پاريج-2024: وليمپيادا ويىندارىنىڭ باستالۋىنا 1 كۇن قالدى

پاريج. KAZINFORM - فرانسيا استاناسى پاريج قالاسىندا وتەتىن بيىلعى جىلدىڭ باستى دوداسى - XXXIII وليمپيادا ويىندارىنىڭ باستالۋىنا تۋرا 1 كۇن قالدى. ەرتەڭ، ياعني، 26-شىلدە كۇنى ويىنداردىڭ رەسمي الاۋى تۇتانادى.

ءدال قازىر پاريج قالاسىندا وليمپيادا ويىندارىنا قىزۋ دايىندىق ءجۇرىپ جاتىر. قوناقتاردى كۇتىپ الۋ، ورنالاستىرۋ. تىلشىلەر قاۋىمى دا ءوز تىرلىكتەرىمەن ابىر-سابىر.

ەرتەڭگى ويىنداردىڭ اشىلۋ سالتاناتىنا وراي كوشەدە قاۋىپسىزدىك قىزمەتتەرى دە كۇشەيگەن.

ايتا كەتسەك، كەز كەلگەن وليمپيادا الدىندا سول ەلدىڭ ىشىندەگى قالالاردا الاۋ ەستافەتاسىنىڭ وتەتىندىگى بەلگىلى. پاريج وليمپياداسىنداعى الاۋدىڭ ديزاينىندا سۋ، تەڭدىك جانە الەم تاقىرىپتارى قامتىلعان.

ەستافەتا بارىسىندا الاۋ اتلانت، ءۇندى، تىنىق مۇحيتتارى ارقىلى بىرنەشە ارالدى قامتيدى. ال پاريج وليمپياداسىنىڭ اشىلۋى سەنا وزەنىندە وتەدى.

بۇگىنگى تاڭدا سپورتشىلارىمىز وليمپيادا قالاشىعىنداعى اۋماعى 300 مىڭ شارشى مەتردى قۇرايتىن قوناقۇيلەرگە جايعاسىپ، جارىسقا تىڭعىلىقتى دايىندالىپ جاتىر. الەمنىڭ 200-دەن استام ەلىنەن 15 مىڭعا جۋىق سپورتشىلاردى ورنالاستىراتىن عيمارات زاماناۋي جانە ءار ءتۇرلى پىشىندە نەگىزى قالانعان. 7 جىل ۋاقىت جۇمسالعان 80-نەن استام عيماراتتا 7 200 بولمە بار.

XXXIIIجازعى وليمپيادا ويىندارىنىڭ جەڭىمپازدارى مەن جۇلدەگەرلەرى ەيفەل مۇناراسىنىڭ ەتەگىندەگى تروكادەرودا ورنالاسقان چەمپيوندار ساياباعىندا ماراپاتتالادى.

وليمپيادا مەدالدارى بۇرىن جوندەۋ جۇمىستارى كەزىندە الىنعان ەيفەل مۇناراسىنىڭ ءتۇپنۇسقا سىنىقتارىنىڭ بالقىماسىنان جاسالعان.

التىبۇرىش پىشىنىندە جاسالعان بولىكتىڭ ورتاسىندا جازعى وليمپيادا ويىندارىنىڭ لوگوتيپى تۇر. التىبۇرىش - فرانسيانىڭ كارتاسى.

مەدالدىڭ ارتقى جاعىندا گرەكتەر ءۇشىن جەڭىس قۇدايى سانالاتىن نيكا، افيناداعى اكروپول جانە ەيفەل مۇناراسى بەينەلەنگەن.

پاريج وليمپياداسى - قازاقستاننىڭ تاۋەلسىز ەل رەتىندە قاتىسقالى وتىرعان سەگىزىنشى جازعى وليمپياداسى بولماق. سونداي-اق، ەۋروپا قۇرلىعىندا ءۇشىنشى رەت (افينا، لوندون، پاريج) باق سىنايدى.

