اتىراۋدا ۇشەم دۇنيەگە كەلدى
اتىراۋ. KAZINFORM - جاس وتباسى ءبىر ۇل مەن ەكى قىزدىڭ اتا-اناسى اتاندى.
اتىراۋ وبلىستىق پەريناتالدىق ورتالىعىنىڭ ديرەكتورى قازبەك ەرماعامبەتوۆتىڭ ايتۋىنشا، ۇشەمدى دۇنيەگە اكەلگەن 26 جاستاعى بەكزادا قادىربايەۆاعا جۇكتىلىكتىڭ 33 اپتاسىندا وتا جاسالعان.
پەريناتالدىق ورتالىق ديرەكتورىنىڭ ورىنباسارى گۇلميرا ابەكەيەۆانىڭ ايتۋىنشا، بۇل - جاس وتباسىنىڭ تۇڭعىش پەرزەنتتەرى. جاس وتباسى سابيلەرىنە ابدۋل حاكيم، حافيزا، حابيبا ەسىمىن بەرگەن.
«ۇشەمنىڭ بىرەۋى - ۇل، ەكەۋى - قىز. سابيلەر ءارتۇرلى سالماقپەن ومىرگە كەلدى. ءبارىنىڭ دە سالماعى 2 كەلىگە جەتپەدى. ءبىرى - 1711، ەكىنشىسى – 1823، ءۇشىنشىسىنىڭ سالماعى 1420 گرام بولدى. نارەستەلەر شالا تۋعانىنا بايلانىستى جانساقتاۋ بولىمىندە جاساندى جەلدەتۋ قۇرىلعىسىنا قوسىلدى. وسى بولىمدە تولىققاندى ەم الدى. پەرزەنتحانادا جاعدايى تۇراقتالىپ، تىنىس الۋى جاقسارعانعا دەيىن 37 كۇن جاتتى. سونان سوڭ ۇيىنە شىعارىلدى. قازىر سابيلەردىڭ سالماعى ۇلايىپ، 1700، 2400، 2500 گرامعا جەتتى»، - دەيدى گۇلميرا ابەكەيەۆا.
«ازاماتتارعا ارنالعان ۇكىمەت» مەملەكەتتىك كورپوراتسياسى ك ە ا ق اتىراۋ وبلىسى بويىنشا فيليالى ديرەكتورىنىڭ ورىنباسارى نۇرلان دۇيسەمبايەۆ ۇشەمنىڭ تۋۋ تۋرالى كۋالىگىن تابىس ەتتى. ال، وبلىستىق پەريناتالدىق ورتالىعىنىڭ ديرەكتورى قازبەك ەرماعامبەتوۆ ۇشەمنىڭ اكە-شەشەسىنە ورتالىق اتىنان ارنايى سەرتيفيكات تابىستادى.
ەسكە سالا كەتەلىك، بۇعان دەيىن اتىراۋدا 20 ميلليونىنشى تۇرعىن بولىپ دۇنيەگە كەلگەن ءسابيدىڭ مۇحامماد ەسىمى بەرىلگەن ەدى.
