استانادا شەتەلدەن كوشىپ كەلگەن جانۇيالارعا كومەك كورسەتىلدى
دۇنيەجۇزى قازاقتارى قاۋىمداستىعىنىڭ استانا قالالىق فيليالى قاسيەتتى ورازا ايىنىڭ قۇرمەتىنە شەتەلدەن كوشىپ كەلگەن قانداستارعا ارناپ قايىرىمدىلىق شاراسىن ۇيىمداستىرادى.
ءىس- شارا اياسىندا كاسىپكەر ازاماتتاردىڭ دەمەۋشىلىك جاساۋىمەن جاڭادان كوشىپ كەلگەن، تۇرمىسىندا قيىنشىلىعى بار، كوپبالالى جانە كومەككە مۇقتاج 20 شاقتى وتباسىعا ۇن، كۇرىش، جۇمىرتقا، سۇيىق ماي، كارتوپ سىندى ونىمدەرى بار ازىق-تۇلىك سەبەتتەرى تاراتىلدى.
- رامازان ايى- قايرىمدىلىق، ىزگىلىك جاسايتىن، ادامدارعا مەيرىم باعىشتايتىن قاسيەتتى اي. ءبىز وسى ورايدا شەتەلدەن كەلىپ قونىستانىپ جاتقان قيىنشىلىعى بار وتباسىلارعا ازدا بولسا كومەكتەسەيىك دەپ شەشتىك. قانداستارعا قولداۋ كورسەتۋ - بارشامىزدىڭ ورتاق مىندەتىمىز. اعايىندارعا مەيىر باعىشتاۋ جانە ولارعا ەلىمىزدىڭ، حالقىمىزدىڭ مەيىرىن سەزىندىرۋدىڭ مانى زور دەپ ويلايمىن، - دەدى دۇنيەجۇزى قازاقتارى قاۋىمداستىعىنىڭ استانا قالاسى فيليالىنىڭ باسشىسى عالىم ۇلكەنباي ۇلى.
1991 -جىلدان بەرى قازاقستانعا 1 ميلليون 128 مىڭنان اسا قانداس ەلگە ورالدى. مەملەكەت تاراپىنان ولاردى قولداۋ ماقساتىندا ءتۇرلى باعدارلامالار ىسكە اسىرىلىپ، بەيىمدەلۋگە جاعداي جاسالىپ كەلەدى. بىلتىر 21 مىڭنان اسا ەتنيكالىق قازاق تاريحي وتانىمەن تابىسىپ، قانداس مارتەبەسىن الدى. كوشىپ كەلگەندەردىڭ تەڭ جارتىسى وزبەكستاننان كەلگەن. قالعانى - قىتاي، موڭعوليا، تۇرىكمەنستان، رەسەي جانە باسقا دا مەملەكەتتەن قونىس اۋدارعاندار.
