اتىراۋدا قاساقانا ورتەلگەن پاتەردەن 70 جاستاعى ايەلدىڭ مۇردەسى تابىلدى

اتىراۋ. KAZINFORM - اتىراۋدا قاساقانا ورتەلگەن پاتەردەن 70 جاستاعى ايەلدىڭ مۇردەسى تابىلدى. مارقۇمنىڭ 20 جاستاعى ۇلى كۇيىكپەن اۋرۋحاناعا ءتۇستى.

اتىراۋ وبلىستىق توتەنشە جاعدايلار دەپارتامەنتىنىڭ قوعاممەن بايلانىس توبىنان ءمالىم ەتكەندەي، ءورت بۇگىن، 25-قىركۇيەكتە بولعان.

«تۇنگى ساعات 03:03 تە اتىراۋ قالاسىنىڭ الماگۇل شاعىن اۋدانىنداعى 6 قاباتتى تۇرعىن ءۇيدىڭ 1-قاباتىنداعى پاتەردىڭ ورتەنگەنى تۋرالى شاقىرتۋ ءتۇستى. توتەنشە جاعدايلار دەپارتامەنتى قىزمەتكەرلەرى اۆتوساتىمەن جانە باسپالداق ارقىلى 13 ادامدى، ونىڭ ىشىندە 6 بالانى ەۆاكۋاتسيالادى. ال، 54 ادام، ونىڭ ىشىندە 30 بالا وزدەرى قاۋىپسىز اۋماققا شىقتى»، - دەپ حابارلادى دەپارتامەنتتىڭ قوعاممەن بايلانىس توبى.

پاتەردەگى ءورت ساعات 03:44 تە تولىقتاي ءسوندىرىلدى. ءورتتى سوندىرۋگە توتەنشە جاعدايلار دەپارتامەنتىنەن 17 قۇتقارۋشى، اپاتتىق مەديتسينا ورتالىعىنان 3 قىزمەركەر، 5 تەحنيكا تارتىلعان.

«وقيعا ورنىندا 1954 -جىلى تۋعان ايەل ادامنىڭ دەنەسى تابىلدى. مارقۇمنىڭ 1994 -جىلعى ۇلى كۇيىك الىپ، اۋرۋحاناعا جاتقىزىلدى. ءورتتىڭ الدىن الا سەبەبى - قاساقانا ورتەۋ»، - دەپ ءمالىم ەتتى دەپارتامەنتتىڭ قوعاممەن بايلانىس توبىنان.