استانانىڭ ءار اۋدانى ناۋرىز ناقىشتارىمەن ارلەنەدى

استانا. KAZINFORM - بيىل ءاز-ناۋرىزدا ەلوردا اكىمدىگى قالانىڭ بارلىق اۋدانىندا ءتۇرلى مەرەكەلىك ءىس-شارالاردى قىزىقتى ەتىپ وتكىزۋدى كوزدەپ وتىر.

ورتالىق كوممۋنيكاتسيالار قىزمەتىندە وتكەن بريفينگىدە استانا قالاسى مادەنيەت باسقارما باسشىسىنىڭ ورىنباسارى نۇران كامزين ناۋرىزدى تويلاۋ جوسپارىمەن ءبولىستى.

ونىڭ ايتۋىنشا، «ەكسپو» حالىقارالىق كورمە ورتالىعىندا وتاندىق جانە شەتەلدىك قولونەرشىلەردىڭ قاتىسۋىمەن «كوشپەلى وركەنيەت» فەستيۆالى وتەدى. بۇگىندە مەرەكەلەۋ تۇجىرىمداماسى ازىرلەنىپ، ساحنالىق الاڭدار دايىندالىپ جاتىر.

«21-22- ناۋرىز 11:00 دەن 16:00 گە دەيىن ەلوردامىزدىڭ ورتالىق الاڭىندا، «قازاق ەلى» مونۋمەنتى، «بايتەرەك» مونۋمەنتىنىڭ جانىنداعى الاڭدا، ەلوردالىق ساياباق پەن EXPO الاڭىنىڭ اۋماعىندا قازاقستاندىق ەسترادا جۇلدىزدارىنىڭ قاتىسۋىمەن نەگىزگى مەرەكەلىك كونسەرتتەر وتكىزۋ جوسپارلانىپ وتىر. سونىمەن قاتار، قالانىڭ 5 اۋدانىندا 30 دان استام مەرەكەلىك كونسەرت وتەدى. 21-22- ناۋرىز كۇندەرى ساعات 12:00 دەن باستاپ الماتى اۋدانىنىڭ 12 تۇرعىن ءۇي الابىندا جانە بايقوڭىر اۋدانىندا 8 تۇرعىن الابىندا، سارىارقا اۋدانىنىڭ 4 الاڭىندا، ەسىل اۋدانىندا 4 الاڭ، سونىمەن قاتار نۇرا اۋدانىندا 4 الاڭدا مەرەكەلىك شارالار وتەدى»، - دەدى سپيكەر.

14- ناۋرىزدا ساعات 19:00 دە ەركەعالي راحماديەۆ اتىنداعى مەملەكەتتىك اكادەميالىق فيلارمونياسىنىڭ كامەرالىق حورى «تال بەسىكتەن - جەر بەسىككە…» اتتى تەاترلاندىرىلعان قويىلىمىن ۇسىنادى. ءىس-شارا «استانا وپەرا» تەاترىنىڭ كۇلاش بايسەيىتوۆا اتىنداعى كامەرالىق زالىندا وتەدى. بۇل ءىس-شارا - قازاقتىڭ ءداستۇرلى ادەت-عۇرىپتارىنا نەگىزدەلگەن حور قويىلىمى. 15-ناۋرىز كۇنى ساعات 19:00 دە ەركەعالي راحماديەۆ اتىنداعى مەملەكەتتىك اكادەميالىق فيلارمونياسىندا «ناۋرىز ايى تۋعاندا» مەرەكەلىك تەاترلاندىرىلعان كونسەرت جوسپارلانعان.

«ۇلتتىق قۇندىلىقتارىمىزدى ناسيحاتتاپ، ەل ىشىندە كەڭىنەن تاراتىپ، دارىپتەۋ ماقساتىمەن وتەتىن مەرەكەلىك باعدارلامادا - بەسىك جىرىنان باستاپ سالت-ءداستۇر اندەرى، حالىقتىق جانە قازاقستان كومپوزيتورلارىنىڭ ۇلتتىق ناقىشتاعى اندەرى، ۇلتتىق بيلەرى ورىندالادى»، - دەدى نۇران كامزين.

17- ناۋرىزدا «بايتەرەك» مونۋمەنتىنىڭ الاڭىندا ۇلتتىق كيىم كيگەن جاستاردىڭ نەكە قيۋ سالتاناتى وتكىزىلەدى. ال، اقساقالدار مەن كوپبالالى انالار «ناۋرىز باتا» بەرەدى دەپ جوسپارلانعان. 19- ناۋرىز كۇنى ساعات 16:00 دە بەيبىتشىلىك جانە كەلىسىم سارايىندا «ناۋرىز ۇلتتىق سىيلىعىنىڭ» ماراپاتتاۋ ءراسىمى وتەدى. ۇلتتىق ونەر مەن ءداستۇردى ناسيحاتتاۋعا ارنالعان «ناۋرىز» ۇلتتىق سىيلىعى بيىل 9 اتالىم بويىنشا تابىستالادى. 20- ناۋرىزدا «ارعىماق» سپورت كەشەنىندە ۇلتتىق سپورت تۇرلەرىنەن جارىس ۇيىمداستىرىلماق.

«21-24 جانە 29-31- ناۋرىز ارالىعىندا قۋىرشاق تەاترىندا «ناۋرىز-دۋمان» قۋىرشاقتار شوۋى وتەدى. سونداي-اق 14- ناۋرىز كورىسى كۇنى - امال مەرەكەسىنەن باستاۋ الىپ ءاربىر كۇننىڭ تاقىرىپتىق ءىس-شارالارمەن تولىقتىرىلادى. ناۋرىز مەيرامىن مەرەكەلەۋ اياسىندا بارلىق الاڭدا كيىز ۇيلەر تىگىلىپ، التىباقاندار ورناتىلادى. سونىمەن قاتار ۇلتتىق سپورت ويىندارى وتكىزىلەدى»، - دەپ حابارلادى استانا قالاسى مادەنيەت باسقارما باسشىسىنىڭ ورىنباسارى.