اۆتومەكتەپتەرگە جاڭا تالاپ قويىلماق - ءماجىلىس
استانا. KAZINFORM - بۇگىن پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جول قاۋىپسىزدىگىن سيفرلاندىرۋ جانە جۇرگىزۋشىلەردى دايارلاۋ سالاسىنداعى كاسىپكەرلىك قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.
- بۇگىن قوعامدا قاۋىپسىزدىككە دەگەن تۇراقتى سۇرانىس بار.
جولدا دا اۋلادا دا سيفرلىق ورتادا دا ءار ادام ءوزىن قاۋىپسىز سەزىنگىسى كەلەدى. زاڭ جوباسى جول قوزعالىسى قاۋىپسىزدىگىن ارتتىرۋعا باعىتتالعان.
ول ءۇشىن جۇرگىزۋشىلەردى دايارلاۋ جۇيەسىن جەتىلدىرۋ، سالاعا زاماناۋي سيفرلىق قۇرالداردى ەنگىزۋ جانە سيفرلىق ورتادا ادامنىڭ قاۋىپسىزدىگىن كۇشەيتۋ كوزدەلىپ وتىر. وسىعان بايلانىستى جول قوزعالىسى ەرەجەلەرىن بۇزۋدى تىركەيتىن تەحنيكالىق قۇرالداردى پايدالانۋ ءتارتىبى ناقتىلانادى. مۇنىمەن قوسا، زاڭ جوباسىندا اۆتومەكتەپتەردىڭ قىزمەتىنە مەملەكەتتىك باقىلاۋدى كۇشەيتۋ ۇسىنىلادى. اتاپ ايتقاندا اۆتومەكتەپتەردىڭ قىزمەتىنە رۇقسات بەرۋ ءتارتىبى ەنگىزىلەدى. ول ءۇشىن «رۇقساتتار جانە حابارلامالار تۋرالى» زاڭعا وزگەرىستەر ەنگىزىلمەك، - دەدى ءماجىلىس دەپۋتاتى ەكاتەرينا سمىشليايەۆا.
رۇقسات الۋ ءۇشىن اۆتومەكتەپتە:
- قاجەتتى ماتەريالدىق- تەحنيكالىق بازا؛
- وقۋ الاڭدارى؛
- وقىتۋعا ارنالعان كولىكتەر جانە بىلىكتى وقىتۋشىلار بولۋى ءتيىس.
سونىمەن قاتار رۇقسات العان وقۋ ۇيىمدارىنىڭ مەملەكەتتىك ءتىزىلىمىن قۇرۋ ەسكەرىلگەن. بۇل ءتىزىلىم رۇقسات العاننان كەيىن وقۋ ۇيىمدارىنىڭ قىزمەتىن باقىلاۋعا مۇمكىندىك بەرەدى. ءتىزىلىمدى جۇرگىزۋ ىشكى ىستەر مينيسترلىگىنە جۇكتەلەدى. مەديتسينالىق مالىمەتتەردىڭ كەيبىر تۇرلەرىن ىشكى ىستەر مينيسترلىگىنىڭ دەرەكتەر بازاسىنا ەنگىزۋ قاراستىرىلعان.
جەكە دەرەكتەردى قورعاۋ
- زاڭ جوباسىندا جەكە دەرەكتەردى قورعاۋ جانە كيبەرقاۋىپسىزدىك ماسەلەلەرىنە قاتىستى جەكە نورمالار كوزدەلگەن. ايتا كەتۋ كەرەك بۇل وزگەرىستەر ازاماتتاردىڭ جەكە دەرەكتەرىن قورعاۋ تۋرالى كونستيتۋتسيالىق نورمانى ىسكە اسىرۋ ماقساتىندا ەنگىزىلىپ وتىر. بىرىنشىدەن، زاڭ جوباسىندا جەكە دەرەكتەر وپەراتورلارىن ساناتتارعا ءبولۋ ەنگىزىلەدى. وپەراتورلار تاۋەكەل دەڭگەيىنە قاراي شاعىن، ورتا جانە ءىرى بولىپ بولىنەدى. وسىعان بايلانىستى تالاپتار دا ءارتۇرلى بولادى. ءىرى وپەراتورلارعا جانە جابىق دەرەكتەرمەن جۇمىس ىستەيتىن وپەراتورلارعا دەرەكتەردى قورعاۋ بويىنشا جوعارى تالاپتار قويىلادى. وسىلايشا، جەكە دەرەكتەر سالاسىندا تاۋەكەلگە نەگىزدەلگەن رەتتەۋ مودەلى ەنگىزىلەدى، - دەدى دەپۋتات.
