اتا ءداستۇردى ارداقتاعان قانداسىمىز ايناگۇل ايىپقان قىزى - شەتەلدەگى قازاق باسپا ءسوزى
Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
قانداسىمىز باعدار ورازالى ۇلى باس جۇلدەنى جەڭىپ الدى - «Harajorga»
2024 -جىلعى دۋنپو جارتىلاي مارافون جانە «سىچۋاندى اينالۋ» جەلىلەس مارافونىنىڭ دۋنپوداعى جارىسى 30-ناۋرىز كۇنى تۇستەن بۇرىن قىتايدىڭ سىچۋان ولكەسى، ميشان قالاسىندا ءوتتى، دەپ حابارلايدى «Harajorga».
قىتايلىق ب ا ق-تىڭ دەرەگىنشە، اتالعان جارتىلاي مارافونعا شينجاڭنىڭ توعىزتاراۋ اۋدانىنان كەلگەن سپورتشى قانداسىمىز باعدار ورازالى ۇلى قاتىسقان. ب. ورازالى ۇلى 1 ساعات 6 مينۋت 8 سەكۋندتىق ناتيجەمەن ەرلەر اراسىندا وتكەن جارتىلاي مارافوندا باس جۇلدەنى جەڭىپ العان.
اتا ءداستۇردى ارداقتاعان - ايناگۇل ايىپقان قىزى - Janadauir.com
وسى اپتادا موڭعولياداعى «جاڭا ءداۋىر» سايتى «كاسىبىم- نەسىبەم» ايدارى بويىنشا كەزەكتى سانىن موڭعوليا ساۋدا پالاتاسىنىڭ جانىنداعى «كاسىپكەر ايەلدەر ۇيىمىنىڭ» ءتورايىمى، «پامۋكالە» رەستورانىنىڭ ديرەكتورى ايناگۇل ايىپقان قىزىنا ارناعان. ونىڭ كاسىپپەن اينالىسقانىنا ياعني «پامۋكالە» كومپانياسىن ورناتقاننان بەرى 20 جىل ۋاقىت بولعان ەكەن. قانداسىمىز العاش مەيرامحانا اشىپ كاسىپكەرلىكتى باستاعان كەزدە ءبىرشاما قيىندىقتار كەزدەسكەنىن ايتادى.
«جاڭا ءداۋىر» سايتىنىڭ دەرەگىنشە، ول تەك كاسىپپەن عانا اينالىسىپ قويماي، قوعامدىق الەۋمەتتىك جۇمىستارعا بەلسەنە ارالاسىپ، ۇلتتىق سالت-ءداستۇرىمىزدى دارىپتەۋدە وزىندىك ۇلەس قوسىپ جۇرگەن قاراگوزدەرىمىزدىڭ ءبىرى. ايناگۇل مەن جارى ابدۋللۋھ ءۇش جىل قاتارىنان ءوز مەنشىكتەرىندەگى «پاككالە» دەمالىس ورنىندا «كوشپەندىلەر فەستيۆالىن» ۇيىمداستىرعان. بۇل فەستيۆالگە كەتەتىن بۇكىل قارجىنى كاسىپكەرلەر ءوز موينىنا العان. بۇدان تىس جۇمىسسىز انالار مەن مۇمكىندىگى شەكتەۋلى ازاماتتارعا دا بارىنشا قولداۋلار كورسەتىپ كەلەدى ەكەن.
ول ۇيىمداستىرعان فەستيۆالگە حالىق وتە بەلسەندى قاتىسقان. بۇركىتشىلەر سايىسىنا 40 تان استام بۇركىتشى قاتىسقان. كاسىپكەر تەك جۇلدەگەرلەردى عانا ماراپاتتاماي، بارلىق بۇركىتشىلەرگە اقشالاي سىيلىقتار ۇسىنعان. سونداي-اق، 40 تان استام كەستەشىلەر قاتىسقان بايقاۋدا بۇگىنگى كەيىپكەرىمىزدىڭ ءوزى امانگۇل ءبىرىنشى ورىندى ەنشىلەگەن ەكەن.
ايتا كەتەيىك، ايناگۇل ايىپقان قىزى دەمەۋشى بولعان بۇل فەستيۆالدە «اسىق اتۋ»، «قۇس قاعۋدان»، «ات ۇستىندە ساداق اتۋ»، «جامبى اتۋ» ويىنى، سونىمەن قاتار قازاقتىڭ ۇلتتىق ويىنى «قىز قۋۋ» قاتارلى ءارتۇرلى ۇلتتىق ويىندار ويناتىلعان.
قازاقستاندىق ستۋدەنتتەر قازاق مادەنيەتىن تانىستىردى - TRT
تۇركيانىڭ كارابۇك ۋنيۆەرسيتەتىندە قازاقستاندىق ستۋدەنتتەردىڭ ۇيىمداستىرۋىمەن «قازاقستان ستۋدەنتتەرىنىڭ ءىس-شاراسى» ءوتتى. شارا بارىسىندا قازاقستاندىق ستۋدەنتتەر قازاقستاندى جان-جاقتى تانىستىردى.
