استانادا اسكەري وركەستر قالا تۇرعىندارى الدىندا ونەر كورسەتتى
استانا. KAZINFORM - وتان قورعاۋشىلار كۇنى اياسىندا قازاقستان رەسپۋبليكاسى قارۋلى كۇشتەرى ۇلتتىق اسكەري-پاتريوتتىق ورتالىعىنىڭ ورتالىق اسكەري وركەسترى استانالىقتارعا ونەرلەرىن كورسەتتى، دەپ حابارلادى ەلوردا اكىمدىگىنىڭ رەسمي سايتى.
قالىپتاسقان ءداستۇر بويىنشا اسكەري مۋزىكانتتار ەلوردانىڭ حالىق ەڭ كوپ جينالاتىن ورتالىق ساياباعىندا ونەر كورسەتىپ، قالا تۇرعىندارى مەن قوناقتارىن وتان قورعاۋشى كۇنىمەن جانە جەڭىس كۇنىمەن قۇتتىقتادى.
ق ر قارۋلى كۇشتەرىنىڭ باس اسكەري ديريجەرى، پودپولكوۆنيك الماس يبراگيموۆتىڭ سوزىنشە، ورتالىق اسكەري وركەستر ۇجىمى مۇنداي جيىندارعا ەرەكشە ءمان بەرەدى.
«بۇگىنگى جيىن ەلوردادا العاش رەت ەمەس جانە سوڭعى رەت دەپ ايتۋعا بولمايدى. ىلعي دا وركەستر حالىق كوپ جينالاتىن ورىنداردا، ساياباقتاردا جانە ءتۇرلى ويىن-ساۋىق ورتالىقتارىندا ءوز ونەرلەرىن كورسەتىپ جاتىر. جالپى وركەستىرىمىزدە 34 ادام بار. ولار بۇگىن تانىمال كومپوزيتسيالاردى ورىندايتىن بولادى. جالپى مۇنداي جيىندار قالا تۇرعىندارىنىڭ پاتريوتتىق سەزىمدەرىن وياتادى. بۇل جولى دا اسكەري مۋزىكانتتار تىڭداۋشىلارعا مەرەكەلىك كوڭىل-كۇي سىيلاي الدى دەپ تولىق سەنىممەن ايتۋعا بولادى»، - دەيدى ول.
باس ديريجەردىڭ ايتۋىنشا، اسكەريلەر ءبىر ساپتا تۇرىپ ءان ورىنداۋ ءۇشىن ۇزاق ۋاقىت دايىندالادى.
«اسكەري وركەستر مۇنداي جيىنعا 2-3 اپتادان باستاپ 2-3-ايعا دەيىن ۋاقىتتا دايىندالادى. ول ورىندايتىن كومپوزيتسيانىڭ كۇردەلىلىگىنە بايلانىستى. وركەسترگە كەز كەلگەن اسكەري ادامدى الا المايمىز. ول ءۇشىن ازاماتتىڭ كەم دەگەندە ورتا مۋزىكالىق ءبىلىمى بولۋى كەرەك. ودان بولەك ۇرمەلى نەمەسە سوقپالى اسپاپتاردا ويناي الۋى كەرەك»، - دەيدى باس ديريجەر الماس يبراگيموۆ.
