭىزدار»، - دەپ حابارلادى دەپارتامەنتتىڭ قوعاممەن بايلانىس توبى.

وبلىستىق ءبىلىم باسقارماسى باسپا ءسوز قىزمەتىنىڭ مالىمەتىنشە، بۇگىن، 12-جەلتوقساندا اتىراۋ قالاسىنداعى مەكتەپتەردىڭ ەكىنشى اۋىسىمداعى وقۋشىلارى ساباقتى ونلاين وقۋعا كوشىرىلدى.

«اۋا رايىنىڭ قولايسىزدىعىنا، جەلدىڭ ۇيىتقۋى سەكۋندىنا 30 مەتر بولۋىنا بايلانىستى قالا مەكتەپتەرىنىڭ وقۋشىلارى ەكىنشى اۋىسىمدا ونلاين رەجيمىندە وقيدى»، - دەپ حابارلادى باسقارمانىڭ باسپا ءسوز قىزمەتى.

جىلىوي اۋدانىندا دا مەكتەپتەردىڭ وقۋشىلارى ونلاين وقۋعا جىبەرىلگەن. بۇل دەرەكتى اۋدان اكىمىنىڭ ورىنباسارى گۇلنافيس ايشۋاقوۆا راستادى.

«جىلىوي اۋدانى بويىنشا ورتا مەكتەپتەردەگى ەكىنشى اۋىسىمداعى ساباق ونلاين رەجيمدە وتەدى»، - دەپ حابارلادى گۇلنافيس ايشۋاقوۆا.

ەسكە سالا كەتەلىك، بۇدان بۇرىن اتىراۋ مەكتەپتەرىندە ءبىرىنشى اۋىسىم وقۋشىلارى ونلاين وقيتىن بولعانىن جازعان ەدىك.