استانادا 12 جاستان اسقان وقۋشىلارعا ج ي تەحنولوگيالاردى تەگىن ۇيرەتەتىن ورتالىق اشىلادى
استانا. KAZINFORM - قازان ايىندا 12-18 جاس ارالىعىنداعى وقۋشىلارعا ارنالعان TUMO كرەاتيۆتى تەحنولوگيالار ورتالىعى اشىلادى. بۇل تۋرالى Astana Hub باسقارۋشى ديرەكتورى ۆالەريا تيە ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا ءمالىم ەتتى.
- بۇل - وقۋشىلارعا قوسىمشا ءبىلىم بەرەتىن زاماناۋي پلاتفورما. باعدارلاما 11 باعىتتى قامتيدى، سونىڭ ىشىندە گەنەراتيۆتى جي، ويىن جاساۋ، انيماتسيا، 3D مودەلدەۋ، روبوتوتەحنيكا جانە باسقا دا سالالار بار. مۇندا ءار وقۋشى ءوز قابىلەتىن دامىتا الادى. TUMO - استانادا ورنالاسقان حالىقارالىق جي ورتالىعى. Alem.ai عيماراتىنىڭ 2, 3-قاباتتارىندا ورنالاسادى. مۇندا جىلىنا 5000 وقۋشىنى تەگىن وقىتۋدى جوسپارلاپ وتىرمىز. ەشقانداي ىرىكتەۋ تالاپتارى جوق، - دەدى ول.
بۇل كۋرستارعا ءوتىنىم قابىلداۋ جۋىقتا alem.ai سايتىندا باستالادى.
- الداعى 3-5 جىلدا ءبىز بۇل جوبانى قازاقستاننىڭ بارلىق ايماعىنا، سونىڭ ىشىندە شالعاي ەلدى مەكەندەرگە دەيىن كەڭەيتىپ، ءاربىر وقۋشىعا وسىنداي مۇمكىندىكتى قولجەتىمدى ەتۋدى كوزدەپ وتىرمىز، - دەدى ۆالەريا تيە.
بۇعان دەيىن NU ينجەنەرى انار ساندىعۇلوۆا اۋتيزم ەرەكشەلىگى بار بالالاردى جاساندى ينتەللەكتىگە نەگىزدەلگەن روبوت تەراپياسى ارقىلى وڭالتۋ ادىستەمەسىن ازىرلەگەنىن جازعان ەدىك.
اۆتور
ەسىمجان ناقتىباي
