استانادا تۇرمەدەن بوساتىلعان ازاماتتارعا ءبىرجولعى الەۋمەتتىك كومەك بەرىلەدى

استانا. KAZINFORM - ەلوردادا بوستاندىققا شىققان ازاماتتارعا ءبىرجولعى الەۋمەتتىك كومەك قاراستىرىلعان، دەپ حابارلايدى استانا قالاسىنىڭ جۇمىسپەن قامتۋ جانە الەۋمەتتىك قورعاۋ باسقارماسى.

ۆەدومستۆونىڭ باسپا ءسوز قىزمەتى باس بوستاندىعىنان ايىرۋ ورىندارىنان بوساتىلعان ازاماتتارعا الەۋمەتتىك كومەك كورسەتۋ ءتارتىبى تۋرالى حابارلادى.

- استانا قالاسى ءماسليحاتىنىڭ 2023 -جىلعى 3-قازانداعى № 84/10-VIII شەشىمىمەن بەكىتىلگەن «استانا قالاسىندا الەۋمەتتىك كومەك كورسەتۋ، ونىڭ مولشەرلەرىن بەلگىلەۋ جانە مۇقتاج ازاماتتاردىڭ جەكەلەگەن ساناتتارىن ايقىنداۋ قاعيداسىنا» سايكەس، تۇرمەدەن بوساتىلعان ازاماتتارعا ءبىر رەتتىك الەۋمەتتىك كومەك قاراستىرىلعان. اتاپ ايتقاندا، بوساتىلعانى تۋرالى انىقتاما ۇسىنعان جانە بوساتىلعاننان كەيىن التى ايدان كەشىكتىرمەي ءوتىنىش بىلدىرگەن تۇلعالارعا 15 ايلىق ەسەپتىك كورسەتكىش (ا ە ك) مولشەرىندە قايتا ۇسىنىلمايتىن ءبىرجولعى كومەك بەرىلەدى، - دەلىنگەن باسقارما تاراتقان اقپاراتتا.

بۇل قولداۋ - قوعامعا قايتا بەيىمدەلۋگە كومەكتەسۋگە باعىتتالعان الەۋمەتتىك شارالاردىڭ ءبىرى.

وسىعان دەيىن سوتتالعان زەينەتكەرلەرگە تۇرمەدەگى ۋاقىتىندا زەينەتاقى تولەنبەۋى مۇمكىن ەكەنى ايتىلدى.