پاريج-2024: مەرگەندەرىمىز وليمپيادا قالاشىعىنا ورنالاستى

استانا. KAZINFORM - نىسانا كوزدەۋدەن قازاقستاننىڭ ۇلتتىق قۇراماسى فرانسيانىڭ شاتورۋ قالاسىنداعى پاريج وليمپياداسىنىڭ قالاشىعىنا تابان تىرەدى.

ق ر سپورتتى دامىتۋ ديرەكتسياسىنىڭ باسپا ءسوز قىزمەتى ءمىلىم ەتكەندەي، الماتى قالاسىنان اتتانعان سپورتشىلارىمىزدى فرانسياداعى قازاقستان ەلشىلىگىنىڭ وكىلدەرى شارل- دە- گولل اتىنداعى پاريج قالاسىنىڭ اۋەجايىنان كۇتىپ العان.

وسىدان كەيىن سپورتشىلارىمىز قارۋ-جاراق تەكسەرۋىنەن ءوتىپ، ورتالىقتان اككرەديتاتسياسىن الدى. كەيىن ۇيىمداستىرۋشىلار ولاردى ارنايى اۆتوبۋسپەن جارىس وتەتىن شاتورۋ قالاسىنا جەتكىزدى.

شاتورۋ - فرانسيا استاناسى پاريجدىڭ وڭتۇستىگىندە 270 شاقىرىم جەردە ورنالاسقان قالا. مۇنداعى نىسانا كوزدەۋ ورتالىعىندا 27-شىلدە مەن 5-تامىز ارالىعىندا نىسانا كوزدەۋ مەن ستەند اتۋدان 15 جۇلدە جيىنتىعى ۇلەستىرىلەدى. بيىلعى ويىندار كەزىندە قاتىسۋشىلار سانى 360-تان 340-قا (170 ەركەك، 170 ايەل) دەيىن ازايعانىن ايتا كەتەيىك.

«ءبىزدىڭ جارىس وتەتىن وليمپيادا قالاشىعى تەك مەرگەندەرگە ارنالعان. بۇگىن سپورتشىلار مەن باپكەرلەر ورنالاسىپ، اسحانا مازىرىمەن تانىسىپ ۇلگەردى. تاماقتانۋ جاعىنان ەشقانداي قيىندىق بولا قويمايدى. مۇنداعى تاعامدار ءبىزدىڭ مازىرمەن بىردەي. قالاشىققا كەلەر بولساق، مەديا ورتالىق، جارىس وتەتىن جەر، اسحانا، قوناق ءۇي، قارۋ-جاراق قويماسى ءبارى ءبىر-بىرىنە جاقىن. اراسى 5 مينۋتتىق جەر. مۇندا تەك مەرگەندەر بولادى. ءبارى ءبىر-ءبىرىن تانيدى. ءوزىمىزدى كەزەكتى الەم كۋبوگىندا جۇرگەندەي سەزىنە باستادىق. وسى تۇستا قالاشىقتاعى ەرىكتىلەردىڭ بارىنشا كومەكتەسىپ جاتقانىن ايتا كەتكىم كەلەدى»، - دەدى ۇلتتىق قۇراماداعى ۆينتوۆكا بويىنشا اعا جاتتىقتىرۋشى انۆار يۋنۋسمەتوۆ.

ايتا كەتەيىك، ۇلتتىق قۇراما وكىلدەرى - يسلام ساتپايەۆ، ارينا التۋحوۆا، الەكساندرا لە، كونستانتين مالينوۆسكي (ۆينتوۆكا)؛ نيكيتا چيريۋكين، يرينا يۋنۋسمەتوۆا (تاپانشا) كەشەندەگى العاشقى جاتتىعۋىن استانا ۋاقىتىمەن بۇگىن كەشكە وتكىزەدى.

اۆتور
كۇنسۇلتان وتارباي