استانادا ات سپورتى سەكسياسى اشىلدى

ساكەن سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىنىڭ بازاسىندا ىسكە قوسىلعان ۇيىرمەدە جاستاردى تەڭگە ءىلۋ، اۋدارىسپاق جانە كوكپار ويىندارىنا باۋليدى. سونىمەن قاتار ساداق اتۋ، ارقان تارتۋ، جامبى اتۋ جانە قازاق كۇرەسىنىڭ ايلا-تاسىلدەرى دە ۇيرەتىلەدى. ۇلتتىق سپورت سەكتسياسىنا ستۋدەنتتەر تەگىن قاتىسادى.

ۇيىرمەگە جازىلعاندار كانىگى اتبەگىلەردەن بايگەگە قاتىساتىن سايگۇلىكتەردەن بولەك، مۇعالجار، اداي، قوستاناي سەكىلدى جىلقى تۇقىمدارىنىڭ تابيعي ەرەكشەلىكتەرىن دە ءبىلىپ شىعادى.

ەربول تاسجۇرەكوۆ، ق ر اۋىل شارۋاشىلىعى ۆيتسە-ءمينيسترى:

- استانادا بۇنداي 5 ات سپورت ورتالىعى بار. وسىمەن 6 شىسى اشىلىپ جاتىر. ەڭ ماڭىزدىسى، وقيتىن ستۋدەنتتەر مەن جاستارعا تەگىن. ودان بولەك، قالا تۇرعىندارى، قوسىمشا ات سپورتىنا قاتىسامىن دەۋشىلەرگە ەسىك اشىق. كەز كەلگەن ۋاقىتتا كەلىپ، ات ءمىنىپ كەتە الادى.

اناس باققوجايەۆ، ق ر پارلامەنتى ءماجىلىسىنىڭ دەپۋتاتى:

- پرەزيدەنت: «وسى باعىتتى دامىتۋ كەرەك»، - دەپ ايتتى عوي. كوشپەندىلەر ويىنى باستالىپ جاتىر. بۇنىڭ ءوزى بەكەر ەمەس. بۇكىل الەم قازاقستانعا قاراپ وتىر، «نە جاسايدى ەكەن» دەپ. ات سپورتى كەرەك دەپ جاتىرمىز. وعان مەملەكەت جاقسى قولداۋ كورسەتىپ جاتىر. ءبىراق ەندى اتقارۋعا كەلگەن كەزدەگى ناتيجەسىن كورىپ، شىن مانىندە ستۋدەنتتەر، قالا تۇرعىندارى كەلىپ، اشىق تۇردە ات سپورتىنىڭ تۇرلەرىن ۇيرەنىپ، اينالىسسا نەسى جامان؟ ! سوندىقتان رۋحتانامىز، ۇرپاقتى وسىلاي تاربيەلەيمىز. وتە قۋانىشتى جاعداي بولىپ جاتىر.

24KZ