اتى اڭىزعا اينالعان «وقجەتپەس» شيپاجايىنا 60 جىل
استانا. KAZINFORM - بۇگىن پرەزيدەنت ءىس باسقارماسى مەديتسينالىق ورتالىعىنىڭ «وقجەتپەس» ەمدەۋ-ساۋىقتىرۋ كەشەنىنە 60 -جىل تولدى. قازاقستانداعى ۇزدىك شيپاجاي تۋرالى قىزىقتى دەرەكتەردى نازارلارىڭىزعا ۇسىنامىز.

60 جىلدا شيپاجايدا 1068850 ادام ساۋىقتىرۋ شارالارىنان وتكەن. ونىڭ ىشىندە 198395 ادام وڭالتۋ باعدارلاماسى بويىنشا ەم الدى.
قازىرگى ۋاقىتتا جىلىنا 10 مىڭنان استام ادامدى ساۋىقتىرۋ كۋرسىنا قابىلداي الادى.

شيپاجايدا:
248 جاتىن ورىن، 127 نومىرلىك قور بار
197 مەديتسينا ماماندارى قىزمەت ەتتى، ونىڭ ىشىندە 59 جوعارى دارەجەلى بىلىكتى دارىگەر مەن 140 مەيىربيكە
13 ساۋىقتىرۋ باعدارلاماسى، 10 وڭالتۋ باعدارلاماسى، 105 مەديتسينالىق جابدىق، 112 ەمدىك شارالار ىسكە قوسىلعان.

وسىلايشا، ونداعان جىل ىشىندە ميللياردتان استام ادامعا ەمدەۋ-ساۋىقتىرۋ قىزمەتى كورسەتىلدى. ءقازىر ەمدەۋ- ساۋىقتىرۋ كەشەنى كەلەسى باعىتتاردى قامتيدى:
مامانداردىڭ قابىلداۋى: تەراپيەۆت، ديەتولوگ، وتولارينگولوگ
ەمدىك دەنە شىنىقتىرۋ (تىنىس الۋ گيمناستيكاسى، بوديفلەكس، تىرەك- قيمىل اپپاراتىنىڭ اۋرۋلارى بار توپ، سكانديناۆيالىق سەرۋەندەۋ، جەكە جاتتىعۋ ساباقتارى)

مينەرالدى سۋمەن، دارىلىك پرەپاراتتارمەن ينگالياتسيا
ۆاننالار (مينەرالدى، رادوندى، مارجاندى، ءتورت كامەرالى، قىلقاندى)
دۋشتار («شاركو» دۋشى، سۋ استى دۋش- ماسساج، ورلەمەلى دۋش)
بالشىقپەن ەمدەۋ
وزوكەريتتى- پارافيندى ەمدەۋ
ەرەسەكتەر مەن بالالارعا ارنالعان گالوكامەرا
قىزىل يەكتى ستوماتولوگيالىق سۋلاندىرۋ
وتتەگى كوكتەيلى، فيتوتەراپيا
فيزيوتەراپيالىق ەمدەۋ جانە تاعى باسقالارى.
ايتا كەتەيىك، «وقجەتپەس» ءوزىنىڭ تاريحىن 1965-جىلى ءۇش قاباتتى ءبىر عيماراتتان باستاپ، بۇگىندە ۇزدىك شيپاجايلار تىزىمىندە كوش باستاپ كەلەدى. ەڭ العاش شيپاجاي «ياسنايا پوليانا» دەگەن اتپەن جۇمىس ىستەي باستادى. 1972-جىلى بارلىق قىزمەت جانە ەمدەۋ- دياگنوستيكالىق كابينەتتەرى ورنالاسقان بولەك ەمدەۋ عيماراتى پايدالانۋعا بەرىلدى. شيپاجاي كليماتتىق بالنەولوگيالىق بولىپ قايتا بەيىندەلدى جانە جىل بويىنا 120 دەمالۋشىنى قابىلداي الاتىن بولدى.
ەمدىك ماقساتقا جەرگىلىكتى تابيعي فاكتورلار - ماي- بالىق كولىنىڭ سۋى جانە بالپاش سور كولىنىڭ بالشىعى قولدانىلدى. بۋراباي كولىنىڭ ەمدىك قاسيەتى زەرتحانالىق تەكسەرۋگە دەيىن كوپ ۋاقىت بۇرىن بەلگىلى بولدى.
1980-جىلدىڭ باسىندا جاڭا جەتى قاباتتى جايلى بولمەلەرىمەن جاتىن عيماراتىنىڭ قۇرىلىسى باستالدى. 1982-جىلى جاتىن عيماراتى پايدالانۋعا بەرىلگەننەن كەيىن، ساناتوريگە «وقجەتپەس» اتاۋى بەرىلدى. 2001-جىلدىڭ شىلدەسىنەن 2003 -جىلدىڭ ناۋرىزىنا دەيىن ەسك بارلىق عيماراتتاردى قايتا قۇرۋ جانە كۇردەلى جوندەۋ جۇمىستارىن جۇرگىزدى. 2021 -جىلى «Qazaq nomad resort» تۇجىرىمداماسى اياسىندا سىرتقى بەينەسىنە جانە 74 ءنومىر قازاقى ويۋ-ورنەكتەرمەن جاڭارتىلدى.

2006-جىلى اندورردا دۇنيە جۇزىلىك سۋمەن جانە كليماتپەن ەمدەۋ فەدەراتسياسىنىڭ باس اسسامبلەياسىمەن ساناتوريالىق- كۋرورتتىق ەمدەۋدى ۇيىمداستىرۋداعى جەتىستىكتەرى جانە دۇنيەجۇزىلىك دەنساۋلىق ساقتاۋ ۇيىمدارىنىڭ اراسىندا بەلسەندى عىلىمي جۇمىستارى ءۇشىن «وقجەتپەس» ەسك- نە «الەمدەگى ەڭ ۇزدىك كۋرورت» ماراپاتى تابىس ەتىلدى.
2011-جىلى ساناتوريي مەنشىكتى بۇلاقتىڭ رادوندى سۋىن پايدالانۋ ارقىلى جاڭا مەديتسينالىق قىزمەت كورسەتۋ - رادوندى تەراپيانى ەنگىزدى. 2012-جىلى مامىردا لوندوندا ( ۇلى بريتانيا) بريتان ينستيتۋتى ديرەكتورلارىنىڭ شەشىمىمەن ءبىزدىڭ ەمدەۋ- ساۋىقتىرۋ كەشەنى «ەۋروپالىق ساپا» حالىقارالىق ماراپاتقا يە بولدى.
بۇعان دەيىن جازعانىمىزداي، «وقجەتپەس» ەمدەۋ- ساۋىقتىرۋ كەشەنىنە بىرىكتىرىلگەن شيپايجايلاردا بيىلعى 7-ايدا 15 مىڭنان استام ادام ساۋىعىپ قايتتى. «وقجەتپەس» ەمدەۋ- ساۋىقتىرۋ كەشەنى» اق شيپاجايلار وكىلدىگىنىڭ باسشىسى ءمادينا بۇركىتبايەۆا شەتەلدىك تۋريستەردىڭ قازاقستاندىق ساناتوريلەرگە دەگەن قىزىعۋشىلىعى جايىندا ايتىپ بەرگەن ەدى.
گۇلنۇر عازيز قىزى