اسىراپ العان بالالارىنا ءيت-مىسىقتىڭ ەتىن جەگىزگەن ەمشى تۋرالى تىڭ دەرەك شىقتى
شىمكەنت. KAZINFORM - شىمكەنتتە اسىراندى بالالارىن جۇمىسقا جەگىپ، ابدەن قورلادى دەگەن ەر كىسى تۋرالى تىڭ دەرەكتەر تارادى.
ەسكە سالا كەتەيىك، ءبىز كەشە شىمكەنتتە جەرگىلىكتى تانىمال ەمشىنىڭ 6 بالانى اسىراپ الىپ، ءۇش جىلدان بەرى ازاپتاپ كەلگەنىن حابارلاعان ەدىك.
بالا قۇقىقتارى جونىندەگى ۋاكىلدىڭ شىمكەنت قالاسى بويىنشا وكىلى جاننەتا جازىقبايەۆا قوعامدىق رەزونانس تۋدىرعان وقيعاعا قاتىستى ايتىلماعان مالىمەتتەردى ءبولىستى.
ەر كىسى 2021 -جىلى ايەلىمەن بىرگە التى بالانى اسىراپ العان. ءوز پەرزەنتى بولماعان.
ەڭ ۇلكەنىن - شىمكەنتتەگى، قالعانىن - استانا، الماتى جانە وسكەمەن قالالارىنداعى بالالار ۇيىنەن قامقورلىعىنا العان.
التى بالانىڭ ەكەۋى ەگىز، قالعانى ءتورت ءتۇرلى وتباسىنان شىققان.
شىمكەنتتەگى بالالار ءۇيىنىڭ تاربيەلەنۋشىسى بولعان ەر بالا - ءۇيدىڭ ۇلكەنى، قازىر جاسى 16-دا. قالعاندارى - 2009، 2021، 2020 -جىلى تۋعاندار.
بالا قۇقىقتارى جونىندەگى ۋاكىلدىڭ قالالىق وكىلىنە شىمكەنتتەگى بالالار ءۇيىنىڭ ديرەكتورى حابارلاسقان.
ايتۋىنشا، بۇرىنعى تاربيەلەنۋشى بىرنەشە ايدان بەرى قورلىق كورىپ وتىرعانىن ايتىپ اراشا سۇراعان. بۇل جاعدايدى ەستي سالا ديرەكتور قالالىق ءبىلىم باسقارماسىنا حابار بەرىپتى.
جاننەتا جازىقبايەۆانىڭ ايتۋىنشا، باسقارماداعى قورعانشىلىق قىزمەتى ماماندارىنىڭ ۋاقىتى بولماعاندىقتان اراشا تۇسەتىن ادام تابىلماپتى.
اقپان ايىندا ادام شوشىرلىق حاباردى الا سالىسىمەن جاننەتا جازىقبايەۆا ءبىلىم باسقارماسىنا حابارلاسىپ، مەكتەپ ديرەكتورىمەن بايلانىسقان.
كامەلەتكە تولماعاندار ىستەرى جونىندەگى ينسپەكتورعا حابار بەرگەن. ارنايى كوميسسيا قۇرىلىپ، ءبارى بالالار تۇرىپ جاتقان ۇيگە بارعان.
«بۇل وتباسىنىڭ ۇلكەن ءۇيى بار، ءبىراق ونى تەك كوميسسيا ءۇشىن جاساپ قويعان سياقتى. بالكىم كومىر، گاز، ەلەكتر جارىعىن ۇنەمدەدى مە؟ ول جاعىن بىلمەدىم. وزدەرى ءۇش بولمەلى «ۆرەميانكادا» تۇرادى. انا ءۇيدىڭ ىشىنە كىرسەڭىز، شوشىپ كەتەسىز. قابىرعالارىنا تۇگەل ءارۋاقتاردىڭ سۋرەتىن ءىلىپ تاستاعان. بالالاردى اسىراپ العان كىسى ەمشى ەكەن. تاعى ءبىر «ۆرەميانكاسىندا» الگى ەمشى سوناۋ 80 -جىلدارى قايتىس بولعان اناسىنا ەسكەرتكىش قويىپ، اينالاسىنا سۇيەكتەر مەن بەيمالىم شوپتەردى تاستاعان. ءۇي ىشىندە اڭ مۇيىزدەرىنەن كوز سۇرىنەدى. كەيىن سارايعا كىردىك. ول جاققا ءۇش مىسىقتى بايلاپ قويىپتى. ءيت بايلاسا، ءبىر ءسارى. قاتتى تاڭ قالدىق. ساراي ءىشى ىبىرسىپ جاتىر. بارلىعىن ۆيدەوعا ءتۇسىرىپ الدىق»، - دەيدى جاننەتا جازىقبايەۆا.