پاريج قالاسىندا وتەتىن XXXIII جازعى وليمپيادا ويىندارىندا جالپى 32 سپورت تۇرىنەن 329 مەدال جيىنتىعى ساراپقا سالىنادى.

قازاقستان سپورتشىلارى ءتورت جىلدىق دوداعا 80 اتلەت سپورتتىڭ 25 تۇرىنەن 92 جولداما جەڭىپ الدى.

وليمپيادانىڭ اشىلۋ سالتاناتىندا قازاقستان تۋىن بوكسشى اسلانبەك شىمبەرگەنوۆ پەن جەڭىل اتلەت ولگا سافرونوۆاعا كوك بايراعىمىزدى تابىستاعان ەدى.

قازاقستان سپورتشىلارى وسىعان دەيىنگى جازعى وليمپيادا ويىندارىندا 12 سپورت تۇرىنەن جۇلدە جەڭىپ العانىن.

ولار:

بوكس -7 التىن، 7 كۇمىس، 10 قولا؛

جەڭىل اتلەتيكا - 2 التىن، 1 كۇمىس، 2 قولا؛

اۋىر اتلەتيكا - 1 التىن، 3 كۇمىس، 6 قولا؛

گرەك-ريم كۇرەسى - 1 التىن، 2 كۇمىس، 2 قولا؛

ۆەلوسپورت - 1 التىن، 1 كۇمىس؛

قازىرگى بەسسايىس - 1 التىن؛

ءجۇزۋ - 1 التىن؛

ەركىن كۇرەس - 3 كۇمىس، 7 قولا؛

دزيۋدو - 2 كۇمىس، 2 قولا؛

نىسانا كوزدەۋ - 2 كۇمىس، 1 قولا؛

كاراتە - 2 قولا؛

تاەكۆوندو - 1 قولا.

بۇگىنگى تاڭدا تاۋەلسىز قازاقستاننىڭ 14 وليميادا چەمپيونى بار.

ولار:

يۋري مەلنيچەنكو 1972 -جىلى، 5-ماۋسىمدا دۇنيەگە كەلگەن. گرەك-ريم كۇرەسىنەن 1996 -جىلعى اتلانتا وليمپياداسىنىڭ چەمپيونى.

ۆاسيلي جيروۆ 1974 -جىلى، 4-ساۋىردە بالقاش قالاسىندا دۇنيەگە كەلگەن. بوكستان (81 كەلىگە دەيىنگى) اتلانتا وليمپياداسىنىڭ چەمپيونى.

الەكساندر پارىگين 1973 -جىلى دۇنيەگە كەلگەن. بەسسايىستان اتلانتا وليمپياداسىنىڭ جەڭىمپازى.

بەكزات ساتتارحانوۆ 1980 -جىلدىڭ 4-ساۋىرىندە تۇركىستان قالاسىندا دۇنيەگە كەلگەن. 2000 -جىلى وتكەن سيدنەي وليمپياداسىنىڭ چەمپيونى. 2000 -جىلدىڭ 31-جەلتوقسانىندا ومىردەن وتكەن.

ولگا شيشيگينا 1968 -جىلدىڭ 23-جەلتوقسانىندا الماتى قالاسىندا دۇنيەگە كەلگەن. جەڭىل اتلەتيكادان سيدنەي وليمپياداسىنىڭ چەمپيونى.

ەرماحان ىبرايىموۆ 1972 -جىلى 1-قاڭتاردا جامبىل وبلىسىندا دۇنيەگە كەلگەن. بوكسشى 71 كەلى سالماقتا سيدنەيدە جەڭىمپاز اتاندى.

باقتيار ارتايەۆ 1983 -جىلى 14-ناۋرىزدا تاراز قالاسىندا دۇنيەگە كەلگەن. 2004 -جىلعى گرەكيانىڭ افينى قالاسىندا وتكەن وليمپيادادا بوكستان 69 كەلى سالماقتا توپ جاردى.

باقىت سارسەكبايەۆ 1981 -جىلى 29-قاراشادا دۇنيەگە كەلگەن. بوكستان 2008 -جىلعى بەيجىڭ وليمپياداسىنىڭ چەمپيونى.

