استانا - بۋراباي باعىتىندا تاعى ءبىر قوسىمشا ەلەكتر پويىزى قاتىنايتىن بولدى

استانا. KAZINFORM - تۋريستەر اراسىندا تانىمال باعىتتاردىڭ كولىك قولجەتىمدىلىگىن ارتتىرۋ جانە جولاۋشىلارعا جايلى جاعداي جاساۋ ماقساتىندا «جولاۋشىلار تاسىمالى» ا ق «استانا-1 - بۋراباي كۋرورتى» باعىتىندا №6811/6812 قوسىمشا قالا ماڭى ەلەكتر پويىزىن جولعا شىعاردى. بۇل تۋرالى «جولاۋشىلار تاسىمالى» ا ق باسپا ءسوز قىزمەتى ءمالىم ەتتى.

ەلەكتر پويىزى ءار سارسەنبىدە قاتىنايدى.

استانادان ساعات 11:00-دە شىعىپ، 13:35-تە بۋراباي ستانتسياسىنا جەتەدى. كەرى باعىتتا پويىز 14:15-تە جولعا شىعىپ، 17:00-دە استاناعا ورالادى.

- پويىز قۇرامىندا 4 ۆاگون بار. جولاۋشىلار ءۇشىن 1، 2 جانە 3-سىنىپتاعى قىزمەت كورسەتۋ تۇرلەرى قولجەتىمدى. ۆاگوندار كونديتسيونەرلەرمەن، اۋا تازارتۋ جۇيەسىمەن، بيواجەتحانالارمەن، مۇمكىندىگى شەكتەۋلى جولاۋشىلارعا ارنالعان ارنايى ورىندارمەن، ىڭعايلى ورىندىقتارمەن، ۆەلوسيپەد قوياتىن ورىندارمەن جانە Vputi.kz مەدياپورتالىنا قولجەتىمدى تەگىن Wi-Fi جەلىسىمەن جابدىقتالعان، - دەلىنگەن حابارلامادا.

قالا ماڭى باعىتىنداعى جولاۋشىلار پويىزىنا بيلەتتەردى جونەلتۋگە 10 كۇن قالعاندا ساتىپ الۋعا بولادى.

ەسكە سالساق، وسىعان دەيىن بۋراباي باعىتىندا «Burabay Express» جاڭا ەلەكترپويىزى ىسكە قوسىلعان بولاتىن.

«Burabay Express» جاڭا بۋىن ەلەكترپويىزى موبيلدى قۇرىلعىلاردى زاريادتاۋعا ارنالعان USB قوسقىشىمەن جابدىقتالعان.