استانادا ءداستۇرلى «تولاعاي» الىپتار سايىسى وتەدى

كۇش اتالارىنىڭ باسەكەسى استانا قالاسى اكىمدىگى عيماراتىنىڭ الدىنداعى الاڭدا وتەدى. جارىستىڭ اشىلۋ سالتاناتى ساعات 15:00 دە باستالادى. قاتىسۋشىلاردى تىركەۋ ساعات 13:00 دە وتەدى.

سايىس بارىسىندا ەلىمىزدىڭ ءار وڭىرىنەن كەلگەن ەڭ مىقتى سپورتشىلار التى كەزەڭ بويىنشا ءوزارا باق سىناپ، كۇش-قايراتى مەن توزىمدىلىگىن كورسەتەدى.

اتاپ ايتقاندا، قاتىسۋشىلار فەرمەر ءجۇرىسى، 200 كەلىلىك جۇك ارتىلعان اربانى سۇيرەۋ، سالماعى 130 كەلى بولاتىن بورەنەنى جەلكەگە سالىپ وتىرىپ-تۇرۋ، 100 كەلىلىك تاستى بەلگىلەنگەن قاشىقتىققا دەيىن كوتەرىپ اپارۋ، قىلىش كوتەرۋ جانە وگىز كوتەرۋ (مۋلياج) سەكىلدى ەرەكشە سايىس تۇرلەرىندە سىنعا تۇسەدى.

ۇيىمداستىرۋشىلاردىڭ ايتۋىنشا، جارىستىڭ باستى ماقساتى - ۇلتتىق سپورت تۇرلەرىن ناسيحاتتاۋ، جاستار اراسىندا كۇشتىك سپورتتى دامىتۋ جانە سالاۋاتتى ءومىر سالتىن دارىپتەۋ.

ءىس-شارانى استانا قالاسى اكىمدىگىنىڭ قولداۋىمەن استانا قالاسىنىڭ دەنە شىنىقتىرۋ جانە سپورت باسقارماسى ۇيىمداستىرادى.

ايتا كەتەلىك استانا كۇنىنە وراي حالىقارالىق كوشە قويىلىمدارى فەستيۆالى وتەدى.