اسكەري قىزمەتشىلەرگە اقشالاي ريزىق تولەۋ قاعيدالارى كونستيتۋتسياعا سايكەستەندىرىلدى
استانا. قازاقپارات – 19-مامىردان باستاپ «قازاقستان رەسپۋبليكاسى قارۋلى كۇشتەرىنىڭ اسكەري قىزمەتشىلەرىنە اقشالاي ريزىق، جاردەماقى مەن باسقا دا تولەم تولەۋ قاعيدالارىن بەكىتۋ تۋرالى» قازاقستان رەسپۋبليكاسى قورعانىس ءمينيسترىنىڭ 2017-جىلعى 2-ماۋسىمداعى 255-بۇيرىعىنا ەنگىزىلگەن تۇزەتۋلەر كۇشىنە ەندى. بۇل تۋرالى كونستيتۋتسيالىق سوت ءمالىم ەتتى.
تۇزەتۋلەر قاتارىندا بۇيرىقتى «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭعا سايكەس كەلتىرۋگە باعىتتالعان نورمالار بار. بۇعان دەيىن كونستيتۋتسيالىق سوت قورعانىس ءمينيسترىنىڭ بۇيرىعىمەن بەكىتىلگەن اقشالاي ريزىق تولەۋ قاعيدالارىنىڭ 26 جانە 30-تارماقتارىنىڭ ەرەجەلەرىن كونستيتۋتسياعا سايكەس كەلمەيدى دەپ تانىعان بولاتىن.
- ۆەدومستۆولىق بۇيرىق زاڭنىڭ ەرەجەلەرىنە قاراماستان، اسكەري قىزمەتشىلەرگە اسكەري قىزمەت وتكەرۋ كەزەڭىندە ولاردىڭ اسكەري ەمەس لاۋازىمداردا اقشالاي ريزىق تولەۋدى شەكتەدى. كونستيتۋتسيالىق سوت مينيسترلىكتىڭ بۇيرىعى دەڭگەيىندە مۇنداي شەكتەۋدى بەلگىلەۋ ەڭبەككە سىياقى تولەۋ قۇقىعىن، جالاقىنىڭ، زەينەتاقىنىڭ، الەۋمەتتىك قامسىزداندىرۋدىڭ ەڭ تومەنگى مولشەرىنىڭ كەپىلدىكتەرىن زاڭدى نەگىزدەر بويىنشا بەكىتەتىن كونستيتۋتسياعا، سونداي-اق قۇقىقتاردى تەك زاڭدارمەن شەكتەۋ تۋرالى ەرەجەگە سايكەس كەلمەيتىنىن اتاپ ءوتتى. كونستيتۋتسيانىڭ 74-بابىنا سايكەس زاڭدار مەن وزگە دە قۇقىقتىق اكتىلەر، ولاردىڭ كونستيتۋتسياعا سايكەس ەمەس دەپ تانىلعان جەكەلەگەن ەرەجەلەرى جويىلادى جانە قولدانىلمايدى، - دەلىنگەن حابارلامادا.
وسىعان بايلانىستى قورعانىس مينيسترلىگى قولدانىستاعى زاڭعا سايكەس ۆەدومستۆولىق بۇيرىقتى جۇرگىزۋ بويىنشا قوسىمشا شارالار قابىلدادى.
ەسكە سالا كەتەيىك، ەلىمىزدە ساربازدارعا كرەديت بەرۋگە تىيىم سالۋ مەحانيزمى ازىرلەندى.
