استانادا سوعىس جىلدارى ماڭىزدى رول اتقارعان رەترو- اۆتوكولىكتەر كورمەگە قويىلدى
استانا. KAZINFORM - جەڭىستىڭ 80 جىلدىعى قارساڭىندا ق ر پرەزيدەنتى ءىس باسقارماسىنىڭ اۆتوشارۋاشىلىعى رەترو- اۆتوكولىكتەر مەن سوعىس بۇيىمدارىنىڭ كورمەسىن وتكىزدى.
كورمەگە «مەموريالنايا زونا» ىزدەستىرۋ جاساعى تاپقان قۇندى تاريحي جادىگەرلەرى جانە فوتوكورمەسى قويىلدى.
− «مەموريالنايا زونا» ىزدەستىرۋ جاساعى 1978 -جىلى قۇرىلعان جانە كەڭەس وداعىندا ناقتى تىركەلگەن العاشقى ۇيىم بولدى. بىزدەن كەيىن وداقتىڭ باسقا دا رەسپۋبليكالارى حابارسىز كەتكەن ساربازداردى ىزدەي باستادى. ءبىزدىڭ جاساق 47 جىلدا 3224 مايدانگەردىڭ تاعدىرىن انىقتادى. ياعني، كەيبىرىنىڭ سۇيەكتەرى تۋىستارىنا قايتارىلدى، كەيبىرىنىڭ اتى- ءجونى انىقتالىپ، باۋىرلاستار زيراتىندا جاتقان ورنى بەلگىلى بولدى. ول زيرتقا قازاقستاننان كەلگەن تۋىستار تۋعان جەرىنەن ءبىر ۋىس توپىراق اكەلىپ سالادى. وسىنداي ساتتەر جۇرەكتى ەلجىرەتەدى. وتكەنىن ۇمىتقان ادامنىڭ بولاشاعى جوق. ءبىز وسىنى ۇرپاعىمىزعا امانات ەتەمىز. بىرەۋدىڭ اتاسى، بىرەۋدىڭ ارعى اتاسى سوعىسقا اتتانعان. بۇگىنگى شارانىڭ دا ماقساتى - ءوز ءومىرىن قيىپ، بىزگە بەيبىت اسپان سىيلاعان ەر بابالارىمىزدىڭ رۋحىنا تاعزىم ەتۋ، - دەدى «مەموريالنايا زونا» ىزدەستىرۋ جاساعىنىڭ ارداگەرى يۋري گوربان.
كورمەگە قويىلعان رەترو- كولىكتەر «اۆتو- موتو- تسەلينا» قوعامدىق بىرلەستىگىندەگى اۋەسقوي كوللەكتسيونەرلەردىڭ قورىنان الىنعان. اسىرەسە، BMW R35 موتوسيكلى، م-72 موتوتسيكلى، Rover موتوتسيكلى، گاز-67 سەكىلدى سوعىس جىلدارى ماڭىزدى ءرول اتقارعان كولىكتەر كەلۋشىلەر نازارىنا ۇسىنىلدى.
− مىسالى مىنا قارا ءتۇستى Opel Kadett K38 1938 -جىلى شىعارىلعان. بۇل نەمىس كولىگى، كەيىن ونىڭ كونسترۋكتسياسى كەڭەستىك «موسكۆيچتى» جاساۋعا نەگىز بولدى. جيىرما جىل بۇرىن وسكەمەنگە ساپارىمدا وسى كولىكتى كورىپ، ايەلىمە اس ءۇي جيھازىن اپەرەم دەگەن اقشاعا وسى ماشينانى ساتىپ العان ەدىم. استاناعا دەيىن ءوزىم ايداپ كەلدىم. بۇل ىسكە جان- تانىمەن بەرىلگەندەر كوپ. وسىلايشا، رەترو- كولىكتى ساتىپ الامىز، جوندەۋدەن وتكىزەمىز. بۇل كولىكتەر گاراجدا تۇرا بەرمەۋى كەرەك، حالىققا قۋانىش سىيلاۋى كەرەك، بۇگىن جاس بالادان قارتتارعا دەيىن اسقان قىزىعۋشىلىقپەن تاماشالادى، سۋرەتكە ءتۇستى، - دەدى يۋ. گوربان.
سونىمەن بىرگە، ەكىنشى دۇنيەجۇزىلىك سوعىس جىلدارى اڭىزعا اينالعان «پولۋتوركا» − گاز- اا جۇك كولىگى دە بار. بۇل اتاۋدى حالىق 1,5 توننا جۇك كوتەرگەنى ءۇشىن قويعان. بۇل كولىك مايدان مەن تىلدىڭ ناعىز سيمۆولىنا اينالدى. قورشاۋدا قالعان لەنينگرادتى قامتاماسىز ەتۋدە شەشۋشى ءرول اتقاردى، قىس مەزگىلىندە مۇز بوپ قاتقان لادوگا كولىمەن ازىق- تۇلىك، وق- ءدارى تاسىپ، ادامداردى ەۆاكۋاتسيالادى. قاتتى ايازدا دا، ۇنەمى اتقىلاۋ مەن بومبالاۋ جاعدايىندا بۇل كولىكتەر مىڭداعان ادامنىڭ ءومىرىن ساقتاپ قالدى. سوعىس جىلدارى 150 مىڭنان استام وسىنداي جۇك كولىگى شىعارىلعان.
ايتا كەتەيىك، استانادا جەڭىستىڭ 80 جىلدىعى مەن وتان قورعاۋشى كۇنىنە ارنالعان اسكەري پارادقا قىزۋ دايىندىق ءجۇرىپ جاتىر. بۇل شارا 2025 -جىلدىڭ باستى وقيعالارىنىڭ ءبىرى بولماق. مەرەكەلىك شەرۋ 7-مامىردا استاناداعى تاۋەلسىزدىك الاڭىندا وتەدى. سالتاناتتى ءىس- شاراعا 4000 نان استام اسكەري قىزمەتشى، 200 دەن استام اسكەري تەحنيكا، سونداي- اق مايداندىق، ارميالىق جانە اسكەري- كولىكتىك اۆياتسيانىڭ 66 ۇشاعى مەن تىكۇشاعى قاتىسادى.
