استانا بيۋدجەتىنىڭ جىلدىق كىرىسى 100 ميلليارد تەڭگەمەن تولىقتى
استانا. KAZINFORM - استانا قالاسىنىڭ قوعامدىق كەڭەسى ەلوردانىڭ 2024-26 -جىلدارعا ارنالعان بيۋدجەتىنە ۇسىنىلعان وزگەرىستەردى ءبىراۋىزدان ماقۇلدادى.
قوعامدىق كەڭەس مۇشەلەرىنە ناقتىلانعان بيۋدجەت جوباسىن استانا قالاسىنىڭ ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى قايسار ماڭقارايەۆ تانىستىردى.
«جەكە كىرىس تۇسىمدەرى جونىندەگى جوسپاردى 99,5 ميلليارد تەڭگەگە ۇلعايتۋ ۇسىنىلادى. ونىڭ ىشىندە سالىق تۇسىمدەرىنىڭ جوسپارىن 58,4 ميلليارد تەڭگەگە، سالىق ەمەس تۇسىمدەردى 39,5 ميلليارد تەڭگەگە جانە نەگىزگى كاپيتال تۇسىمدەرىن 1,6 ميلليارد تەڭگەگە ۇلعايتۋ كوزدەلىپ وتىر. شىعىستارعا كەلسەك، الەۋمەتتىك كورسەتۋگە مىندەتتى گيگيەنا قۇرالدارىمەن جانە ينۆاتاكسي قىزمەتتەرىمەن قامتاماسىز ەتۋ ءۇشىن قوسىمشا 2,029 ميلليارد تەڭگە قاراجات قوسىمشا قاراستىرىلدى»، - دەدى ول.
قالا بيۋدجەتىنىڭ شىعىس بولىگىندە بىرنەشە ماڭىزدى باعىتتىڭ بيۋدجەتى قايتا ناقتىلانعان.
اتاپ ايتساق، مەن دارىلىك زاتتاردى ساتىپ الۋعا قوسىمشا 183,3 ميلليون تەڭگە، مەملەكەتتىك شىعارماشىلىق تاپسىرىستاردى ىسكە اسىرىپ، كىتاپحانالاردى قامتاماسىز ەتۋ ءۇشىن 1,8 ميلليارد تەڭگە، سپورتتىق قۇراما كوماندالاردىڭ مۇشەلەرىن دايارلاۋعا، بالالار مەن جاسوسپىرىمدەرگە قوسىمشا ءبىلىم بەرۋگە قوسىمشا 1,4 ميلليارد تەڭگە، كولىك جانە جول- كولىك ينفراقۇرىلىمىن دامىتۋ باسقارماسىنا 9,8 ميلليارد تەڭگە، جىلۋ ەنەرگەتيكاسى جۇيەسىن دامىتۋعا، ەنەرگيا شىعىندارىن سۋبسيديالاۋعا قوسىمشا 34,8 ميلليارد تەڭگە، ينجەنەرلىك- كوممۋنيكاتسيالىق جەلىلەر قۇرىلىسىن جالعاستىرۋعا، جاتاقحانا قۇرىلىسىن قوسا قارجىلاندىرۋعا، ساتىپ الىنعان پاتەرلەردىڭ بەرەشەكتەرىن وتەۋگە قوسىمشا 11,2 ميلليارد تەڭگە، سۋمەن جابدىقتاۋ، كارىز- تازارتۋ جۇيەسىنىڭ قۇرىلىستارىن جالعاستىرۋعا قوسىمشا 5,2 ميلليارد تەڭگە، جەر ۋچاسكەلەرىن الىپ قويۋعا، ليفت اۋىستىرۋعا قوسىمشا 2 ميلليارد تەڭگە ءبولىندى.
«وسىلايشا، ەنگىزىلگەن وزگەرىستەردى ەسكەرە وتىرىپ استانا قالاسىنىڭ 2024 -جىلعا ارنالعان ناقتىلانعان بيۋدجەتىنىڭ جالپى كولەمى 1 تريلليون 309 ميلليارد 548 ميلليون تەڭگە بولادى. ونىڭ ىشىندە جەكە كىرىس تۇسىمدەرى 987 ميلليارد 770 ميلليون تەڭگە دەپ بەلگىلەنەدى»، - دەدى باسقارما باسشىسى.
تالقىلاۋدان كەيىن قوعامدىق كەڭەس مۇشەلەرى ناقتىلانعان بيۋدجەتتى ماقۇلداپ داۋىس بەردى.
