«اتا جولى» كارتاسى: ا ق ش پەن ەۋروپادان ەتنيكالىق قازاقتار كەلەدى

استانا. KAZINFORM - «اتا جولى» كارتاسىن 57 ەتنيكالىق قازاق الدى. بۇل تۋرالى ق ر ەڭبەك جانە حالىقتى الەۋمەتتىك قورعاۋ مينيسترلىگى كوشى-قون كوميتەتى ءتوراعاسىنىڭ ورىنباسارى ەربولات ابۋلحاتين ايتتى.

«الەمدە ينۆەستيتسيالار ءۇشىن باسەكەلەستىكتىڭ كۇشەيۋى اياسىندا ەلدەگى بيزنەس- يمميگراتسيانى ودان ءارى دامىتۋ بويىنشا جۇمىستار جالعاسىپ جاتىر. ەتنيكالىق قازاقتاردى «اتا جولى» كارتاسىنا تارتۋ بويىنشا شارالار قولعا الىندى. وسى كارتانى الۋعا ۇمىتكەرلەردىڭ گەوگرافياسى كەڭەيىپ كەلەدى. قازىرگى كەزدە رەسەي فەدەراتسياسى، گەرمانيا، قىتاي سياقتى تاياۋ شەت ەلدەرمەن قاتار، «اتا جولى» كارتاسىن الۋعا ا ق ش، ەۋرو وداعى ەلدەرىنىڭ ازاماتتارى - ەتنيكالىق قازاقتار دا قىزىعۋشىلىق تانىتىپ وتىر.

ەستەرىڭىزگە سالا كەتسەك، «اتا جولى» كارتاسى ءوز ەلدەرىندە سۇرانىسقا يە كاسىبى بار نەمەسە تابىستى بيزنەس- كەيستەردى ىسكە اسىرعان جانە ولاردى قازاقستاندا كەڭىنەن قولدانۋعا نيەت بىلدىرگەن ەتنيكالىق قازاقتارعا بەرىلەدى»، - دەدى ە. ابۋلحاتين ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

ونىڭ ايتۋىنشا، «اتا جولى» كارتاسىن 57 ەتنيكالىق قازاق الدى. ونىڭ ىشىندە سۇرانىسقا يە ماماندىقتارى بار 31 ادام جانە 26 كاسىپكەر قامتىلدى. بۇل كارتانى العان ەتنيكالىق قازاق كوبىنە استانا جانە الماتى قالاسىندا تۇرادى.