استانادا قىتاي تىلىنەن الەمدىك بايقاۋدىڭ رەسپۋبليكالىق كەزەڭى ءوتىپ جاتىر
استانا. KAZINFORM - استانادا قىتاي تىلىنەن الەمدىك بايقاۋدىڭ رەسپۋبليكالىق كەزەڭى باستالدى. ەل وڭىرلەرىنەن ىرىكتەلىپ كەلگەن قاتىسۋشىلار بۇل سىننان وتسە، حالىقارالىق كەزەڭگە جولداما الادى.
مەكتەپ وقۋشىلارى مەن ستۋدەنتتەر اراسىنداعى بۇكىل الەمدىك «قىتاي ءتىلى كوپىرى» بايقاۋىنىڭ قازاقستان بويىنشا اقتىق كەزەڭى ەلورداداعى ەۋرازيا ۇلتتىق ۋنيۆەرسيتەتىندە ءوتىپ جاتىر.
- ق ح ر ءتوراعاسى شي جينپيڭ مەن ق ر پرەزيدەنتى قاسىم-جومارت توقايەۆتىڭ ستراتەگيالىق باسشىلىعىنىڭ ارقاسىندا قىتاي- قازاق قاتىناستارى جان- جاقتى ستراتەگيالىق ارىپتەستىكتىڭ جاڭا بيىگىنە كوتەرىلدى، جاڭا «التىن وتىز جىلدىقتىڭ» باستالۋىنا جول اشتى. ەكى ەل اراسىنداعى ەكونوميكا، ساۋدا، عىلىم مەن تەحنولوگيا، ءبىلىم بەرۋ، مادەنيەت سالالارىنداعى ىنتىماقتاستىق قارقىندى دامىپ كەلەدى. قىتاي مەن قازاقستان اراسىنداعى ستراتەگيالىق ارىپتەستىك تەرەڭدەي تۇسكەن سايىن، قىتاي ءتىلىن مەڭگەرگەن جانە قىتايدى جاقسى بىلەتىن سىزدەر، جاستار، ەكى ەل اراسىنداعى ىنتىماقتاستىقتىڭ كوپىرى، بايلانىستىرۋشى بۋىنى جانە جاڭا كۇشى بولاسىزدار، - دەدى بايقاۋدىڭ اشىلۋىندا ءسوز سويلەگەن ق ح ر- دىڭ قازاقستانداعى ەلشىسى حان چۋنلين.
بايقاۋ بۇعان دەيىن وبلىستار مەن قالالاردا ءوتىپ، رەسپۋبليكالىق كەزەڭگە 30 وقۋشى، 30 ستۋدەنت جولداما العان. ال بۇگىنگى سىننان وتكەن 2 وقۋشى مەن 2 ستۋدەنت قىتايدا وتەتىن فينالدىق كەزەڭگە جولداما الادى.
- بايقاۋدا ءۇش ءتۇرلى تاپسىرما بولادى. ءبىرىنشىسى - تەست، وندا قاتىسۋشىنىڭ قىتاي ءتىلىن، مادەنيەتىن، گەوگرافياسىن جانە قازاقستانمەن بايلانىسىن قانشالىقتى بىلەتىنى انىقتالادى. ەكىنشىسىندە قاتىسۋشى ءوزىنىڭ قىتاي الەمىمەن قالاي تانىسقانىن بايانداپ، ەسسە جازادى. ۇشىنشىسىندە ءوزىنىڭ ءبىر ەرەكشەلىگىن، ونەرىن كورسەتەدى، - دەيدى كونفۋسي ينستيتۋتىنان تاجىريبەدەن ءوتۋشى ءارى ەۋرازيا ۇلتتىق ۋنيۆەرسيتەتىنىڭ ستۋدەنتى اناستاسيا ليفوروۆا.
بايقاۋدا «ەڭ تالانتتى» دەگەن دە اتالىم بار ەكەن. ول بايقاۋدان ورىن الماعان، ءبىراق ونەرىمەن جۇرتتى تاڭعالدىرعان قاتىسۋشىعا بەرىلەدى.
ايتۋلى سىنعا ب ا ق سىناعالى كەلگەندەردىڭ ءبىرى - ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىنىڭ 3-كۋرس ستۋدەنتى ارايلىم جاقسىلىق قىزى. ول Kazinform اگەنتتىگىنە ءوزىنىڭ قىتاي ءتىلىن ۇيرەنۋ بارىسىنداعى ازعانتاي جەتىستىگىمەن ءبولىستى.
بايقاۋ بۇگىن كەشكە اياقتالىپ، جەڭىمپازدارعا جولداما ۇلەستىرىلەدى.
بۇعان دەيىن ۇلتتىق ۋنيۆەرسيتەتتەردە قىتاي ءتىلىن وقىتاتىن كافەدرالار قۇرىلاتىنى بەلگىلى بولدى.
ەربول جانات
