استاناعا ش ى ۇ ەلدەرىندەگى سىرتقى ساياسي ۆەدومستۆولارىنىڭ باسشىلارى كەلەدى
استانا. قازاقپارات - 2024 -جىلعى 21 - مامىردا استانادا ق ر پرەمەر- ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋدىڭ توراعالىعىمەن شانحاي ىنتىماقتاستىق ۇيىمىنا مۇشە مەملەكەتتەردىڭ سىرتقى ىستەر مينيسترلەرى كەڭەسىنىڭ كەزەكتى وتىرىسى وتەدى.
ءىس- شاراعا ۇيىمعا مۇشە مەملەكەتتەردىڭ سىرتقى ساياسي ۆەدومستۆولارىنىڭ باسشىلارى، شانحاي ىنتىماقتاستىق ۇيىمىنىڭ باس حاتشىسى جانە شىۇ وڭىرلىك تەرروريزمگە قارسى قۇرىلىمى اتقارۋشى كوميتەتىنىڭ ديرەكتورى قاتىسادى.
«وتىرىس بارىسىندا بيىل استانادا وتەتىن ش ى ۇ- عا مۇشە مەملەكەتتەر باسشىلارى كەڭەسىنىڭ وتىرىسىنا دايىندىق بارىسىن قاراۋ جوسپارلانعان. دەلەگاتسيا باسشىلارى ۇيىم اياسىنداعى ساياسي، ساۋدا-ەكونوميكالىق جانە مادەني-گۋمانيتارلىق سالالارداعى حالىقارالىق جانە وڭىرلىك احۋال، قاۋىپسىزدىك ءارى ىنتىماقتاستىقتى دامىتۋ ماسەلەلەرى بويىنشا پىكىر الماسادى. وتىرىستا ۇيىمنىڭ الداعى ءسامميتىنىڭ قورىتىندى قۇجاتتارىنا قاتىستى ءبىرقاتار شەشىمگە قول قويۋ، سونداي-اق اقپاراتتىق حابارلاما قابىلداۋ ەسكەرىلگەن»، - دەدى سىرتقى ىستەر مينيسترلىگىنىڭ رەسمي وكىلى ايبەك سمادياروۆ مينيسترلىكتە وتكەن اپتالىق باسپا ءسوز ءماسليحاتىندا.
