استانا پوليتسەيلەرى ەسىنەن تانعان ەر ادامدى قۇتقارىپ قالدى
استانادا پاترۋلدىك پوليتسەيلەر ەر ادامنىڭ ءومىرىن امان الىپ قالدى، دەپ حابارلايدى Polisia.kz.
28- جەلتوقسان كۇندىزگى ۋاقىتتا پاترۋلدىك پوليتسيا قىزمەتكەرلەرى ولجاس التىنبەكوۆ پەن نۇرلان باۋىرجانوۆ پاترۋلدەۋ كەزىندە تاراز جانە جانگەلدين كوشەلەرىنىڭ قيىلىسىندا تروتۋاردا جاتقان ەر ادامدى كورگەن.
جاعدايدى باعالاي وتىرىپ، كاپيتان التىنبەكوۆ ۇستاماسى باستالعان ناۋقاسقا العاشقى مەديتسينالىق كومەك كورسەتۋگە كىرىسەدى.
دارىگەرلەر كەلگەنگە دەيىن پوليتسيا قىزمەتكەرى كومەك كورسەتۋدى جالعاستىرىپ ەر ادامنىڭ تىنىس الۋ جولدارىنا اۋانىڭ ەركىن جەتۋىنە سەپ بولعان.
ءسويتىپ جەدەل جاردەم كەلگەنگە دەيىن پوليتسيا قىزمەتكەرلەرى زارداپ شەككەن ادامنىڭ جانىندا بولعان.
كەلگەن جەدەل جاردەم كولىگىمەن 30 جاستاعى ەر ادام مەديتسينالىق مەكەمەگە جەدەل جونەلتىلگەن.
قولدان كەلگەن كومەگىن كورسەتكەن پاترۋلدىك پوليتسيا پولكىنىڭ ينسپەكتورلارى وزدەرىنە بەكىتىلگەن مارشرۋت بويىنشا قىزمەت اتقارۋدى جالعاستىرۋعا باعىت العان.
