استانادا بولاشاق انالارعا ارنالعان العاشقى ارنايى كلينيكالار اشىلدى

استانا. KAZINFORM - ەلوردادا بىردەن ەكى «ءبىر كۇندىك كلينيكا» اشىلدى. ءبىرىنشى نىسان انا مەن بالا ورتالىعىندا، ەكىنشىسى №2-قالالىق كوپبەيىندى اۋرۋحانادا ورنالاسقان. جوبا جۇكتى ايەلدەردە ۇرىق دياگنوستيكاسىنىڭ تيىمدىلىگىن ارتتىرۋعا جانە «ءبىر تەرەزە» قاعيداتى بويىنشا كومەك ۇيىمداستىرۋعا باعىتتالعان.

«ءبىر كۇندىك كلينيكانىڭ» باستى ميسسياسى - بولاشاق انالارعا مۇمكىندىگىنشە ساپالى، جان-جاقتى جانە جايلى مەديتسينالىق كومەك كورسەتۋ، پروتسەدۋرالار مەن كونسۋلتاتسيالارعا كەتەتىن ۋاقىت پەن كۇش-جىگەردى ازايتۋ.

«كلينيكا جۇكتى ايەلدەرگە ءبىرىنشى تريمەستردە پرەناتالدى سكرينينگ جۇرگىزۋدىڭ جاڭا بىرەگەي ءادىسىن ۇسىنادى. بولاشاق انالار بيوحيميالىق جانە ءبىرىنشى تريمەستردىڭ ۋلترادىبىستىق سكرينينگىنەن ءوتۋ، قاجەت بولعان جاعدايدا گەنەتيكتىڭ كەڭەسىن الۋ سياقتى بارلىق قاجەتتى قىزمەتتى ءبىر كۇندە، ءبىر جەردەن الا الادى. بۇل بولاشاق انالارعا ۋ د ت، زەرتحانالىق تەكسەرۋ ءۇشىن قان تاپسىرۋ، بەيىندى ماماندارعا جازبانى كوپ كۇتتىرمەي، ۋاقىتتى ۇنەمدەۋگە مۇمكىندىك بەرەدى، سول ارقىلى ءدال سول كۇنى بالاسىنىڭ دەنساۋلىعى تۋرالى تولىق كولەمدە بىلۋگە جانە ءسابي ءولىمى مەن بالالار مۇگەدەكتىگىنىڭ الدىن الۋعا مۇمكىندىك بەرەدى»، - دەپ اتاپ ءوتتى اۋرۋحانا ديرەكتورى نۇربول تۇرسىنبايەۆ.

بيوحيميالىق پرەناتالدى سكرينينگ FMF حالىقارالىق ۇرىق مەديتسيناسى فوندىمەن سەرتيفيكاتتالعان، 2024 -جىلعى اۆتوماتتاندىرىلعان يممۋنواناليزاتور كومەگىمەن جۇرگىزىلەدى. 30 مينۋت ىشىندە قۇرىلعى ۇلگىنى وڭدەۋدەن وتكىزىپ، ناتيجەنى جەدەل دايىنداپ شىعارادى. ۇرىقتىڭ اناتومياسىن مۇقيات، ءدال زەرتتەۋگە باعىتتالعان باعدارلامالارى بار زاماناۋي ساراپتامالىق اپپاراتتاردا ۋلترادىبىستىق سكرينينگتەن ءوتۋ مۇمكىندىگى قامتاماسىز ەتىلگەن.

وسىلايشا دارىگەرلەردىڭ قۇرامداستىرىلعان ساراپتامالارى مەن زاماناۋي قۇرال-جابدىقتاردىڭ ارقاسىندا جۇكتى ايەلدەر ءبىر مەزەتتە قاجەتتى مەديتسينالىق ۇسىنىستارعا قول جەتكىزە الادى. بولاشاق انالارعا زەرتتەۋ ناتيجەلەرىن كۇتەتىن ساتتە ءتاتتى اس-ءدام ۇسىنىلادى.

قالالىق كلينيكاعا جولدامانى جۇكتى ايەلدەر تىركەلگەن جەرى بويىنشا ەمحانادا الا الادى. كلينيكا جۇمىس كۇندەرى تاڭعى 8:00-دەن باستاپ جۇمىس ىستەيدى.