اسانالى ءاشىموۆ: تەاتر ونەرىندە ەكى جاق بىردەي ءلاززات السا، سول - باقىت
پاۆلودار. KAZINFORM - م. اۋەزوۆ اتىنداعى قازاق ۇلتتىق دراما تەاترى 100 جىلدىق مەرەيتويىنا وراي قازاقستان بويىنشا ەكى جىلعا سوزىلاتىن تۋرنەنى باستاپ كەتتى. ونەر ۇجىمى پاۆلودارعا كەلىپ، جەرگىلىكتى كورەرمەنگە 5 قويىلىمدى ۇسىندى.
تەاتر ترۋپپاسى ابايدىڭ قارا سوزدەرى جەلىسىمەن جازىلعان «قارا» دراماسىن، س. مۇقانوۆتىڭ «ءمولدىر ماحاببات» م. اۋەزوۆتىڭ «ەڭلىك- كەبەك»، «بەرنارد شوۋدىڭ «مەنىڭ سۇيىكتى پەرىشتەم»، د. يسابەكوۆتىڭ «ءجۇز جىلدىق ماحاببات» قويىلىمدارىن ۇسىنىپ، جەرگىلىكتى كورەرمەندى رۋحاني سۋسىنداتتى.
الماتىداي ۇلكەن شاھارداعى ونەردىڭ تابارىگىن الا كەلگەن ترۋپپانىڭ بۇل ساپارى كەرەكۋ ءوڭىرى ءۇشىن ۇلكەن وقيعا بولعانى داۋسىز.
م. اۋەزوۆ اتىنداعى قازاق ۇلتتىق دراما تەاترىنىڭ ديرەكتورى، قازاقستاننىڭ ەڭبەك سىڭىرگەن قايراتكەرى ەركىن جۋاسبەك اكەم-تەاتردىڭ كەرەكۋ جەرىنە سوڭعى رەت 2019 -جىلى كەلگەنىن اتاپ ءوتتى. اراعا بەس جىل سالىپ جەرگىلىكتى تەاترسۇيەر قاۋىم سۇيىكتى اكتەرلەرىمەن تاعى تابىسىپ وتىر.
«2026 -جىلى اۋەزوۆ تەاترىنىڭ قۇرىلعانىنا 100 جىل تولادى. عاسىرلىق مەرەيتويىمىزعا وراي مادەنيەت جانە اقپارات مينيسترلىگىنىڭ قولداۋىمەن ەكى جىلدىق تۋرنەمىزدى باستاپ كەتتىك. قازاقستانداعى بارلىق ءوڭىردى، سونداي-اق ءبىراز شەتەلدى ارالاپ شىعاتىن ويىمىز بار. العاشقى گاسترولىمىز جەتىسۋ جەرىنەن باستالىپ، تالاي ۇلىلاردىڭ ءىزى قالعان كەرەكۋ جەرىن ەكىنشى ساپارىمىزعا ارنايى تاڭداپ كەلىپ وتىرمىز. بۇدان سوڭ شىعىس قازاقستاندى بەتكە الامىز. قويىلىمدارىمىزدا 50 گە جۋىق اكتەر وينايدى. 30 دان استام تەحنيكالىق قىزمەتكەر سپەكتاكلدەرىمىزدىڭ تولىققاندى جۇرۋىنە قىزمەت ەتەدى. ساحنالىق دەكوراتسيالارىمىز الماتى تورىندە قالاي قويىلسا، وڭىرلەردە دە تۇپ-تۋرا سولاي قۇرىلادى. ەرتىس-بايان وڭىرىنە كەلىپ وتىرعانىمىزدىڭ ەكىنشى سەبەبى جەرگىلىكتى ج. ايماۋىتوۆ اتىنداعى قازاق مۋزىكا-دراما تەاترىمەن جولعا قويىلعان شىعارماشىلىق بايلانىسىمىز ارقاۋ بولدى. بۇل تەاتردىڭ سوڭعى جىلدارى اتى ماقتاۋلى، كورەرمەنگە ۇسىنىپ جاتقان دۇنيەلەرى سالماقتى. وتكەن جىلى ەل بويىنشا تەاترلار فەستيۆالىندە تالاي جۇلدەنى ولجالاپ، ماسكەۋدى مويىنداتىپ قايتتى. ۇجىم ديرەكتورى ارمان تەمىربەك جاس تا بولسا بۇگىنگى زامان مەنەدجەرلىگىن مىقتاپ مەڭگەرگەن»، - دەيدى اكەم- تەاتردىڭ باسشىسى.
اسانالى ءاشىموۆ كەزىندە ءوزى تۇسكەن كينوفيلمدەرىنىڭ تەڭ جارتىسى جەر ءجانناتى - باياناۋىلدىڭ تاۋ-تاسىندا تۇسىرىلگەنىن ەرەكشە تەبىرەنىسپەن ەسكە الدى. شاكەن ايمانوۆ تالاي كينواكتەرلەردىڭ جۇلدىزىن جاققانىن تەبىرەنە اڭگىمەلەپ، باياناۋىلدى شىن مانىندە «تۇڭعىشتار ەلى» دەپ قابىلدايتىنىن جەتكىزدى.
