استاناداعى ەسكى ۆوكزال قايتا جوندەۋدەن كەيىن قاشان اشىلادى
استانا. KAZINFORM - كولىك مينيسترلىگى «استانا-1» تەمىرجول ۆوكزالىن قايتا جاڭعىرتۋ جۇمىستارىنا قاتىستى تۇسىنىك بەردى.
ونىڭ ورتاشا تاۋلىكتىك جولاۋشىلار تاسىمالى 10 مىڭ ادامنان اسادى.
جوندەۋ جۇمىستارى بيىل 14-ساۋىردە باستالدى. جوبانى كولىك مينيسترلىگى استانا اكىمدىگى جانە «قازاقستان تەمىر جولى» ۇ ك» ا ق بىرلەسىپ جۇزەگە اسىرىپ جاتىر. مەردىگەر - Capital Road Construction ج ش س.
قۇرىلىسشىلار ۆوكزالدىڭ ىشىندەگى نىسانداردى تۇگەل بۇزىپ تاستاعان، ياعني عيماراتتىڭ قابىرعالارى مەن بەتون قاڭقاسى قالدى. تەحنيكالىق زەرتتەۋدەن كەيىن بولشەكتەۋ جۇمىستارى جۇرگىزىلىپ، ماماندار جوبالىق قۇجاتتامانى ازىرلەۋگە كىرىستى.
ۆوكزال قالىپتى رەجيمدە جۇمىسىن جالعاستىرىپ جاتىر. وسى ورايدا قىزمەت كورسەتۋ پەرسونالى مەن جولاۋشىلارعا ارنالعان نىساندار بۇرىنعى تاريحي عيماراتقا ۋاقىتشا كوشىرىلدى.
«ۆوكزالدى قايتا قۇرۋ جانە جاڭعىرتۋ جۇمىستارى وسى جىلدىڭ سوڭىنا دەيىن اياقتالادى دەپ جوسپارلانعان»، - دەلىنگەن كولىك مينيسترلىگى مالىمەتىندە.
ۆەدومستۆو اقپاراتىنا قاراعاندا، جوبانىڭ تۇپكىلىكتى قۇنى جوبالىق-سمەتالىق قۇجاتتاما (ج س ق) نەگىزىندە ساراپتاما جۇرگىزىلگەننەن كەيىن انىقتالادى. جۇمىس كولەمى دە عيماراتتى تەحنيكالىق تەكسەرۋ ناتيجەلەرى مەن ساراپتامالىق قورىتىندىلار نەگىزىندە انىقتالادى.
بيۋدجەتى مەن قارجىلاندىرۋ كوزدەرىن نىساننىڭ تاپسىرۋشىسى رەتىندە «قازاقستان تەمىر جولى» ۇ ك» ا ق انىقتايدى.
وسى جۇمىستار اياسىندا عيماراتتىڭ شاتىرى، قاسبەتى، ىشكى نىساندار، جولاۋشىلار پلاتفورمالارى مەن قۇرىلىمدار جوندەلەدى. جۇمىسشىلار حابارلاۋ جۇيەلەرىن، بەينەباقىلاۋ، دابىل جۇيەلەرىن جاڭارتىپ، ينجەنەرلىك جەلىلەردى اۋىستىرىپ، ۆوكزال ماڭىن كوركەيتەدى.
ايتا كەتەيىك، بۇعان دەيىن الماتىدا جاڭا «الماتى-3» تەمىرجول ۆوكزالىن سالۋ جوباسى بويىنشا جۇمىستار جالعاسىپ جاتقانىن جازعان ەدىك.