اللا ۆاجەنينا 1983 -جىلى 29-مامىردا دۇنيەگە كەلگەن. اۋىر اتلەتيكادان بەيجىڭ ويىندارىنىڭ جەڭىمپازى.

سەرىك ساپيەۆ 1983 -جىلدىڭ 16-قاراشاسىندا اباي قالاسىندا دۇنيەگە كەلگەن. بوكستان 69 كەلى سالماقتا 2012 -جىلعى لوندون وليمپياداسىنىڭ چەمپيونى.

ولگا رىپاكوۆا 1984 -جىلى، قاراشانىڭ 30 ىندا وسكەمەن قالاسىندا دۇنيەگە كەلگەن. جەڭىل اتلەتيكادان لوندون قالاسىندا وتكەن وليمپيادانىڭ التىن مەدال يەگەرى.

الەكساندر ۆينوكۋروۆ 1973 -جىلى، 16-قىركۇيەكتە سولتۇستىك قازاقستان وبلىسىندا دۇنيەگە كەلگەن. ۆەلوشاباندوز. 2012 -جىلعى لوندونداعى XXX جازعى وليمپيادا ويىندارىندا باس جۇلدەنى جەڭىپ العان.

دانيار ەلەۋسىنوۆ 1991 -جىلى، 13-ناۋرىزدا قازتالوۆ اۋدانىندا دۇنيەگە كەلگەن. بوكسشى. 2016 -جىلعى برازيلياداعى وليمپيادا ويىندارىنىڭ جەڭىمپازى.

دميتري بالاندين 1995 -جىلدىڭ 4-ساۋىرىندە الماتى قالاسىندا دۇنيەگە كەلگەن. ريو- دە- جانەيرو قالاسىندا وتكەن XXXI وليمپيادا ويىندارىندا 200 مەتر براسپەن قازاقستانعا جۇزۋدەن تۇڭعىش التىن مەدال الىپ بەرگەن سپورتشى.

الدا پاريج وليمپياداسى

بۇل كۇندەرى فرانسيا استاناسى پاريج قالاسىندا وتەتىن XXXIII جازعى وليمپيادا ويىندارىنا ىرىكتەۋ تۋرنيرلەرى تولىعىمەن اياقتالدى. قازىرگى تاڭدا ءتورتجىلدىق دوداعا جولداما جەڭىپ العان قازاقستاندىق سپورتشىلارىمىز سوڭعى وقۋ-جاتتىعۋ جيىندارىن وتكىزىپ جاتىر.

قازاقستان قۇراماسى وليمپيادا ويىندارىنا سپورتتىڭ 25 تۇرىنەن 92 جولداما جەڭىپ الدى. ناقتىراق ايتساق، بوكس، دزيۋدو، سپورتتتىق گيمناستيكا، جەڭىل اتلەتيكا، بايداركا مەن كانوەدە ەسۋ، وقپەن اتۋ، سەمسەرلەسۋ، گرەك-ريم كۇرەسى، ەركىن كۇرەس، ساداق اتۋ، ستەندتىك اتۋ، تەننيس، ۆەلوشوسسە، ءجۇزۋ، زاماناۋي بەسسايىس، تاەكۆوندو، ۆەلوترەك، باتۋت گيمناستيكاسى، بادمينتون، اكادەميالىق ەسۋ، كوركەم گيمناستيكا، ترياتلون، ۇستەل تەننيسى، قۇزعا شىعۋ جانە برەيكينگتەن وليمپيادا ويىندارىندا سىنعا تۇسەدى.

ەستەرىڭىزگە سالا كەتەيىك، فرانسيا استاناسى پاريج قالاسىندا وتەتىن XXXIII جازعى وليمپيادا ويىندارى 26-شىلدە مەن 11-تامىز ارالىعىندا وتەدى. ويىندارعا الەمنىڭ 205 ەلىنەن 10500 سپورتشى قاتىسادى دەپ جوسپارلانعان.

اۆتور

كۇنسۇلتان وتارباي