ازاماتتار كەلەشەكتە زەينەتاقى جيناعىن شەتەلدىك ينۆەستكومپانيالارعا بەرە الۋى مۇمكىن
استانا. KAZINFORM - مەملەكەت باسشىسى «استانا» حالىقارالىق قارجى ورتالىعىن باسقارۋ جونىندەگى كەڭەس وتىرىسىن وتكىزدى.
جيىن باستالعانعا دەيىن قاسىم- جومارت توقايەۆ قارجى ورتالىعىنىڭ ەكوجۇيەسىن دامىتۋعا زور ۇلەس قوسقان قاتىسۋشىلار قىزمەتىمەن تانىستى.
Freedom Finance Global, China Construction Bank Corporation استانا فيليالى، Fix Price Group, Grata International جانە Binance Kazakhstan Technologies كومپانيالارىنىڭ باسشىلارى ءوز قىزمەتتەرىنىڭ ناتيجەلەرىن بايانداپ، ينۆەستيتسيالىق جوبالار، دامۋ جوسپارلارى تۋرالى مالىمەت بەردى.
وتىرىستى اشقان مەملەكەت باسشىسى جاھاندىق كاپيتال نارىعىنداعى قارقىندى وزگەرىستەر، جاڭا حالىقارالىق ساۋدا- ەكونوميكالىق بايلانىستاردىڭ قالىپتاسۋى، سونداي- اق ەلدەر اراسىنداعى ينتەگراتسيالىق پروتسەستەردىڭ نىعايۋى، قارجى اعىنىن قايتا ءبولۋ جايىندا ايتتى.
پرەزيدەنتتىڭ پىكىرىنشە، قازىرگى سىن-قاتەرلەر مەن وزگەرىستەر قازاقستان ءۇشىن جاڭا مۇمكىندىكتەرگە جول اشادى.
وسى ورايدا مەملەكەت باسشىسى ەلدىڭ ورنىقتى ءارى قارقىندى دامۋىن قامتاماسىز ەتۋدەگى «استانا» حالىقارالىق قارجى ورتالىعىنىڭ ماڭىزدى رولىنە توقتالدى.
- سالىستىرمالى تۇردە الساق، قىسقا مەرزىم ىشىندە ا ح ق و ايتارلىقتاي ناتيجەگە قول جەتكىزدى. ينۆەستيتسيا تارتۋ ءۇشىن وتە ىڭعايلى جاعداي جاسالدى. ونىڭ ايماقتا بالاماسى جوق. ينۆەستورلارىمىزعا قولايلى سالىق، ۆيزا جانە ەڭبەك رەجيمى ۇسىنىلدى. ءار ينۆەستوردى جەكە جانە كەشەندى قولداۋ قاعيدالارى ەنگىزىلدى. ءادىل ءارى بەيتاراپ سوت جۇيەسى قۇرىلدى. جاڭا سيفرلىق شەشىمدەردىڭ ارقاسىندا IPO- عا قاتىسۋ قازاقستاننىڭ بارلىق تۇرعىنىنا قولجەتىمدى بولدى، - دەدى قاسىم-جومارت توقايەۆ.
مەملەكەت باسشىسى ا ح ق و الدىندا ايماقتاعى تابىستى قارجىلىق حاب رەتىندەگى مارتەبەسىن نىعايتۋ مىندەتى تۇرعانىنا نازار اۋداردى. سونداي-اق ءبىرقاتار وزەكتى ماسەلەگە توقتالدى.
اتاپ ايتقاندا، پرەزيدەنت ەل ەكونوميكاسىنا ودان ءارى ينۆەستيتسيا تارتۋدىڭ ماڭىزىن جانە ينۆەستيتسيالىق ەكوجۇيەنى جاقسارتۋ قاجەت ەكەنىن اتاپ ءوتتى.
— ورتالىق قازىردىڭ وزىندە ا ق ش، ەۋروپا، ۇلى بريتانيا، ازيا جانە تاياۋ شىعىس ەلدەرىندەگى ءبىرقاتار سەرىكتەستەرمەن تىعىز ىنتىماقتاستىق ورناتتى. بىرىككەن اراب امىرلىكتەرى مەن ساۋد ارابياسىنىڭ ءىرى كومپانيالارىمەن ينۆەستيتسيالىق جوبالاردى ىلگەرىلەتۋ بويىنشا جۇمىس جۇرگىزىلىپ جاتىر. مۇنىڭ ءبارى ا ح ق و- نىڭ ينۆەستيتسيالىق الەۋەتىن جانە قازاقستان ەكونوميكاسىن ايتارلىقتاي نىعايتۋعا مۇمكىندىك بەرەدى. دەگەنمەن ورتالىق ۇكىمەتپەن جانە ۇلتتىق ينستيتۋتتارمەن ءوزارا ىقپالداستىعىن جانداندىرىپ، رەتتەۋشى بازانى جەتىلدىرۋدى جالعاستىرۋى قاجەت، - دەدى قاسىم-جومارت توقايەۆ.
