پاريج وليمپياداسىندا كۇتپەگەن «توسىن سىيلار» بولۋى مۇمكىن - مينيستر

استانا. KAZINFORM – ق ر تۋريزم جانە سپورت ءمينيسترى ەرمەك مارجىقپايەۆ پاريج وليمپياداسىندا قازاقستاندىق قۇراما قانداي سپورت تۇرلەرىنەن مەدال الۋى مۇمكىن ەكەنىن ايتتى.

ءمينيستردىڭ ايتۋىنشا، قازاقستان قۇراماسىنىڭ قورجىنىندا ازىرگە 50 ليسەنزيا بار، الدا تاعى 25 ليسەنزيالىق رەيتينگتىك تۋرنير بار.

«ەڭ الدىمەن ءبىزدىڭ قۇرامادا كىم بار ەكەنىن، كىممەن جۇدىرىقتاسىپ، كىممەن كۇرەسەتىنىمىزدى جانە ت. ب. ءتۇسىنۋىمىز كەرەك. قازاقستان تاريحىندا تۇڭعىش رەت ءبىزدىڭ بالۋان قىزدارىمىز، اۋىر اتلەتتەرىمىز ليسەنزياسىز قالدى. وعان قوسا، ءبىزدىڭ نازارىمىزدى اۋدارعان جاڭا سپورت تۇرلەرى پايدا بولۋدا. بىزدە ەش ۋاقىتتا اتۋ بويىنشا التى ليسەنزيا بولماعان، ساداق اتۋ بويىنشا بەس ليسەنزيا بولعان ەمەس. ياعني، بەلگىلى ءبىر «توسىن سىيلار» بولۋى مۇمكىن. ەگەر ۇزدىك ۇشتىكتى سۇراساڭىز، بۇل بوكس، تەننيس جانە كۇرەستىڭ قانداي دا ءبىر ءتۇرى»، - دەپ اتاپ ءوتتى ەرمەك مارجىقپايەۆ.

ايتا كەتەيىك، فرانسيا استاناسىنداعى وليمپيادا ويىندارى 26-شىلدە -11-تامىز كۇندەرى وتەدى.