ارنايى كوميسسيا بارعاندا ۇيدە ەر كىسى مەن اراشا سۇراعان جاس ءوسپىرىم بولماعان.
كەيىن ولار كەلگەندە جاننەتا جازىقبايەۆا بالانى كورىپ، قايران قالعانىن ايتادى.
«جاس بالانىڭ الاقانىن كورسەڭىز، ەرەسەك كىسىنىڭ الاقانى سياقتى. ابدەن قارا جۇمىسقا جەگىلگەن. مەن بىردەن كيىمىن شەشكىزىپ، ءۇستى- باسىن قارادىق. كىر-قوجالاق، جۋىنباعانىنا التى ايداي بولعان شىعار. ۇستىنە كيىپ العان توقىلعان اق جەمپىرى جۋىلماعاننان سۇپ-سۇر بوپ كەتكەن. دەنەسى كوگەرگەن، كىسەنمەن ۇرعان تىرتىق ىزدەرىن بايقادىق. كيىمدەرى وتە ەسكى. باسقا بالالاردىڭ دا ءۇستى-باسى كىر-قوجالاق. 5-6 اي جۋىنباعان سوڭ دەنەسى قىشيدى عوي. ابدەن قاسىعان، سونىڭ ىزدەرىن كوردىك. كۇركىلدەپ جوتەلىپ وتىر. كىشكەنتاي بالالاردىڭ ءتىلى ءالى شىقپاعان. سويلەي المايدى. ابدەن پسيحولوگيالىق قىسىم كورگەن. التى بالانىڭ ىشىندە تەك ءبىر قىزعا ەرەكشە كۇتىممەن قاراپ كەلگەن. بار جىلى-جۇمساقتى سوعان بەرگەن. ال قالعاندارىن ادام قۇرلى كورمەگەن»، - دەدى جاننەتا جازىقبايەۆا.
ارنايى كوميسسيا توڭازىتقىشتا بالا جەيتىن اس تابىلماعانىن، ءتىپتى قورا-قورا مالى بار وتباسىندا ايران-ءسۇت بولماعانىن انىقتاعان.
ال بالالار كيىمدەرىنە دەپ ارنالعان شكاف ءىشى ىدىس-اياققا تولى بوپ شىققان. ۇلكەن بالانىڭ ايتۋىنشا، ولارعا يت پەن مىسىق سويىپ، ەتىن جەگىزگەن.
ۇيدەگى كىشكەنە پەش جانىنان وراۋلى جىپتەر تابىلعان. جاس ءوسپىرىمنىڭ ايتۋىنشا، ەمشى بالالار تۇندە ۇيىقتاعاندا ءۇستىن قاسىماسىن دەپ اياق-قولدارىن بايلاپ تاستايدى ەكەن.
كوميسسيا مەن پوليتسيا كوزىنشە ەر كىسى الگى ءجىپتى دەرەۋ پەشكە سالىپ جىبەرگەن.
جاس ءوسپىرىمنىڭ كوميسسيا مۇشەلەرىنە ايتقانىنا قاراعاندا، وسى ۇيگە كەلگەندە ارادا ءبىر اي وتكەندە ەمشى ونى سۇندەتكە وتىرعىزىپ، ءزارىن ىشكىزگەن.
ءالى ەسىن بىلمەيتىن كىشكەنتاي بالالاردا جورگەك دەگەن مۇلدەم بولماعان. دارەت جىبەرىپ، ءبۇلدىرىپ قويسا، «جەڭدەر» دەپ ءناجىسىن بەتىنە جاعىپ قورلاعان ەكەن.
بۇدان وزگە قوراداعى ءتورت تۇلىككە جەم بەرۋ، قورا تازالاۋ جاس ءوسپىرىمنىڭ موينىنا جۇكتەلگەن.
ول كۇن سايىن تاڭعى ساعات 4 تە تۇرۋعا ءماجبۇر بولعان. قارنى اش، ۇيقىسى قانباعان وقۋشى ساباق ۇستىندە ۇنەمى ۇيىقتاپ وتىرعان.
كيىمى جىرتىق، ءۇستى-باسى كىر، دەنەسى كوگەرگەن بالانى كورگەن پەداگوگتەردىڭ نەگە ءۇنسىز قالعانى بەلگىسىز.
