استاناداعى «جايلى مەكتەپتەردىڭ» كوبى سول جاعالاۋدا سالىنادى
استانا. KAZINFORM - ەلورداداعى «جايلى مەكتەپ» جوباسى بويىنشا سالىناتىن مەكتەپتەردىڭ باسىم بولىگى ەسىل جانە نۇرا اۋداندارىندا بوي كوتەرەدى.
«وقۋشى ورىندارىنىڭ تاپشىلىعى ماسەلەسىن شەشۋ ءۇشىن وتكەن جىلى 12 مەكتەپ سالىندى. قازىرگى تاڭدا ەكى اۋىسىمدا 102 مىڭ وقۋشى ورنىنا ارنالعان 34 مەكتەپتىڭ قۇرىلىسى ءجۇرىپ جاتىر. ونىڭ 27 ءسى (ەكى اۋىسىمدا 74 مىڭ ورىن) جىلدىڭ سوڭىنا دەيىن پايدالانۋعا بەرىلەدى. ونىڭ ىشىندە 3 مەكتەپ - جەكەمەنشىك، 7 مەكتەپ - مەملەكەتتىك جانە 17 ءبىلىم ورداسى «جايلى مەكتەپ» جوباسى اياسىندا سالىنىپ جاتىر. اتالمىش مەكتەپتەر بارلىق اۋدانداردى قامتيتىن بولادى. اتاپ ايتساق، ەسىل اۋدانىندا 10 مەكتەپ، نۇرا اۋدانىندا 7 مەكتەپ، بايقوڭىر اۋدانىندا 2 مەكتەپ، الماتى اۋدانىندا 6 مەكتەپ، سارىارقا اۋدانىندا 2 مەكتەپ اشىلادى. 27 مەكتەپتىڭ 17 مەكتەبى قىركۇيەك ايىندا پايدالانۋعا بەرىلەدى دەپ جوسپارلانىپ وتىر. «جايلى مەكتەپ» جوباسى اياسىندا بارلىعى 90 مىڭ وقۋشىعا ارنالعان 24 مەكتەپ سالىنادى. ونىڭ 15 ءى قارقىندى دامىپ كەلە جاتقان ەسىل مەن نۇرا اۋداندارىندا ورنالاسادى»، - دەدى استانا قالاسى ءبىلىم باسقارماسىنىڭ Kazinform ساۋالىنا بەرگەن جاۋابىندا.
جاۋاپتا قازىر قالا بويىنشا 102 مىڭ وقۋشىعا ارنالعان 34 مەكتەپ سالىنىپ جاتقانى ايتىلعان.
«بيىل 27 مەكتەپ پايدالانۋعا بەرىلەدى. استانا قالاسىندا 263 مىڭنان استام وقۋشىنى قامتيتىن 175 ورتا ءبىلىم بەرۋ ۇيىمى بار. ونىڭ ىشىندە 102 مەكتەپ - مەملەكەتتىك، 66 مەكتەپ - جەكەمەنشىك، 7 مەكتەپ - رەسپۋبليكالىق. ورىن تاپشىلىعىنا بايلانىستى قالامىزدا 8 ءۇش اۋىسىمدى جانە بالا سانى شامادان كوپ 16 مەكتەپ جۇمىس ىستەيدى»، - دەپ جازىلعان رەسمي جاۋاپتا.
بۇعان دەيىن استانا قالالىق ءبىلىم باسقارماسىنىڭ باسشىسى قاسىمحان سەنعازيەۆ ەلورداداعى ءۇش اۋىسىمدى ءبىلىم وشاقتارىنىڭ ىشىندە ورىس تىلىندە ءبىلىم بەرەتىن مەكتەپ جوق ەكەنىن ايتقان بولاتىن.
