قورعانىس ونەركاسىبى ارنايى قور ارقىلى قارجىلاندىرىلادى

استانا. قازاقپارات - پارلامەنت پالاتالارىنىڭ بىرلەسكەن وتىرىسىندا پرەزيدەنت قاسىم- جومارت توقايەۆ ەلدىڭ قورعانىسى الەۋەتىن ارتتىرۋدىڭ جولدارىن اتادى، دەپ حابارلايدى قازاقپارات ءتىلشىسى.

«تاعى ءبىر ماڭىزدى ماسەلە - قورعانىس- ونەركاسىپ كەشەنىن جان- جاقتى نىعايتۋ. بۇل ماسەلە دامىعان مەملەكەتتەردە ۇلتتىق قاۋىپسىزدىكتى قامتاماسىز ەتۋدە شەشۋشى ءرول اتقارادى. ەڭ ماڭىزدى مىندەت - يمپورتقا تاۋەلدىلىكتى تومەندەتۋگە مۇمكىندىك بەرەتىن، وزىمىزدە شوعىرلانۋ ۇلەسى جوعارى ءوندىرىس تسيكلىن قۇرۋ»، - دەدى قاسىم- جومارت توقايەۆ.

مەملەكەت باسشىسى ەلدىڭ ارمياسىن جوعارى تەحنولوگيالىق قارۋ- جاراقپەن جانە اسكەري تەحنيكامەن، ونىڭ ىشىندە بەرەندى تەحنيكامەن، ۇشقىشسىز ۇشۋ اپپاراتتارىمەن، زاماناۋي اتىس قارۋىمەن قامتاماسىز ەتۋ كەرەكتىگىن اتاپ ءوتتى.

«تەحنيكانى جەدەل جوندەۋ بويىنشا وندىرىستىك قۋاتتاردى نىعايتىپ، وتاندىق كاسىپورىنداردى قولداۋدى كۇشەيتۋ قاجەت. بىزدە ءتيىستى ماتەريالدىق- تەحنيكالىق بازا، قۇزىرەتتەر مەن كادرلار بار. ولارعا ءتيىستى ۆەدومستۆولاردىڭ تاپسىرىستارى قاجەت. قازىرگى زامانعى تەحنولوگيالار ترانسفەرى جانە جاڭا وندىرىستەردى وقشاۋلاۋ باعىتىنداعى جۇمىستى جالعاستىرۋ قاجەت. قورعانىس- ونەركاسىپ كەشەنىن دامىتۋدىڭ ارنايى قورى وتاندىق كاسىپورىنداردى تىكەلەي قارجىلىق قولداۋ تەتىگى بولادى»، - دەدى پرەزيدەنت.

مەملەكەت باسشىسى بۇل جولعى جولداۋىن «ادىلەتتى قازاقستاننىڭ ەكونوميكالىق باعدارى» دەگەن تاقىرىپپەن جاريالاپ وتىر.

بۇعان دەيىن جازعانىمىزداي، پارلامەنت پالاتالارىنىڭ بىرلەسكەن وتىرىسىنا دەپۋتات- مينيسترلەرمەن بىرگە ەڭبەك ادامدارى دا جينالدى.

اۆتور:

ەسىمجان ناقتىباي