استانادا 20 ادامدى سان سوقتىرعان «جيھاز جاساۋشى» سوتتالدى

استانا. KAZINFORM - استانادا Instagram الەۋمەتتىك جەلىسى ارقىلى جارناما جاساپ، جۇرتتى الداعان الاياق «جيھاز جاساۋشى» سوتتالدى، دەپ حابارلايدى قالالىق پروكۋراتۋرانىڭ باسپا ءسوز قىزمەتى.

قالا تۇرعىنى ءوزىنىڭ قىلمىستىق ارەكەتتەرىن جاسىرۋ ماقساتىندا، جۇبايىنىڭ اتىنان جەكە كاسىپكەرلىك راسىمدەپ، جيھاز قۇراستىرۋ ءۇشىن وندىرىستىك ءۇي-جايدى جالعا العان.

«instagram» الەۋمەتتىك جەلىسىندە جيھاز دايىنداۋ تۋرالى حابارلاندىرۋ بەينەروليكتەرىن جاريالاعان.

كاسىپكەرلىك قىزمەتتىڭ كورىنىسىن جاساي وتىرىپ، تاپسىرىس بەرۋشىلەردىڭ ۇيىنە كەلىپ، وزىنە تيەسىلى ەمەس باسقا جۇمىستاردىڭ فوتوسۋرەتتەرىن كورسەتىپ، جابىرلەنۋشىلەردى الداعان.

ولشەم الۋ جۇمىستارىن جۇرگىزە وتىرىپ، جەكە كاسىپكەرلىك اتىنان شارت جاساسىپ، جابىرلەنۋشىلەردەن تاپسىرىس سوماسىنىڭ %70 مولشەرىندە الدىن-الا تولەم الىپ وتىرعان.

وسىنداي تاسىلمەن 20 جابىرلەنۋشىگە 8,4 ميلليون تەڭگە كولەمىندە شىعىن كەلتىرىلگەن.

باستى سوت تالقىلاۋىندا سوتتالۋشى جابىرلەنۋشىلەرمەن ازاماتتىق-قۇقىقتىق قاتىناس بولۋىنا سىلتەمە جاساي وتىرىپ، كىناسىن مويىندامادى.

مەملەكەتتىك ايىپتاۋشى-پروكۋرور ونىڭ كىناسىن تولىق دالەلدەدى.

كىنالى ادام بىرنەشە رەت جاساعان الاياقتىق ءۇشىن 4 جىل باس بوستاندىعىنان ايىرۋ جازاسىنا كەسىلدى.

كىنالىدەن جابىرلەنۋشىلەردىڭ پايداسىنا كەلتىرىلگەن ماتەريالدىق شىعىن ءوندىرىلدى.

ۇكىم زاڭدى كۇشىنە ەندى.

قالا پروكۋراتۋراسى ەلوردا تۇرعىندارىمەن قوناقتارىنا قىراعى بولۋدى، تاڭدالعان قىزمەتتىڭ ناتيجەلەرىنىڭ دۇرىستىعىنا كوز جەتكىزۋدى، سونىمەن قاتار ءوز جۇمىسى ءۇشىن تومەن باعا ۇسىناتىن ادامدارعا سەنبەۋدى ەسكەرتەدى، ويتكەنى بۇنىڭ ءبارى الاياقتىقتىڭ بەلگىسى بولۋى مۇمكىن.