اتىراۋ وبلىسىندا 51 ەلدى مەكەندى تاسقىن سۋ باسۋ قاۋپى بار
اتىراۋ. KAZINFORM - اتىراۋ وبلىسىندا 51 ەلدى مەكەندى تاسقىن سۋ باسۋ قاۋپى بارى انىقتالىپ وتىر. وسىعان بايلانىستى اتالعان ەلدى مەكەننىڭ بارىنە ماۋسىمدىق گيدروبەكەتتەر ورناتۋ كوزدەلگەن.

اتىراۋ وبلىسىنىڭ سەرىك شاپكەنوۆ كوكتەمگى سۋ تاسقىنىنىڭ الدىن الۋ ماسەلەسى تالقىلانعان جيىن وتكىزدى.
«قازگيدرومەت» ر م ك اتىراۋ فيليالىنىڭ ديرەكتورى سالاۋات تولەنوۆتىڭ ايتۋىنشا، رەسەي فەدەراتسياسىنان مول كولەمدە سۋ كەلۋى مۇمكىندىگىنە بولجام جاسالعان.
- قازىر اتىراۋ وبلىسىنىڭ اۋماعىندا «قازگيدرومەتتىڭ» 12 گيدروبەكەتى بار. مۇندا كۇنىنە ەكى رەت سۋ دەڭگەيى، تەمپەراتۋراسى، مۇزدىڭ قالىڭدىعى ولشەنەدى. ايىنا ءۇش رەت سۋ اعىسى تەكسەرىلىپ، ستاندارتتى باقىلاۋ جۇرگىزىلەدى. قازىر وبلىستىڭ بارلىق سۋ ايدىنىندا گيدرولوگيالىق جاعداي تۇراقتى، مۇز ءالى قاتىپ جاتىر. بىلتىرعى 28-جەلتوقساننان بۇگىنگە دەيىن رەسەيدىڭ ورىنبور وبلىسىنداعى يرەكلي سۋ قويماسىنان جىبەرىلگەن سۋ سەكۋندىنا 60 تەكشە مەتر. وتكەن جىلعى اقپاندا سۋ جىبەرۋ سەكۋندىنا 25 تەكشە مەتر بولعان ەدى. كەشە يرەكلي سۋ قويماسىنداعى سۋ كولەمى 2 624 ميلليون، سۋدىڭ كەلۋى سەكۋندىنا 19,1 تەكشە مەتر بولدى، - دەيدى سالاۋات تولەنوۆ.
اكىمنىڭ پىكىرىنشە، وزەندەردەگى تەك شەكتى دەڭگەيدى عانا ەمەس، كەلىپ جاتقان سۋدىڭ كولەمىن دە ەسكەرۋ قاجەت.
- وسى ورايدا كوپجىلعى ورتاشا كورسەتكىشكە، وتكەن جىلعى مالىمەتتەر مەن جوسپارلانعان كولەمگە سۇيەنۋدىڭ ماڭىزى زور. وتكەن جىلعى تاجىريبە كورسەتكەندەي، سۋ بەلگىلەنگەن دەڭگەيگە عانا جەتىپ قويماي، قوسىمشا قاۋىپ ءتوندىرۋى مۇمكىن. وسىعان بايلانىستى اقتوبە جانە باتىس قازاقستان وبلىستارىنىڭ شەكاراسىنا جاقىن جەردە سۋدىڭ كولەمىن باقىلايتىن بەكەتتەر اشۋ، سۋ باسۋ قاۋپى جوعارى 51 ەلدى مەكەندە ماۋسىمدىق گيدروبەكەتتەر ورناتۋ كەرەك. ال «قازگيدرومەت» فيليالى شەكارالاس ايماقتارداعى گيدرولوگيالىق جاعداي بويىنشا جەدەل اقپارات الماسۋ جۇيەسىنە كوشۋى ءتيىس. سۋ تاسقىنى ەكى جىل قاتارىنان قايتالانۋى مۇمكىن ەكەنىن ەسكەرگەن ءجون، - دەدى سەرىك شاپكەنوۆ.
