ماڭعىستاۋ وڭىرىندە توتەنشە جاعداي ەنگىزۋ قارالىپ جاتىر

اقتاۋ. قازاقپارات - ماڭعىستاۋ اتوم ەنەرگەتيكا كومبيناتىنداعى (م ا ە ك) اپاتقا بايلانىستى وڭىردە توتەنشە جاعداي رەجيمىن ەنگىزۋ ماسەلەسى قارالىپ جاتىر.

وبلىس تۇرعىندارى كۇنىنە 3-5 ساعاتقا ەلەكتر ەنەرگياسىنان اجىراتىلىپ تۇراتىن بولادى. ەڭ ۇلكەن شەكتەۋلەر ونەركاسىپ ورىندارىنا ەنگىزىلۋدە. قوعامدىق كوممۋنيكاتسيا ورتالىعىندا بۇگىن وتكەن بريفينگىدە قۇرىلعان جەدەل شتابتىڭ شەشىمدەرى ءمالىم ەتىلدى، دەپ حابارلايدى قازاقپارات.

ماڭعىستاۋ وبلىسى اكىمىنىڭ ءبىرىنشى ورىنباسارى جۇماباي قاراعايەۆتىڭ ايتۋىنشا، «م ا ە ك» ج ش س- دە ەلەكتر ەنەرگياسىنىڭ جالپى ءوندىرىس قۋاتتىلىعى 545 م ۆ ت قۇرايدى. الايدا، ەكى ەلەكتر ستانتسياسىنداعى ەنەرگەتيكالىق بلوگتاردىڭ ءماجبۇرلى توقتاۋىنا بايلانىستى ءوندىرىس قۋاتتىلىعى قازىرگى تاڭدا 245 م ۆ ت- قا دەيىن ازايدى.

ايماق باسشىلىعى مەملەكەتتىك ورگاندار جانە كوممۋنالدىق قىزمەت وكىلدەرىمەن بىرگە جەدەل شتاب قۇردى.

ءمالىم ەتىلگەندەي، ءوڭىر ەلدى مەكەندەرىن ەنەرگيامەن بىركەلكى قامتاماسىز ەتۋ ءۇشىن كەزەڭ-كەزەڭىمەن ۋاقىتشا اجىراتۋ ءادىسى ەنگىزىلەتىن بولادى. تۇتىنۋشىلار ءۇشىن ەلەكتر قۋاتى 3 تەن 5 ساعاتقا دەيىن وشىرىلەدى، ۋاقىتى الدىن الا حابارلانىپ وتىرادى.

«ماڭعىستاۋ وڭىرلىك ەلەكتر جەلىسى كومپانياسى» ا ق باسقارما ءتوراعاسى قاسىمحان سىزدىقوۆتىڭ سوزىنشە، ەڭ ءبىرىنشى كەزەكتە الەۋمەتتىك وبەكتىلەردى ەلەكتر ەنەرگياسىمەن قامتاماسىز ەتۋگە ءمان بەرىلمەك. ۇلكەن شەكتەۋلەر ءىرى كاسىپورىندار ءۇشىن بولادى.

وبلىس باسشىلىعىنىڭ توراعالىعىمەن قۇرىلعان جەدەل شتابقا ۋاكىلەتتى مەملەكەتتىك ورگاندار مەن كوممۋنالدىق قىزمەت وكىلدەرى كىردى. ولار ەلەكتر ەنەرگياسىن ءوشىرۋ ءبىرىنشى كەزەكتە ونەركاسىپتىك وبەكتىلەرگە اسەر ەتەتىنى تۋرالى شەشىم قابىلدادى. بۇل شەشىم تۇرمىستىق ەنەرگيا تۇتىنۋشىلارىنا ىڭعايسىزدىق تۋدىرماۋ ءۇشىن قابىلدانىپ وتىر. كەيبىر كەن ورىندارى گەنەراتورلارمەن جابدىقتالعان، ال باسقا نىسانداردا جاعداي قيىنىراق. سونىمەن قاتار اۋرۋحانالار، بالاباقشالار سياقتى الەۋمەتتىك نىساندار ەلەكتر قۋاتىمەن قامتاماسىز ەتىلەتىن بولادى. ءبىز تۇرعىنداردان ارانداتۋشىلىققا بوي الدىرماۋدى، تەك رەسمي دەرەككوزدەرگە سەنۋدى سۇرايمىز

- دەدى ول.

جەدەل شتاب وتىرىسىندا توتەنشە جاعداي رەجيمىن ەنگىزۋ تۋرالى ماسەلە قارالدى.

ت ج ەنگىزۋ تۋرالى ماسەلە قارالۋدا. ازىرگە بۇل شارا ءتيىستى ناتيجە بەرمەيدى دەپ ەسەپتەيمىز. ويتكەنى تج رەجيمى تەك مەملەكەتتىك ساتىپ الۋعا قاتىستى شەكتەۋلەر ەنگىزۋگە مۇمكىندىك بەرەدى. ورىن العان جاعدايدا ءبىزدى جۇيەلىك وپەراتور - «KEGOC» ا ق قولداپ وتىر، ول بىزگە 80 م ۆ ت- قا دەيىن الۋعا كومەكتەسەدى، - دەپ ءتۇسىندىردى ماڭعىستاۋ وبلىسى اكىمىنىڭ ءبىرىنشى ورىنباسارى جۇماباي قاراعايەۆ.

قازىرگى ۋاقىتتا ەلەكتر ەنەرگياسىن بەرۋدى جەدەل قالپىنا كەلتىرۋ بويىنشا جۇمىستار ءجۇرىپ جاتىر.

«م ا ە ك» تەگى اپات جويىلعانعا دەيىن ءوڭىر تۇرعىندارىن وسى جاعدايعا تۇسىنىستىكپەن قاراۋعا، ەلەكتر ەنەرگياسىن ۇنەمدى تۇتىنۋعا شاقىرامىن. كوممۋنالدىق قىزمەت ماماندارى كۇندىز-ءتۇنى ەنەرگيا بلوكتارىنىڭ جۇمىسىن تەز قالپىنا كەلتىرۋ ءۇشىن جۇمىس اتقارۋدا. بۇگىن ءبىز «كەزەڭ-كەزەڭىمەن» ءوشىرۋدىڭ ەڭ جوعارى جۇكتەمەلەرىن سىناقتان وتكىزىپ جاتىرمىز، ەرتەڭنەن باستاپ تۇرعىندارعا بارىنشا ىڭعايلى بولۋ ءۇشىن، ەلدى مەكەندەردى اجىراتۋ كەستەسىن الدىن الا ۇسىناتىن بولامىز،- دەپ قورىتىندىلادى جۇماباي قاراعايەۆ.