ەكىنشىدەن، زاڭ جوباسىندا جاريا بولىپ كەتكەن جەكە دەرەكتەردىڭ ءتىزىلىمى ەنگىزىلەدى. ءار ازامات مەملەكەتتىك اقپاراتتىق جۇيە ارقىلى قانداي جەكە دەرەكتەرى اشىق تاراپ كەتكەنىن تەكسەرە الادى. بۇل ادامدارعا ءوز دەرەكتەرىن قورعاۋ ءۇشىن دەر كەزىندە شارا قولدانۋعا مۇمكىندىك بەرەدى.
- جەكە دەرەكتەر جاريالانعان كەزدە جانە ولارمەن الماسۋ كەزىندە قورعاۋ تالاپتارى كۇشەيتىلەدى. جەكە دەرەكتەردى جاسىرۋ جانە حەشتەۋ تالاپتارى ەنگىزىلەدى. مىسالى، سوت شەشىمدەرى نەمەسە مەملەكەتتىك ساتىپ الۋعا قاتىستى قۇجاتتار سياقتى اشىق جاريالانۋى مىندەتتى قۇجاتتارعا قاتىستى. مۇنداي قۇجاتتاردا جەكە اقپاراتتىڭ كوپ كولەمى بولۋى مۇمكىن. سوندىقتان كەيبىر دەرەكتەردى زاڭسىز پايدالانۋدى بولدىرماۋ ءۇشىن ولار جاسىرىلۋى ءتيىس. سونىمەن قاتار، وپەراتورلار اراسىندا دەرەكتەر الماسۋ كەزىندە دە جەكە دەرەكتەردى شيفرلاۋ تالاپتارى ەنگىزىلەدى، - دەدى ەكاتەرينا سمىشليايەۆا.
مۇنىمەن قوسا، زاڭ جوباسى اياسىندا ازاماتتاردىڭ جەكە دەرەكتەرىن اشىق جاريالاۋعا كەلىسىم بەرۋ تالاپتارى ناقتىلانادى. تاعى ءبىر ءبولىم كيبەرقاۋىپسىزدىك ماسەلەلەرىنە ارنالعان. زاڭ جوباسىندا سيفرلىق ينفراقۇرىلىمنىڭ اسا ماڭىزدى وبەكتىلەرىنە مەملەكەتتىك باقىلاۋ فۋنكتسيالارىن قايتا ءبولۋ قاراستىرىلعان. بۇل وبەكتىلەردى باسقارۋ ساياساتى جاساندى ينتەللەكت جانە سيفرلىق دامۋ مينيسترلىگىنىڭ قۇزىرەتىندە قالادى.
ال مەملەكەتتىك باقىلاۋ فۋنكتسيالارىن قازاقستان رەسپۋبليكاسى ۇلتتىق قاۋىپسىزدىك كوميتەتىنە بەرۋ ۇسىنىلادى. اتالعان نورما ق ر پرەزيدەنتىنىڭ كيبەرقاۋىپسىزدىكتى كۇشەيتۋ تۋرالى جارلىعىن ورىنداۋ ماقساتىندا ەنگىزىلىپ وتىر.
بۇدان بۇرىن حابارلانعانداي، جۇرگىزۋشىلەردى دايارلاۋدىڭ اشىقتىعى مەن ساپاسىن ارتتىرۋ ءۇشىن اۆتومەكتەپتەردى اشۋ حابارلامادان رۇقسات بەرۋ تارتىبىنە كوشىرىلەدى.