اتىراۋ وبلىستىق توتەنشە جاعدايلار دەپارتامەنتىنىڭ باستىعى نۇرلان جاڭابايەۆتىڭ ايتۋىنا قاراعاندا، سۋ وتكىزەتىن قۇبىرلاردى تازالاۋ، بوگەتتەر مەن قورعانىس نىساندارىن كۇشەيتۋ جۇمىسى ءجۇرىپ جاتىر. بىلتىر جايىق وزەنى بويىندا 590 شاقىرىم بوگەت تۇرعىزىلىپ، 20 شاقىرىم كانال قازىلعان.
- رەسپۋبليكالىق جانە وبلىستىق ماڭىزى بار جول بويىندا 8 سۋ وتكىزگىش قۇبىر ورناتىلدى. وزەن بويىندا 90 شاقىرىم جاعالاۋ نىعايتىلىپ، 121 شاقىرىم ءتۇپ تەرەڭدەتىلدى. سۋ تاسقىنعا قارسى ءىس-شارالار ءالى دە جۇرگىزىلىپ جاتىر. بۇل باعىتتاعى جۇمىستى ناۋرىزدا تولىق اياقتاۋ جوسپارلاندى. توتەنشە جاعداي رەزەرۆىندە جانار-جاعارماي، ينەرتتى ماتەريالدار مەن قاپشىقتار قورى جاساقتالدى. ءنوپىر سۋدىڭ سالدارىمەن كۇرەسكە 1510 ادام، 244 تەحنيكا، ونىڭ ىشىندە ءجۇزۋ قۇرالدارى مەن تىكۇشاقتار دايىن. قاجەتتىلىك تۋىندايتىن بولسا، باسقا وڭىرلەردىڭ كۇشتەرى مەن قۇرالدارىن جۇمىلدىرۋ قاراستىرىلىپ وتىر، - دەپ حابارلادى نۇرلان جاڭابايەۆ.
اتىراۋ قالاسى مەن 7 اۋداننىڭ اكىمى تاسقىن سۋدىڭ الدىن الۋعا دايىندىق شارالارىن باياندادى. اكىمدەرگە بوگەتتەردى ءجيى تەكسەرۋ، وسال تۇسىن نىعايتۋ، گيدرولوگيالىق جاعدايدى باقىلاۋدا ۇستاۋ تاپسىرىلدى.
- بىلتىرعى سۋ تاسقىنى بىزگە ۇلكەن سىناق بولدى. وسال تۇستى بايقادىق. تۇرعىنداردى ەۆاكۋاتسيالاۋدى ءتيىمدى ۇيىمداستىرۋ ماسەلەسىنە ەرەكشە نازار اۋدارۋ قاجەت. سۋ باسۋ قاۋپى جوعارى اۋماقتارداعى شارۋا قوجالىقتارىنا الدىن الا ەسكەرتۋ، مالدى ۋاقىتشا ورنالاستىراتىن ورىندار دايىن بولعانى ءجون. بارلىق سۋ وتكىزەتىن نىسان مەن سالىنعان بوگەتتىڭ جاعدايى جان-جاقتى تەكسەرىلىپ، جەدەل شتابقا ناقتى اقپارات ۇسىنىلۋى ءتيىس. بىلتىر قوماقتى قارجى ءبولىپ، ماتەريالدىق-تەحنيكالىق بازا جاڭارتىلدى. ءبىراق بوساڭسۋعا بوي الدىرماي، كەز كەلگەن جاعدايعا دايىن بولۋىمىز كەرەك، - دەدى سەرىك شاپكەنوۆ.
ەسكە سالا كەتەلىك، بۇعان دەيىن اتىراۋ وبلىسى كوكتەمگى سۋ تاسقىنىنا قالاي دايىندالىپ جاتقانىن جازعان ەدىك.