اتوم ەلەكتر ستانتسياسىن سالۋدى قولداۋ جونىندەگى حالىقتىق شتاب ميلليونداعان قازاقستاندىقتى بىرىكتىردى

استانا. KAZINFORM - ءماجىلىس سپيكەرى، «AMANAT» پارتياسىنىڭ ءتوراعاسى ەرلان قوشانوۆ اەس سالۋدى قولداۋ جونىندەگى حالىقتىق شتابتىڭ العاشقى وتىرىسىن وتكىزدى. ونىڭ قۇرامىنا 6 ساياسي پارتيانىڭ، سونداي- اق شامامەن 20 رەسپۋبليكالىق قوعامدىق بىرلەستىكتىڭ 250 گە جۋىق وكىلى كىردى.

6- قازاندا وتەتىن ا ە س سالۋ جونىندەگى رەفەرەندۋمنىڭ تاۋەلسىز قازاقستاننىڭ بولاشاعى ءۇشىن ستراتەگيالىق ماڭىزى زور. سوندىقتان ەلىمىزدەگى بەدەلدى ساياسي جانە قوعامدىق ۇيىمدار ا ە س سالۋدى قولداۋ جونىندەگى حالىقتىق شتابقا بىرىكتى. بۇل تۋرالى ءماجىلىس سپيكەرى، «AMANAT» پارتياسىنىڭ ءتوراعاسى ەرلان قوشانوۆ شتابتىڭ العاشقى وتىرىسىندا مالىمدەدى. شتابتىڭ ماقساتى - حالىقتى اتوم ەلەكتر ستانتسياسىن سالۋ جونىندەگى پروگرەسسيۆتى يدەياسىنىڭ اينالاسىندا توپتاستىرۋ.

«ا ە س قۇرىلىسى - قازاقستاننىڭ الداعى ۇزاق جىلدارداعى تابىستى دامۋىنىڭ كەپىلى بولاتىن سەرپىندى جوبا. ەلىمىزدەگى جانە الەمدەگى بارلىق وزىق ويلى تۇلعالار اتوم ەنەرگەتيكاسىن پايدالانۋدىڭ تيىمدىلىگىن جاقسى تۇسىنەدى. بۇل - ەڭ الدىمەن، قاۋىپسىز، سەنىمدى، ەكولوگيالىق تازا جوبا. ءبىز ۇلكەن تاڭداۋ الدىندا تۇرمىز. سوندىقتان حالىقتىق شتابتىڭ مىندەتى - ەل اراسىندا كەڭ اۋقىمدى ءتۇسىندىرۋ جۇمىستارىن جۇرگىزىپ، قوعامدى ا ە س- ءتى قولداۋعا جۇمىلدىرۋ. 6-قازاندا وتەتىن رەفەرەندۋم ءبىزدىڭ بىرلىگىمىزدى كورسەتەدى»، - دەدى ول.

ءماجىلىس سپيكەرى بۇگىنگى تاڭدا ەنەرگەتيكالىق تاۋەلسىزدىك ماسەلەسى كۇن تارتىبىندە العاشقى ورىنعا شىققانىن اتاپ ءوتتى. الەمنىڭ وزىق ەلدەرىنىڭ تاجىريبەسى اتوم ەنەرگەتيكاسىنىڭ تيىمدىلىگى مەن قاۋىپسىزدىگىن ايقىن دالەلدەيدى. قازىرگى ۋاقىتتا قازاقستان ەلەكتر ەنەرگياسىنىڭ تاپشىلىعىن سەزىنۋدە جانە ونى كورشى ەلدەردەن يمپورتتاۋعا ءماجبۇر. سوندىقتان حالىقتىق شتابتىڭ باستى مىندەتى - قوعامعا ا ە س سالۋدىڭ ماڭىزدىلىعى مەن ارتىقشىلىقتارىن جەتكىزۋ، جۇرت اراسىنداعى نەگىزسىز ۇرەيلەردى سەيىلتۋ. وعان قوسا، پارتيالار مەن ۇ ە ۇ- لاردىڭ بىرلەسىپ جۇمىس ىستەۋدە تابىستى تاجىريبەسى دە بار.

