استانادا اپاتتى ۇيلەردەن 4,7 مىڭ ادام كوشىرىلەدى

استانا قالاسىندا اپاتتى ۇيلەردەن 4710 ادامدى كوشىرۋ جوسپارلانىپ وتىر. بۇل تۋرالى ەلوردا اكىمى جەڭىس قاسىمبەك بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ايتتى، دەپ حابارلايدى Kazinform.

«قۇرىلىس سالاسى ەلوردا ەكونوميكاسىنىڭ نەگىزگى درايۆەرى بولىپ قالا بەرەدى. قازىرگى ۋاقىتتا 3,4 ميلليون شارشى مەتر تۇرعىن ءۇي پايدالانۋعا بەرىلدى. بيىل جەڭىلدەتىلگەن مەملەكەتتىك باعدارلامالار بويىنشا ازاماتتاردىڭ ءارتۇرلى ساناتتارى ءۇشىن 5200 پاتەر بەرۋ تۋرالى مىندەت قويدىق»، - دەدى ەلوردا باسشىسى.

اكىمنىڭ ايتۋىنشا، ونىڭ ىشىندە جەتىم بالالار، كوپبالالى انالار، الەۋمەتتىك وسال ازاماتتار، سونىمەن قاتار جۇمىس ىستەيتىن جاستار بار.

«قازىر قۇجاتتاردى راسىمدەۋ بويىنشا ءتيىستى جۇمىستار ءجۇرىپ جاتىر. كەلەسى جىلدىڭ باسىندا - قاڭتار ايىندا كەزەكتە تۇرعاندار ءوز ۇيلەرىنە كىرەدى. سونىمەن بىرگە استانادا رەنوۆاتسيا باعدارلاماسى بەكىتىلدى. 2029-جىلعا دەيىن 206 اپاتتى ۇيدەن 4710 تۇرعىندى كوشىرۋ جوسپارلانعان. بۇل جۇمىس باستالىپ كەتتى. بيىل 400 پاتەر وسىنداي ازاماتتارعا بەرىلسە، كەلەسى جىلى - تاعى 700 پاتەر. ءارى قاراي جىلىنا 1 مىڭ پاتەردەن بەرىلەدى دەپ جوسپارلاپ وتىرمىز»، - دەدى جەڭىس قاسىمبەك.

ايتا كەتەيىك، جەڭىس قاسىمبەك استانا قالاسىنىڭ الەۋمەتتىك-ەكونوميكالىق دامۋى تۋرالى قورىتىندى ەسەپ بەرىپ جاتىر.