استانادا تۇركى مەملەكەتتەرى ۇيىمىنىڭ جاستار ءىسى جانە سپورت مينيسترلەرىنىڭ 8-وتىرىسى ءوتتى
استانا. KAZINFORM - ەلوردادا تۇركى مەملەكەتتەرى ۇيىمىنىڭ جاستار جانە سپورت ماسەلەلەرىنە جاۋاپتى مينيسترلەرىنىڭ 8- وتىرىسى ءوتتى.
ق ر تۋريزم جانە سپورت مينيسترلىگىنىڭ باسپا ءسوز قىزمەتى ءمالىم ەتكەندەي، اتالعان ءىس-شاراعا تۋريزم جانە سپورت ءمينيسترى ەربول مىرزابوسىنوۆ، تۇركى مەملەكەتتەرى ۇيىمىنىڭ باس حاتشىسى كۋبانىچبەك ومۋراليەۆ، ماجارستاننىڭ الماتى قالاسىنداعى باس كونسۋلى سابولچ كاروي سەكە، سونىمەن قاتار ازەربايجان، قىرعىزستان، تۇركيا، وزبەكستان، تۇرىكمەنستاننىڭ سالاعا جاۋاپتى مينيسترلەرى مەن وكىلدەر جانە دۇنيەجۇزىلىك ەتنوسپورت كونفەدەراتسيا پرەزيدەنتى ءبىلال ەردوعان قاتىستى.
جاستار مەن سپورت ماسەلەلەرىنە جاۋاپتى ۆەدومستۆو باسشىلارىنىڭ ءداستۇرلى كەزدەسۋىندە سپورت سالاسىنداعى ىنتىماقتاستىقتى ودان ءارى نىعايتۋعا، سونداي-اق جاستار ساياساتى مەن سپورت سالاسىنداعى جاڭا جوبالاردى دايىنداۋعا نەگىز بولاتىن پىكىرلەر مەن تاجىريبەلەرىن ورتاعا سالدى.
تۋريزم جانە سپورت ءمينيسترى ەربول مىرزابوسىنوۆ قازاقستان تۇركى مەملەكەتتەرى ۇيىمى شەڭبەرىندە جان-جاقتى ءوزارا ءىس-قيمىلدى دامىتۋعا ەرەكشە ءمان بەرەتىنىن، ۇيىمنىڭ كەڭىستىگىندەگى ىنتىماقتاستىقتى ودان ءارى نىعايتۋ جانە تەرەڭدەتۋ ماقساتىندا ءبىز تۇركى حالىقتارىن جاقىنداستىرۋعا باعىتتالعان باستامالاردى جان-جاقتى قولدايتىنىن جەتكىزدى.
«بىزدە سپورتتىق الەۋەتتى كۇشەيتۋ ءۇشىن كوپتەگەن جاڭا مۇمكىندىك بار. سوڭعى جىلدارى سپورتشىلارىمىز حالىقارالىق ارەنادا جوعارى ناتيجەلەرگە قول جەتكىزدى. بۇل رەتتە قازاقستاندىق سپورتشىلار ۇيىمعا مۇشە جانە باقىلاۋشى مەملەكەتتەر اۋماعىنداعى حالىقارالىق سپورتتىق جارىستارعا بەلسەندى قاتىسادى. مەملەكەتتەرىمىز اراسىنداعى سپورتتىق بايلانىستاردى نىعايتۋ بولاشاق ۇرپاق ءۇشىن تابىس كەپىلى جانە شابىت بولاتىنىنا سەنىمدىمىن. جاستار سپورتىن دامىتۋعا ەرەكشە ءمان بەرۋ قاجەت. جاستار - ءاربىر مەملەكەتتىڭ باستى اكتيۆى جانە ءبىزدىڭ ماقساتىمىز ولاردىڭ ۇيلەسىمدى دامۋى ءۇشىن بارلىق جاعداي جاساۋ»، - دەدى مينيستر.
سونىمەن قاتار ەربول مىرزابوسىنوۆ ت م ۇ كەڭىستىگىندە TAN بىرلەسكەن جوباسىن جۇزەگە اسىرۋدى ۇسىندى. بۇل باستاما شتاب-پاتەرى الماتى قالاسىندا ورنالاساتىن تۇركى مارافوندارى اليانسى اياسىندا تۇركى حالىقتارى مارافوندارىنىڭ سەرياسىن بىرىكتىرۋگە باعىتتالعان.
«ءبىز 6 ەلدەگى 7 مارافوندى، اتاپ ايتقاندا، الماتى، تۇركىستان، باكۋ، سامارقاند، ىستامبۇل، بۋداپەشتتەگى مارافونداردى، سونداي-اق Snow Leopard Run ءبىرىڭعاي اليانسقا بىرىگۋگە شاقىرامىز. وندا شەشىمدەر قابىلداۋ ءۇشىن وسى مارافونداردىڭ وكىلدەرى تەڭ وكىلدىك ەتەدى»، - دەدى تۋريزم جانە سپورت ءمينيسترى.
اتالعان باستاما جۇگىرۋشىلەردىڭ ىشكى كوشى-قونى جانە حالىقارالىق قاتىسۋشىلاردى تارتۋ ەسەبىنەن تۋريستەر اعىنىن ۇلعايتۋعا، مارافوندار اراسىنداعى ۇزدىك تاجىريبەلەرمەن الماسۋعا، الەمدىك ستاندارتتارعا سايكەس جارىستاردى ۇيىمداستىرۋ ساپاسىن ارتتىرۋعا جانە باسقا دا ءبىرقاتار ماڭىزدى ارتىقشىلىقتارعا يە بولادى.
جيىن سوڭىندا ەربول مىرزابوسىنوۆ كەزدەسۋگە جانە 5- دۇنيەجۇزىلىك كوشپەندىلەر ويىندارىنا قاتىسقانى ءۇشىن العىس ءبىلدىردى.
اۆتور
كۇنسۇلتان وتارباي