بۇل تۋرالى تۇركيا راديو تەلەۆيزيا پورتالى حابارلادى.
ءىس-شاراعا كارابۇك ۋنيۆەرسيتەتى پرورەكتورى يسمايل راكيپ كاراش، ۋنيۆەرسيتەت باس حاتشىسى لۇتفيۋ كوم، رەكتوردىڭ كەڭەسشىسى نيحات يىلماز، اكادەميكتەر مەن ستۋدەنتتەر قاتىسقان.
تۇركيالىق ب ا ق-تىڭ مالىمەتىنشە، باعدارلاماعا قاتىسقانىنا قۋانىشتى ەكەندەرىن بىلدىرگەن پرورەكتور كاراش قازاقستاننىڭ تۇركيا رەسپۋبليكاسى مەن كارابۇك ۋنيۆەرسيتەتى ءۇشىن ورنى ەرەكشە ەكەنىن ايتتى.
«ۋنيۆەرسيتەتىمىزدە بولۋىڭىز وتە ماڭىزدى. قازىرگى ۋاقىتتا ءبىزدىڭ قازاقستاندىق ستۋدەنتتەر سانى 600 دەن استى. شەتەلدىك ستۋدەنتتەر اراسىندا ءتورتىنشى ورىندا تۇر. بۇل - ءبىز ءۇشىن ماقتانىش»، - دەيدى قازاقستان مەن تۇركيا اراسىنداعى تاريحي بىرلىككە توقتالعان كاراش.
قازاقستاندىق ستۋدەنتتەر شارا بارىسىندا قازاقستاندى جان-جاقتى تانىستىردى. سونىمەن قاتار دومبىرانىڭ سۇيەمەلدەۋىمەن ءان شىرقاپ، ولەڭ وقىعان.
سونداي-اق وسى اپتادا «TRT»-دا «قوجا احمەت ياساۋيدى ەسكە الدى» دەگەن تاقىرىپتاعى اقپارات جارىق كوردى.
اتالعان ب ا ق-تىڭ مالىمەتىنشە، قوجا احمەت ياساۋي اتىنداعى حالىقارالىق تۇرىك- قازاق ۋنيۆەرسيتەتىندە «عاسىر داناسى - قوجا احمەت ياساۋي» اتتى حالىقارالىق كونفەرەنتسيا ءوتتى. كونفەرەنتسياعا قازاقستاننىڭ 13 وبلىسىنان 140 مۇعالىم قاتىستى.
سونىمەن قاتار يران، وزبەكستان، قىرعىزستان جانە اۋعانستان ەلدەرىنەن ياساۋي مۇراسىن زەرتتەيتىن بەلگىلى عالىمدار كەلگەن.
ۋنيۆەرسيتەتتىڭ پرورەكتورى پروفەسسور دوكتور پەيامي باتتالدىڭ ايتۋىنشا، احمەت ءياساۋيدىڭ ءىلىمى مەن فيلوسوفياسىن ناسيحاتتاۋ جانە دامىتۋ ءۇشىن ۋنيۆەرسيتەتتە قازىردىڭ وزىندە ارنايى ينستيتۋت قۇرىلعان. قازىرگى ۋاقىتتا تۇركيانىڭ ءارتۇرلى ج و و-دا وسى ينستيتۋتتىڭ فيليالدارىن اشۋعا تىرىسىپ جاتىر ەكەن.
قازاقتىڭ ءداستۇرلى تاعامدارى، قولونەر مادەنيەتى، ۇلتتىق ونىمدەر كەلۋشىلەردى تاڭعالدىردى - «حالىق گازەتى»
بەيجىڭدە 28-30-ناۋرىز كۇندەرى «2024 قىتايداعى قازاقستان تۋريزم جىلىنىڭ» اشىلۋىنا بايلانىستى ءبىرقاتار ءىس-شارالار ءوتتى. اتاپ ايتار بولساق، 28-ناۋرىزدا قازاق مادەنيەتىن جانە قازاقستاننىڭ ءار ءوڭىرىنىڭ وزىندىك ەرەكشەلىگىن ايقىندايتىن ءتۇرلى كورمەلەر ۇيىمداستىرىلدى. ۇلتتىق ۇلگىدەگى كيىم، قازاقتىڭ ءداستۇرلى تاعامدارى، قولەنەر مادەنيەتى، ۇلتتىق ونىمدەر كەلۋشىلەردى تاڭعالدىرۋمەن بولدى، دەپ حابارلايدى قىتايدىڭ «حالىق گازەتى».
اتالعان باسىلىمنىڭ دەرەگىنشە، 29-ناۋرىز كۇنى كەشتە وتكەن «2024 قىتايداعى قازاقستان تۋريزم جىلىنىڭ» اشىلۋ سالتاناتىندا قازاقستاننىڭ اباي اتىنداعى قازاق مەملەكەتتىك اكادەميالىق وپەرا جانە بالەت تەاترى مەن ۇلىتاۋ توبى سياقتى تانىمال قازاقستاندىق ونەر مايتالماندارى بىرلەسىپ ونەرلەرىن ۇسىنعان. كونتسەرتتە قىتاي مەن قازاقستاننىڭ حالىق اندەرى، قازاقتىڭ حالىق بيلەرى، مۋزىكاسى، حورى جانە ت. ب. ورىندالدى. باعدارلامالار قىتاي مەن قازاقستاننىڭ ۇلتتىق مۋزىكاسىنىڭ ەرەكشەلىكتەرىن بىرىكتىرىپ، ەكى ەلدىڭ مادەني الماسۋىن ءار قىرىنان كورسەتكەن.
