اتىراۋداعى ماحامبەت اۋىلىنا قاۋىپ ءتوندى

اتىراۋ. KAZINFORM - جايىق وزەنىندەگى مول سۋدان اتىراۋ وبلىسىنداعى ماحامبەت اۋىلىنا قاۋىپ ءتوندى. اتىراۋ وبلىسىنىڭ جەدەل شتابىنان ءمالىم ەتكەندەي، سوعان بايلانىستى ماحامبەت اۋدانىنىڭ ورتالىعى - ماحامبەت پەن سارىتوعاي اۋىلىنىڭ اراسىنداعى جولدى جابۋعا تۋرا كەلگەن.

«جايىق وزەنىمەن ءور سۋىنىڭ كوپتەپ كەلۋى ماحامبەت اۋىلىنا ءقاۋىپ ءتوندىردى. سوعان بايلانىستى ماحامبەت- سارىتوعاي اۋىلىن جالعاعان تاس جول جابىلىپ، سۋ ارناسى باعىتىن بۇرۋ ءۇشىن جىرىلدى. ماحامبەت اۋدانىنىڭ اكىمدىگى جول توسەمىن قالپىنا كەلتىرۋ ءۇشىن ينەرتتى ماتەريالدار دايىندادى. الايدا سۋدىڭ كوپ كولەمدە كەلۋى مەن اعىستىڭ قاتتىلىعىنان بۇل جۇمىستى جۇرگىزۋ مۇمكىن بولماي تۇر»، - دەپ حابارلادى وبلىستىق جەدەل شتاب.

سۋ دەڭگەيى تومەندەگەننەن كەيىن جولدى قايتا قالپىنا كەلتىرۋ جۇمىستارى جۇرگىزىلەتىنى جوسپارلانىپ وتىر.

«سۋ تاسقىنىمەن كۇرەستە ۋاقىتشا قولايسىزدىقتار تۋىندايدى. ءبىراق اتالعان جۇمىستار تۇرعىنداردىڭ قاۋىپسىزدىگى ءۇشىن وتە ماڭىزدى. سارىتوعاي ەلدى مەكەنىن ماحامبەت اۋىلىنا قاتىناۋشىلار «سەيتەك» ءشايحاناسى جانىنداعى اينالما جولمەن جۇرۋىنە بولادى»، - دەپ ءمالىم ەتتى وبلىستىق جەدەل شتابتان.

ەسكە سالا كەتەلىك، بۇدان بۇرىن اتىراۋ- ورال تراسساسىنىڭ ماحامبەت اۋدانىنداعى 44-شاقىرىمى جىرىلعان بولاتىن.

كەيىن اتىراۋ- ورال تراسساسىنىڭ 71-شاقىرىمىندا جول ۇستىمەن سۋ ءوتىپ جاتقانىن حابارلاعان ەدىك.

اۆتور
جولداسبەك شوپەعۇل