استانادا قۇرىلىسى 13 جىلعا سوزىلعان تۇرعىن ءۇي كەشەنى اياقتالدى
استانا. KAZINFORM - استانا قالاسىنىڭ اكىمى جەڭىس قاسىمبەك Instagram پاراقشاسىندا قۇرىلىسى ۇزاققا سوزىلعان «تريۋمف سيتي» كەشەنى اياقتالعانىن ءمالىم ەتتى، دەپ جازدى ەلوردا اكىمدىگىنىڭ رەسمي سايتى.
«قۇرىلىسى ۇزاققا سوزىلعان تاعى ءبىر تۇرعىن ءۇي كەشەنى اياقتالدى. «تريۋمف سيتي» ت ك قۇرىلىسى سوناۋ 2011 -جىلى باستالعان. 13 جىلدان كەيىن كوپ قاباتتى تۇرعىن ءۇي كەشەنىنىڭ 1-كەزەگىنىڭ ۇلەسكەرلەرى باسپانالى بولدى. قازىر اباتتاندىرۋ جۇمىسى ءجۇرىپ جاتىر.
«ەلوردا قۇرىلىس كومپانياسى» ج ش س تاراپىنان وسى ءۇيدىڭ قۇرىلىسىن اياقتاۋ، قۇجاتتارىن رەتكە كەلتىرۋ بويىنشا اۋقىمدى جۇيەلى جۇمىس جۇرگىزىلدى. ال ەكىنشى-ءۇشىنشى كەزەكتىڭ تۇرعىندارى جاقىن ارادا پاتەرلەرىنىڭ كىلتىن الادى دەپ جوسپارلانىپ وتىر.
وسىعان دەيىن مەملەكەتتىڭ قولداۋىنىڭ ارقاسىندا قۇرىلىسى ۇزاققا سوزىلعان 140 تان استام تۇرعىن ءۇي كەشەنى اياقتالعان. وسىلايشا 15,5 مىڭعا جۋىق ۇلەسكەر وتباسىنىڭ پروبلەماسى شەشىلدى.
بيىلعا قۇرىلىسى ۇزاققا سوزىلعان 10 ءۇي قالدى. ولاردىڭ ءبىر بولىگى اياقتالدى. ال قالعانىن وسى جىلدىڭ ماۋسىم ايىنىڭ سوڭىنا دەيىن اياقتاۋدى جوسپارلاپ وتىرمىز. ءاربىر نىسان بويىنشا قادامدىق ءىس-شارالار جوسپارى بار»، - دەپ جازدى جەڭىس قاسىمبەك.
