استىق پەن ۇن ەكسپورتىنىڭ كولەمى جىلدان جىلعا ءوسىپ كەلەدى

ق ر اۋىل شارۋاشىلىعى مينيسترلىگى باسپا ءسوز قىزمەتىنىڭ حابارلاۋىنشا، ەكسپورت كولەمىنىڭ ءوسۋى ءداستۇرلى وتكىزۋ نارىقتارىنداعى اۋىل شارۋاشىلىعى ونىمدەرىنە دەگەن تۇراقتى سۇرانىسقا، سونداي- اق ءتيىمدى لوگيستيكا مەن سالانى مەملەكەتتىك قولداۋ شارالارىنا بايلانىستى.

نەگىزگى باعىتتار بويىنشا جەتكىزىلىمدەردىڭ ايتارلىقتاي ءوسۋى بايقالادى.

اتاپ ايتقاندا، وزبەكستانعا استىق ەكسپورتى 13,8 پايىزعا ءوسىپ، 8,2 ميلليون توننادان 9,3 ميلليون تونناعا جەتتى. قىرعىزستانعا ەكسپورت 1,6 ەسەگە ارتىپ، 278 مىڭ توننادان 440 مىڭ تونناعا دەيىن ۇلعايدى. اۋعانستانعا جەتكىزىلىمدەر 51 پايىزعا ءوسىپ، 1,2 ميلليون توننادان 1,8 ميلليون تونناعا جەتتى. تۇرىكمەنستانعا ەكسپورت 1,5 ەسەگە ارتىپ، 123 مىڭ توننادان 183 مىڭ تونناعا دەيىن كوبەيدى.

- وڭ ديناميكا قازاقستاندىق استىقتىڭ سىرتقى نارىقتارداعى جوعارى باسەكەگە قابىلەتتىلىگىن جانە ەلدىڭ وڭىردەگى اۋىل شارۋاشىلىعى ونىمدەرىنىڭ جەتەكشى ەكسپورتتاۋشىلارىنىڭ ءبىرى رەتىندەگى پوزيتسياسىنىڭ نىعايۋىن كورسەتەدى، - دەلىنگەن حابارلامادا.

جەتكىزىلىم گەوگرافياسىن كەڭەيتۋ، كولىك-لوگيستيكالىق ينفراقۇرىلىمدى دامىتۋ جانە ءونىمنىڭ قوسىلعان قۇنىن ارتتىرۋ بويىنشا جۇمىستار ءجۇرىپ جاتىر.