استانادا ەر ادام پوليتسەيدى سوققىعا جىققان
استانا. KAZINFORM - استانادا پوليتسيا قىزمەتكەرىنە شابۋىل جاساعان ەر ادام ۇستالدى، - دەپ حابارلايدى ءى ءى م باسپا ءسوز قىزمەتى.
وقيعا كەشە تۇندە بولعان. قالاداعى ويىن-ساۋىق مەكەمەلەرىنىڭ بىرىندە بيلىك وكىلىنە كۇش قولدانعان 31 جاستاعى كۇدىكتى انىقتالدى.
تەرگەۋ مالىمەتىنشە، جىگىت ءدامحانادا قوعامدىق ءتارتىپتى بۇزىپ، مەكەمەگە كەلگەن باسقا كەلۋشىمەن جانجالداسىپ، ارتى توبەلەسكە ۇلاسقان. مەكەمە ماڭىندا ەكى ەر ادام توبەلەسكەنىن كورگەن پوليتسيا قىزمەتكەرى ولاردى تارتىپكە شاقىرماق بولعان.
«ولاردىڭ ءبىرى بيلىك وكىلىنە كۇش كورسەتكەن. كۇدىكتى ءوز كىناسىن مويىندادى. وسى دەرەككە قاتىستى تەرگەۋ جۇرگىزىلىپ جاتىر»، - دەپ جازىلعان پوليتسيا حابارلاماسىندا.
ۇستالعان ادام ۋاقىتشا ۇستاۋ يزولياتورىنا قامالدى.
قۇقىق قورعاۋ ورگاندارى ازاماتتارعا بيلىك وكىلدەرىنە زورلىق-زومبىلىق كورسەتكەن جاعدايدا قىلمىستىق جاۋاپكەرشىلىك كوزدەلگەنىن، 15 جىلعا دەيىن باس بوستاندىعىنان ايىرۋعا اكەپ سوعاتىنىن ەسكە سالادى.