يران مەن قازاقستان دەنساۋلىق ساقتاۋ سالاسىندا ىنتىماقتاستىق كوميتەتىن قۇردى - Parstoday
يراننىڭ دەنساۋلىق ساقتاۋ ءمينيسترى قازاقستانمەن ارادا دەنساۋلىق ساقتاۋ دەڭگەيىن جوعارىلاتۋ ءۇشىن ىنتىماقتاستىق كوميتەتى قۇرىلعانىن حابارلادى.
بۇل تۋرالى يراننىڭ «Parstoday» اقپارات اگەنتتىگى دە حابارلادى.
يراندىق ب ا ق-تىڭ كەلتىرگەن مالىمەتىنشە، باحرام ەينۋللاحي قازاقستاندا شانحاي ىنتىماقتاستىق ۇيىمىنا مۇشە ەلدەردىڭ دەنساۋلىق ساقتاۋ مينيسترلەرىنىڭ وتىرىسى اياسىندا يراننان قازاقستانعا ءدارى-دارمەك پەن مەديتسينالىق جابدىقتار ەكسپورتتاۋ كولەمىنىڭ ارتقانىنا توقتالعان.
قازاقستاندىق ستۋدەنتتەر وزبەكستاندا تاجىريبە الماسادى - «ءوز ا»
استانا قالاسىنداعى «Maqsut Narikbayev University» (MNU) ستۋدەنتتەرى تاريح پانىنەن بىلىمدەرىن جەتىلدىرۋ ماقساتىندا ۇيىمداستىرىلعان «جىبەك جولىنىڭ سوقپاقتارى» جوباسى نەگىزىندە وزبەكستانعا ەكسكۋرسياعا كەلدى.
بۇل تۋرالى وسى اپتادا وزبەكستاندىق «ءوز ا» اقپاراتتىق اگەنتتىگى حابارلادى.
اتالعان ب ا ق-تىڭ دەرەگىنشە، جوبانىڭ ماقساتى - تاجىريبە الماسۋ، ستۋدەنتتەردىڭ ۋنيۆەرسيتەتتە العان تەوريالىق بىلىمدەرىن كونە قالالارعا ەكسكۋرسيا ۇيىمداستىرۋ ارقىلى بىلىكتىلىگىن ارتتىرۋ.
قازاقستان جاستارىنىڭ وزبەكستانعا ساپارى تاشكەنت مەملەكەتتىك زاڭ ۋنيۆەرسيتەتىنەن باستالعان.
«ستۋدەنتتەر تاشكەنت پەن سامارقاندتاعى تاريحي ورىنداردى دا تاماشالايدى. ولار وزبەك پەن قازاق حالىقتارىنىڭ تاريحىنان سىر شەرتەتىن كونە عيماراتتاردا اتا- بابا مۇراسىمەن تانىسادى. MNU مەن تدۋۋ اراسىنداعى كەلىسىم- شارتقا سايكەس قوس ديپلوم باعدارلاماسى جۇزەگە اسىرىلادى جانە بيىلعى جىلى العاشقى تۇلەكتەر ديپلوم الادى» ، دەپ جازادى «ءوز ا» اقپاراتتىق اگەنتتىگى.
سونداي-اق وسى اپتادا «ءوز ا»-دا «جىل باسىنان بەرى وزبەكستانعا قانشا ەلەكتروموبيل اكەلگەنى بەلگىلى بولدى» دەگەن تاقىرىپتاعى اقپارات جاريالاندى.
اتالعان باسىلىمنىڭ كەلتىرگەن مالىمەنە سۇيەنسەك، وزبەكستانعا كەيىنگى ەكى ايدا 3502 ەلەكتروموبيل اكەلىنگەن. ولاردىڭ باسىم بولىگى قىتايدان يمپورتتالعان.
ستاتيستيكا اگەنتتىگىنىڭ الدىن الا مالىمەتى بويىنشا، وزبەكستان 2024 -جىلدىڭ قاڭتار- اقپان ايلارىندا شەتەلدەن جالپى قۇنى 85,7 ميلليون ا ق ش دوللارىن قۇرايتىن 3502 ەلەكتروموبيل جەتكىزىلگەن.
وتكەن جىلدىڭ سايكەس كەزەڭىمەن سالىستىرعاندا ەلەكتروموبيلدەر يمپورتى 2663 داناعا نەمەسە 4 ەسەگە ءوسىپتى. وزبەكستان 2 ايدا الەمنىڭ 7 ەلىنەن ەلەكتروموبيل يمپورتتاعان.
اۆتور
بەيسەن سۇلتان ۇلى
