اتىراۋدا جايىق جاعاسىنداعى اسپا ەلدى مەكەنىنىڭ 86 تۇرعىنى كوشىرىلەدى

اتىراۋ. KAZINFORM - اتىراۋدا تاسقىن سۋ قاۋپىنە بايلانىستى اسپا ەلدى مەكەنىندەگى 86 تۇرعىن قاۋىپسىز ايماققا كوشىرىلەدى. سەبەپ - ەلدى مەكەن جايىق وزەنىنە وتە تاياۋ ورنالاسقان.

اتىراۋ وبلىسى اكىمىنىڭ باسپا ءسوز قىزمەتىنەن ءمالىم ەتكەندەي، سۋ تاسقىنىنا بايلانىستى 229 شاقىرىم بوگەت سالۋ جوسپارلانعان. قازىر بوگەتتىڭ 139,2 شاقىرىمى سالىنعان.

ال قايىرشاقتى اۋىلدىق وكرۋگىنىڭ اۋماعىنداعى اسپا ەلدى مەكەنىندە 16 تۇرعىن ءۇي بار. بۇل اۋىلدا 86 ادام تۇرادى. ەلدى مەكەن جايىق جاعالاۋىنا جاقىن ورنالاسقاندىقتان، ۇيلەردىڭ سالىعى شايىلىپ بارادى.

«بۇل اۋىلدىڭ تۇرعىندارىن كوشىرۋگە شەشىم قابىلداندى. جاۋاپتى ماماندار قاجەتتى ءىس-شارانى قولعا الادى»، - دەيدى وبلىس اكىمى سەرىك شاپكەنوۆ.

قازىر اتىراۋ قالاسى مەن وعان تاياۋ ورنالاسقان ەلدى مەكەندەردە بوگەت سالۋعا 950 تەحنيكا تارتىلعان. وبلىس اكىمىمەن كەزدەسكەن تالقايراڭ، اقجار، بەسىكتى، گەولوگ، كوكتەم ەلدى مەكەندەرىندە بوگەت سالۋ جۇمىسىنا اتقارىلىپ جاتىر. وبلىس اكىمىمەن كەزدەسكەن جەرگىلىكتى تۇرعىندار، ەرىكتىلەر تەحنيكامەن، قاجەتتى قۇرال-جابدىقتارمەن قامتۋ تۋرالى ۇسىنىسىن ءبىلدىردى.

اكىمنىڭ پىكىرىنشە، بوگەت تۇرعىزۋشىلاردىڭ ۇسىنىسى جەدەل ورىندالۋى قاجەت. ويتكەنى ەلدى مەكەندەرگە جايىق وزەنىنەن تونەتىن تاسقىن سۋدان بيىك بوگەت عانا قورعايدى.

ەسكە سالا كەتەلىك، بۇدان بۇرىن سەرىك شاپكەنوۆ جايىق وزەنىنىڭ سۋى اتىراۋ قالاسىنا قاي تۇستان كىرۋى مۇمكىن ەكەنىن ايتقان بولاتىن.

كەيىن اتىراۋدا بەرەكە، المالى، بەسىكتى اۋىلدارىن سۋ باسۋى مۇمكىن ەكەنىن جازعان ەدىك.