استانادا بەلسەندى جاستار شاشىلىپ جاتقا قوقىستى جاۋاپتى كومپانيانىڭ كەڭسەسىنە اپاردى
استانا. KAZINFORM - رەسمي مالىمەتتەرگە سايكەس، استانادا زاڭسىز قوقىس تاستاۋدى باقىلاۋ كۇشەيدى. وسى جىلى ەلورداداعى بەس اۋداندا 45 مىڭ تونناعا جۋىق قالدىق جويىلدى دەپ حابارلايدى اكىمدىك سايتى.
دەسەك تە، احۋال وزگەرمەي وتىر. تانىمال مىسالداردىڭ ءبىرى - ۇلى دالا مەن تۇران داڭعىلدارىنىڭ قيىلىسىنداعى قوقىس الاڭى.
8,6 گەكتارعا دەيىن سوزىلعان جانە سپۋتنيكتەن دە كورىنەتىن قوقىس الاڭى ۇزاق ۋاقىت بويى قۇرىلىس كومپانياسىنىڭ تاراپىنان ءتيىستى نازارسىز قالعان. بىرنەشە اي بويى بەلسەندىلەر رەيد وتكىزىپ، بەينەجازباعا ءتۇسىرىپ، قوقىستى وسى اۋماققا تاسىمالداعان كاماز كولىكتەرىنىڭ جۇرگىزۋشىلەرىمەن سويلەستى جانە جەرگىلىكتى تۇرعىندارمەن اڭگىمەلەسىپ، جاعدايدى قۇجاتتاپ وتىردى.
وسى اۋماق ءۇشىن جاۋاپكەرشىلىك «نۇر استانا قۇرىلىس» كومپانياسىنا تيەسىلى. ەكولوگيانى ساقتاۋ، زاماناۋي ءتاسىل جانە قالا تۇرعىندارىنىڭ جايلىلىعى تۋرالى جاريا ۇستانىمدارىنا قاراماستان، كومپانيانىڭ قۇرىلىس نىساندارى قوقىس ۇيىندىلەرىمەن قاتار ورنالاسۋى جيىلەدى.
بەلسەندىلەر كومپانيانىڭ ۇستانىمدارى مەن جاۋاپكەرشىلىگىن ەسكە سالۋدى ۇيعاردى. بىرنەشە ونداعان قاتىسۋشى رۇقسات ەتىلمەگەن قوقىس الاڭىنان شىققان قالدىقتاردى كومپانيا كەڭسەسىنە جەتكىزدى.
- قوقىس جەتكىزىلىم فورماتىندا - ۆەلوسيپەدپەن، «NAK-تىڭ قوقىسى - NAK كەڭسەسىنە. ءوز قوقىس الاڭدارىڭدى وزدەرىڭ تازالاڭدار!» دەگەن ۇندەۋى بار، بەزەندىرىلگەن سومكەلەرمەن جەتكىزىلدى. وسى ارەكەت ارقىلى بەلسەندىلەر ماسەلەنى ەلەمەۋ ونىڭ تىكەلەي وزىڭە ورالۋىنا اكەلەتىنىن كورسەتتى. قالاعا دەگەن قۇرمەت - ءوز ارەكەتتەرىڭنىڭ سالدارى ءۇشىن جاۋاپكەرشىلىك الۋدان باستالادى، - دەلىنگەن حابارلامادا.
قوقىستى جەتكىزۋ بارىسىندا جانە «نۇر استانا قۇرىلىس» حولدينگىنىڭ باسقارۋشىسى سەرىكجان مۇحتاروۆپەن سويلەسۋ كەزىندە بەلسەندىلەردى قۇقىق قورعاۋ ورگاندارىنىڭ قىزمەتكەرلەرى ءمان-جايدى انىقتاۋ ءۇشىن ۇستادى. سوعان قاراماستان، بەلسەندىلەر قوعامنىڭ ۇستانىمىن جەتكىزىپ، كومپانيادان ناقتى جاۋاپ الا الدى - قوقىس الاڭىن جويۋ 2025 -جىلدىڭ قازانىنا جوسپارلاندى.
