پاريجدەگى پاراليمپيادا ويىندارىنىڭ اشىلۋ سالتاناتى الدىنداعى الاۋدى جەكي چان الىپ جۇرەدى

استانا. KAZINFORM - پاريجدە وتەتىن پاراليمپيادا ويىندارىنىڭ اشىلۋ سالتاناتى الدىندا الاۋ الىپ جۇرۋشىلەردىڭ ءبىرى اتاقتى اكتەر جەكي چان بولادى، دەپ جازادى South China Morning Post.

70 جاستاعى ءتۇرلى تريۋكتارى مەن ەكشن كورىنىستەرى ارقىلى الەمگە تانىمال اكتەر سارسەنبى كۇنى فرانسيا استاناسىندا اشىلۋ سالتاناتى بولاتىن پاراليمپيادا الاۋىنىڭ ەستافەتاسىنا قاتىسادى، دەپ حابارلادى ۇيىمداستىرۋ كوميتەتى.

ەستافەتاعا فرانسۋز اكتريساسى ەلزا زيلبەرشتەين مەن حورەوگراف بەنجامەن ميلەپە دە قاتىسادى.

ەستەرىڭىزگە سالا كەتەيىك، پاراليمپيادا الاۋى بۇعان دەيىن فرانسيا قالالارى ارقىلى ساياحاتىن باستادى.

ستوك مانديەۆيلل اۋىلىنان شىققان بريتاندىق الاۋشىلار فرانسۋز ارىپتەستەرىن جارتى جولدا كەزدەستىردى. ولاردىڭ اراسىندا پاراليمپيادا قوزعالىسىنىڭ جانە ءبىرىنشى پاراليمپيادا ويىندارىنىڭ نەگىزىن قالاۋشى ليۋدۆيگ گۋتتماننىڭ شوبەرەسى لورا ميللس بار. كالە كوممۋناسىنداعى تۋننەلدىڭ شىعىسىندا تاعى 11 الاۋ جاعىلدى.

الاۋمەن ءجۇرىپ ءوتۋ شەرۋى سارسەنبى كۇنى 28-تامىزدا پاريجدە اياقتالادى. ءدال وسى كۇنى پاراليمپيادا الاۋى جاعىلادى.

قازاقستان پاراليمپياداشىلارى پاراليمپيادا ويىندارىنا سەگىزىنشى رەت قاتىسادى. 1996 -جىلدان قازىرگى ۋاقىتقا دەيىن ءبىزدىڭ سپورتشىلار جازعى پاراليمپيادا ويىندارىندا 7 مەدال (2 التىن، 4 كۇمىس جانە 1 قولا) جەڭىپ الدى. بۇعان دەيىن پرەمەر-مينيستر ولجاس بەكتەنوۆ 2024 -جىلى وتەتىن XVII جازعى پاراليمپيادا ويىندارى قارساڭىندا قازاقستان قۇراماسىنىڭ مۇشەلەرىمەن كەزدەسىپ، قازاقستاننىڭ مەملەكەتتىك تۋىن تابىستاپ، ساتتىلىك تىلەدى.

XVII جازعى پاراليمپيادا ويىندارىنا قاتىساتىن پاراليمپياداشىلاردىڭ العاشقى لەگى پاريجگە اتتاندى.

2024 -جىلى پاريجدە وتەتىن پاراليمپيادا ويىندارى تۋرالى Kazinform ماتەريالدارىنان وقىڭىز.

اۆتور
ەركەجان سماعۇلوۆا