«وتاندىق عىلىم مەن ونەر، مادەنيەت پەن وزگە دە سالالاردا تىڭنان تۇرەن سالعان تارلانداردىڭ كوبى وسى قاسيەتتى توپىراقتان تۇلەپ ۇشتى. قانىش ساتبايەۆ، قاناعاڭ ءوزى قۇرعان عىلىم اكادەمياسىنىڭ تۇڭعىش پرەزيدەنتى، جۇمات شانين تۇڭعىش كاسىبي رەجيسسەر، شاكەن ايمانوۆ قازاق كينوسىنىڭ اتاسى، الكەي مارعۇلان وتاندىق ارحەولوگيانىڭ ءتۇپقازىعى اتاندى. عۇلاما ءماشھۇر ءجۇسىپ سياقتى تاريحي تۇلعانى دۇنيەگە كەلتىرگەن توپىراق كيەلى. وسى ۇلىلاردىڭ كىندىك قانى تامعان جەردە تالاي ۇلتتىق كينوفيلمدەر ءتۇسىرىلدى. ومىرىمدە ءوزىم تۇسكەن كارتينالاردىڭ تەڭ جارتىسى باياناۋىلدا وربىگەن ەكەن. ال ەندى تەاترداعى وبرازدارىمنىڭ ىشىندە تۇڭعىش ءرولىم، م. اۋەزوۆ پەن ل. سوبوليەۆتىڭ «اباي» سپەكتاكلىندەگى ايدار ءرولى - مەنىڭ پاسپورتىم. تەاتر دەگەن اكتەرلەردى شىڭدايتىن لابوراتوريا. ەڭ اۋەلى بارلىعى كادىمگى دايىندىقتان باستالادى. اكتەردىڭ ايتاتىن ءماتىنى بويىنا ءسىڭۋى كەرەك.
ەڭ سوڭى ايتاتىن ءسوزى ءوز سوزىنە اينالۋى كەرەك. ينتوناتسيا، پودتەكست دەگەن بار. باياعىدا ءبىزدى دايىنداعان ۇلىلار مىناۋ نە ءسوز، بۇل كىم ءۇشىن ايتىلعان، بۇل سويلەمدەگى ەڭ باستى ءسوز قايسىسى دەپ ءبىزدى مەكتەپ مۇعالىمدەرىنشە تەرگەۋگە الاتىن. الماتىدا مەنىڭ اكتەرلىك كۋرسىم بار. ءبىرىنشى كۋرستان باستاپ ستۋدەنتتەرگە كىتاپ وقىتامىن. سوڭعى كۋرسقا جەتكەنشە 10 شاقتى روماندى تۇگەسىپ تاستايدى. سودان جامان بولعان جوق.
كۋرستى بىتىرگەن 23 تۇلەكتىڭ 19 ى قىزىل ديپلوممەن شىقتى. الگى توپتىڭ اراسىندا جاڭادان دراماتۋرگتەر، رەجيسسەر-سەناريستەر پايدا بولدى. ال كينويندۋستريادا مۇنداي دايىندىق جوق. كوشەدەن كەلگەن دە بىردەن اكتەر بولىپ ويناپ جاتىر. تۇنەۋگۇنى ەل-جۇرت جەر-كوككە سىيعىزباي ماقتاپ جۇرگەن سوڭعى وتاندىق كينوفيلمدەردىڭ ءبىرىن كوردىم. مۇرنىمدى كەسىپ السا دا ايتايىن، كينو ەمەس، كينوسىماق دۇنيە، رەجيسسۋراسى - ءنول. ءبىزدىڭ دەڭگەيىمىز، ءبىزدىڭ قازىرگى كينويندۋستريامىزدىڭ جەتكەن دەڭگەيى وسى. تۇنەۋگۇنى بىرەۋلەر «قىز جىبەكتى» قايتا تۇسىرەيىك دەپتى. ول ەندى اتاقتى ۇلتتىق كينومىزدىڭ برەندىن پايدالانىپ، پايدا تابۋدى كوزدەگەن سپەكۋليانتتاردىڭ ارەكەتى دەپ ءتۇيدىم. بۇعان دەيىن دە ايتقانمىن، بۇگىن دە قايتالاپ ايتامىن، قازاق كينوسىندا ءالى كۇنگە شەدەۆر تۇسىرىلگەن جوق»، - دەپ باعا بەردى ساحنا ساردارى.
ەسكە سالا كەتەيىك، پاۆلودارداعى ايماۋىتوۆ تەاترى ورالحان بوكەيدىڭ «كەربۇعىسىن» ساحناعا شىعاردى.
اۆتور
مۇرات اياعان