«ءبىزدىڭ ءارقايسىمىز بالالارىمىزدىڭ قۋاتتى جانە ەشكىمگە مۇقتاج بولمايتىنداي تاۋەلسىز مەملەكەتتە ءومىر سۇرگەنىن قالايمىز. اەس سالۋ تۋرالى شەشىمدى قابىلداي وتىرىپ، ءبىز وسى اسقاق ارمانىمىزعا قاراي قادام جاسايمىز. ءبىز ەلدىڭ ەنەرگەتيكالىق تاۋەلسىزدىگىن شەگەلەپ بەكىتەمىز. بولاشاق ۇرپاققا ەنەرگەتيكالىق تۇرعىدان تاۋەلسىز، ياعني ەكونوميكاسى تۇراقتى جانە وركەندەگەن قازاقستاندى مۇرا ەتىپ قالدىرامىز. بۇل تاريحي شەشىم ادىلەتتى قازاقستاندى قۇرۋ جىلناماسىنداعى جاڭا پاراقشاعا اينالادى»، - دەدى ول.

وتىرىس بارىسىندا ا ە س قۇرىلىسىنا قولداۋ ءبىلدىرىپ، حالىقتىق شتابتىڭ قۇرامىندا كىرگەندەر قاتارىندا ۇلتتىق عىلىم اكادەمياسىنىڭ پرەزيدەنتى اقىلبەك كۇرىشبايەۆ، «قازاقستاندىق اتوم ەلەكتر ستانتسيالارى» ج ش س باس ديرەكتورى تيمۋر جانتيكين، قازاقستان ازاماتتىق اليانسىنىڭ پرەزيدەنتى بانۋ نۇرعازييەۆا، «اتامەكەن» ۇلتتىق كاسىپكەرلەر پالاتاسى پرەزيديۋمىنىڭ ءتوراعاسى رايىمبەك باتالوۆ، قازاقستان حالىق پارتياسىنىڭ ءتوراعاسى ەرمۇحامەت ەرتىسبايەۆ، «ارداگەرلەر ۇيىمى» ر ق ب ءتوراعاسى باقتىقوجا ىزمۇحامبەتوۆ، «اۋىل» پارتياسىنىڭ ءتوراعاسى سەرىك ەگىزبايەۆ، «اق جول» قازاقستان دەموكراتيالىق پارتياسىنىڭ ءتوراعاسى ازات پەرۋاشيەۆ، ءماجىلىس دەپۋتاتى ەرمۇرات باپي، «Respublica» پارتياسىنىڭ ءتوراعاسى ايداربەك قوجانازاروۆ، «بايتاق» پارتياسىنىڭ ءتوراعاسى ازاماتحان امىرتايەۆ، «جاستار رۋحى» جاستار قاناتىنىڭ ءتوراعاسى اقەركە يسكاندەروۆا جانە باسقالار بولدى.

سونىمەن قاتار حالىقتىق شتابتىڭ قۇرامىنا قازاقستان رەسپۋبليكاسى كاسىپوداقتار فەدەراتسياسى، «ارداگەرلەر ۇيىمى» ر ق ب، ۇلتتىق سپورت قاۋىمداستىعى، «اسسامبلەيا جاستارى» ر ق ب، قازاقستاننىڭ يادرولىق قوعامى، تاۋ- كەن ءوندىرۋ جانە تاۋ-كەن مەتاللۋرگيا كاسىپورىندارى قاۋىمداستىعى، قازاقستان ەلەكتر ەنەرگەتيكالىق قاۋىمداستىعى جانە باسقا دا ۇيىمدار كىردى.

شتاب قۇرامىنا ساياسي پارتيالاردىڭ ورتالىق جانە ايماقتىق بەلسەندىلەرى، سونداي- اق رەسپۋبليكالىق قوعامدىق بىرلەستىكتەردىڭ وكىلدەرى، سونىڭ ىشىندە پارلامەنت پەن ءماسليحات دەپۋتاتتارى، ينتەلليگەنتسيا وكىلدەرى، تانىمال عالىمدار، مادەنيەت جانە سپورت قايراتكەرلەرى، «جاستار رۋحى» جانە باسقا دا جاستار ۇيىمدارىنىڭ بەلسەندىلەرى كىردى. الداعى ۋاقىتتا شتاب مۇشەلەرى وڭىرلەردەگى سايلاۋشىلارمەن جۇمىسىن باستايدى، ەڭبەك ۇجىمدارىمەن كەزدەسۋلەر وتكىزەدى، شالعاي ەلدى مەكەندەرگە بارادى.

بۇعان دەيىن پرەزيدەنت ا ە س قۇرىلىسى بويىنشا رەفەرەندۋم 6-قازاندا وتەتىنىن مالىمدەگەن بولاتىن.