پاريج تىڭشىلىق قاۋپىنە بايلانىستى رەسەي جۋرناليستەرىن وليمپياداعا قاتىستىرمايدى

استانا. قازاقپارات - پاريج تىڭشىلىق قاۋپىنە بايلانىستى 2024-جىلعى وليمپياداعا دەيىن جۇزگە جۋىق شەتەل جۋرناليسىن، فيزيوتەراپيەۆتەر مەن تەحنيك-ماماندارىن كىرگىزبەۋدى ۇيعاردى.

بۇل تۋرالى فرانسيا ىشكى ىستەر مينيسترلىگىنىڭ باسشىسى جەرالد دارمانەن Le Journal du Dimanche-گە بەرگەن سۇحباتىندا ايتتى.

ءمينيستردىڭ سوزىنشە، بۇل تىزىمدە رەسەي مەن بەلارۋس ازاماتتارى مەن تاعى باسقا ەلدەردىڭ وكىلى بار، الايدا ولاردىڭ اتى-ءجونىن اتامادى.

«بارلاۋ مەن تىڭشىلىقتان بولەك، كيبەرشابۋىل جاساۋعا كومپيۋتەر جەلىلەرىنە قول جەتكىزۋ مۇمكىندىگى دە بار»، - دەدى دارمانەن.

ءى ءى م باسشىسى حالىقارالىق وليمپيادا كوميتەتىندە (ح و ك) جۇمىس ىستەيتىن رەسەي ازاماتتارى پاريج ويىندارىنا قاتىسادى دەدى.

دارمانەن فرانسۋز بيلىگى ەشكىم قاۋىپ توندىرمەيتىنىنە كوز جەتكىزۋ ءۇشىن وليمپياداعا قاتىسۋدى جوسپارلاعان ميلليونعا جۋىق ادامدى تەكسەردى دەدى. پاريج ويىندارىنا دەيىن راديكال قوزعالىستارعا قاتىسى بولۋى مۇمكىن دەپ كۇدىككە ىلىنگەن، مەملەكەت قاۋىپسىزدىگىنە قاۋىپ توندىرەدى ءيا اسىرەسولشىل نەمەسە اسىرەوڭشىل ۇيىمدارعا مۇشە بولۋى مۇمكىن ءتورت مىڭنان استام ادامعا قاتىسۋعا رۇقسات بەرمەگەن.

پاريج وليمپياداسى 26-شىلدە مەن 11-تامىز ارالىعىندا وتەدى. وعان بەيتاراپ ستاتۋسپەن رەسەيدەن 15، بەلارۋستەن 16 سپورتشى قاتىسادى.

بىلتىر جەلتوقساندا ح و ك رەسەي مەن بەلارۋس سپورتشىلارى وليمپياداعا بەيتاراپ ستاتۋسپەن قاتىسا الادى دەگەن شەشىم قابىلداعان. قابىلداۋ تالابىنا سايكەس، رەسەي جانە بەلارۋس ءتولقۇجاتى بار سپورتشىلار جارىسقا جەكە سپورتشى رەتىندە عانا قاتىسا الادى، كوماندالار قاتىستىرىلمايدى.

سپورتشىلار، ولارمەن بىرگە ىستەيتىن ادامدار رەسەيدىڭ ۋكرايناعا قارسى سوعىسىن قولدايتىن بولسا، ءوز ەلىنىڭ اسكەرىندە نەمەسە قاۋىپسىزدىك سالاسىندا جۇمىس ىستەسە، پاريج وليمپياداسىنا قاتىسپايدى.

رەسەي سپورتشىلارىنا پاريج وليمپياداسىنا قاتىسۋعا 54 كۆوتا بولىنگەن. 21 سپورتشى رۇقسات العانىنا قاراماستان قاتىسپايتىن بولعان، ولاردىڭ اراسىندا بالۋاندار دا بار.