استانا مەن براتيسلاۆا اراسىندا مازمۇندى ساياسي ديالوگ ورناعان - پرەزيدەنت

استانا. KAZINFORM - قازاق- سلوۆاك بيزنەس فورۋمى ەكى ەلدىڭ ءوزارا ىقپالداستىعىن ودان ارى دامىتۋعا جول اشادى. بۇل تۋرالى سلوۆاكيا پرەمەر-ءمينيسترى روبەرت فيتسومەن كەلىسسوزدەردەن كەيىنگى ب ا ق وكىلدەرىنە ارنالعان بريفينگتە مەملەكەت باسشىسى قاسىم-جومارت توقايەۆ ايتتى.

- ەڭ الدىمەن سلوۆاكيا پرەمەر-ءمينيسترى روبەرت فيتسو مىرزاعا جانە بارشا دەلەگاتسيا مۇشەلەرىنە ەلىمىزگە قوش كەلدىڭىزدەر دەيمىن. سلوۆاكيا قازاقستاننىڭ ەۋروپا وداعىنداعى ماڭىزدى ءارى سەنىمدى سەرىكتەسى. ەكى جاقتى قارىم-قاتىناسىمىزدىڭ تاريحى ماڭىزدى وقيعالارعا تولى. قازىرگى تاڭداعى ەكى ەلدىڭ ءوزارا بايلانىستارى دوستىق جانە سىيلاستىق رۋحىندا نىعايىپ جاتىر. استانا مەن براتيسلاۆا اراسىندا مازمۇندى ساياسي ديالوگ ورناعان، - دەدى مەملەكەت باسشىسى.

پرەزيدەنتتىڭ ايتۋىنشا، ەكى ەلدىڭ اراسىنداعى ساۋدا-ەكونوميكالىق جانە مادەني- گۋمانيتارلىق سالاداعى بايلانىس جىلدان-جىلعا دامىپ كەلە جاتىر. شارتتىق-قۇقىقتىق نەگىز قالىپتاسقان. ەكى ەلدىڭ الىس-بەرىسى دە ۇلعايىپ كەلەدى.

- قازاقستاندا 30 دان استام سلوۆاك كومپانياسى تابىستى جۇمىس ىستەپ جاتىر. ەلىمىزگە سلوۆاكيانىڭ ءىرى كاسىپكەرلەرى دە كەلدى. سوعان بايلانىستى روبەرت فيتسو مىرزاعا العىسىمدى ايتامىن. بۇگىن بيزنەس فورۋم وتەدى. بۇل جيىن ءوزارا ىقپالداستىعىمىزدى ودان ارى نىعايتۋعا جول اشادى دەپ سەنەمىن، - دەدى قاسىم-جومارت توقايەۆ.

بۇعان دەيىن مەملەكەت باسشىسى قاسىم-جومارت توقايەۆ سلوۆاكيا پرەمەر-ءمينيسترى روبەرت فيتسومەن شاعىن قۇرامدا كەلىسسوز جۇرگىزگەنىن جازعان ەدىك.

ال كەڭەيتىلگەن قۇرامداعى كەلىسسوز بارىسىندا مەملەكەت باسشىسى سلوۆاكيا قازاقستاننىڭ ەۋروپالىق وداقتاعى ماڭىزدى ءارى سەنىمدى سەرىكتەسى ەكەنىن ايتتى.