جاننەتا جازىقبايەۆا ۇستازدار بالالاردى اسىراپ العان ەمشىدەن قورىققان دەپ وتىر.
«بالالاردىڭ نە جەيتىن تاماعى، نە كيەتىن كيىمى جوق. ءتىپتى جاتىن ورنى دا ساي ەمەس دەپ دەرەۋ اكت تولتىردىق. بالالاردى الىپ كەتتىك. تورتەۋىن سابيلەر ۇيىنە، ەكەۋىن كامەلەتكە تولماعانداردى بەيىمدەۋ ورتالىعىنا ورنالاستىردىق. بالالاردى اكەتىپ بارا جاتقان الگى كىسى تىم بولماعاندا ءبىر قىزىمدى قالدىرىڭدارشى دەپ ءوتىندى. ول قىز - جاس ءوسپىرىمنىڭ ايتۋىنشا، ەرلى-زايىپتىلار جاقسى قاراپ، بار ءدامدىسىن بەرىپ وتىرعان ءبۇلدىرشىن»، - دەدى جاننەتا جازىقبايەۆا.
ەڭ سوراقىسى، بالالاردى كوميسسيا الىپ كەتكەن كۇنى ەمشى جاننەتا جازىقبايەۆاعا حابارلاسىپ، ماسەلەنى ءوزارا شەشپەك بولىپتى.
«مەنىڭ تەلەفون ءنومىرىمدى كىمنەن العانىن بىلمەيمىن، بالكىم سول پوليتسەيلەر بەرگەن شىعار. تىنىم بولماعان سوڭ ءنومىرىن بۇعاتتاپ تاستادىم»، - دەدى ول.
اتالعان فاكتىلەر فوتو-ۆيدەوعا ءتۇسىرىلىپ، ءىس قۇزىرلى ورگاندارعا وتكەن.
«ماتەريالداردى تاپسىردىق. ءبىر اپتاداي ۋاقىت ءوتتى، پوليتسيا تىم-تىرىس. كەيىن قىلمىستىق كودەكستىڭ 140-بابىمەن (كامەلەتكە تولماعان ادامدى تاربيەلەۋ جونىندەگى مىندەتتەردى ورىنداماۋ) ءىس قوزعادى. بالالار ومبۋدسمەنى دينارا زاكيەۆاعا حابارلاسىپ، بارلىق ءمان-جايدى ايتىپ وتىردىم. ول كىسى باس پروكۋراتۋرا، ءى ءى م-مەن بايلانىسقا شىعىپ، قىلمىستىق كودەكستىڭ 110-بابىمەن (ازاپتاۋ) ءىس قوزعالدى. كىم بىلەدى، ايتپەسە سوزىلىپ جۇرە بەرەر مە ەدى؟.. ەر كىسى ەكى ايعا قاماۋعا الىندى. ناۋرىز، ساۋىردە قاماۋدا بولىپتى. ەستىپ جاتىرمىن، مامىر ايىندا شىعىپ، الماتىداعى پسيحديسپانسەرگە جاتىپتى. اۋىتقۋى بار دەگەن دياگنوزدى قالپىنا كەلتىرمەكشى شىعار. شىنىمەن اۋىتقۋى بار ما، جوق پا؟ ەگەر بولسا، بالا اسىراپ الۋعا كىم رۇقسات بەردى؟ وعان ءتيىستى ورگاندار وزدەرى جاۋاپ بەرسىن. ءبىراق پوليتسيا جاۋاپ الۋ كەزىندە ونىڭ ءىنىسى ول 10 جىل بۇرىن ادام ەمدەپ وتىرىپ، ءبىر ايەلدى ءولتىرىپ العانىن ايتتى. سول كەزدە پسيحولوگيالىق اۋىتقۋى بار دەگەن انىقتامامەن جازادان قۇتىلعان ەكەن»، - دەيدى جاننەتا جازىقبايەۆا.
ومبۋدسمەننىڭ قالالىق وكىلى قازىر بالالاردىڭ جاعدايى جاقسى ەكەنىن، ولارمەن پسيحولوگتار جۇمىس ىستەپ جاتقانىن ايتتى.
ۇلكەنى بالالار ۇيىنە قايتا ورالعىسى كەلىپ وتىر. ءبىراق بالالاردىڭ الداعى تاعدىرىن سوت شەشەدى.
قازىرگى قىلمىستىق ءىستى تەرگەۋ اياقتالىپ، سوتقا جولداندى.
اۆتور
جانسايا تاۋەكەل قىزى
