استانا كوشەلەرىمەن «تورعا» قامالعان كەلىندى الىپ ءوتتى

استانا. قازاقپارات - «جاڭا ادامدار» جاستار قوزعالىسى قىلمىستىق كودەكسكە قىز الىپ قاشۋعا قاتىستى بولەك باپ بەكىتىلۋىن قولدايدى. وسى ماقساتتا بەلسەندى جاستار ەلوردادا اكسيا وتكىزدى، دەپ حابارلايدى قازاقپارات.

قازىر قىلمىستىق زاڭنامانى جەتىلدىرۋ ءىسى قاراستىرىلىپ جاتىر. وسىعان سايكەس قىلمىستىق كودەكستىڭ 125-بابىنا جابىرلەنۋشى ءوز ەركىمەن بوساتىلعان جاعدايدا قىلمىستىق جاۋاپكەرشىلىكتەن بوساتۋدى كوزدەيتىن جەكە باپ ەنگىزۋ جانە ەسكەرتۋدى الىپ تاستاۋ قاراستىرىلادى.

«125-1-باپ «نەكە قيۋ ماقساتىندا ادامدى الىپ قاشۋ» ايەلدەرگە قاتىستى زورلىق- زومبىلىق دەڭگەيىن تومەندەتۋگە ءتيىس. «جاڭا ادامدار» قىلمىستىق كودەكسكە مۇنداي تۇزەتۋلەردى تەزىرەك قابىلداۋعا شاقىرادى. ايەلدەر مەن ولاردىڭ قوعامداعى ءرولى تۋرالى ەسكىرگەن يدەيالاردى قامتيتىن قىز الىپ قاشۋ ماسەلەسىنە نازار اۋدارۋ قاجەت. وسى «تۇرمىستىق» زورلىق- زومبىلىقتىڭ قۇربانى بولعان قىزدار سۇمدىقپەن كۇرەسۋدىڭ سوڭعى جولى رەتىندە سۋيتسيدتى تاڭداعان جاعدايلار بار.

تۇزەتۋلەردى قابىلداۋ مەرزىمىن كەشىكتىرۋگە بولمايدى. بۇل باستاماعا نازار اۋدارۋ ءۇشىن «جاڭا ادامدار» بەلسەندىسى، عازيزا ۇلىقمانوۆا قالىڭدىق كويلەگىن كيىپ، توي ۇلگىسىندە بەزەندىرىلگەن تورمەن استانانى ارالاپ شىقتى. «الىپ قاشۋ» تورى مينيسترلىكتەر ءۇيىنىڭ الدىنا توقتاپ، قوزعالىس بەلسەندىسى دەپۋتاتتارعا تۇزەتۋلەردىڭ ەنگىزىلۋىن تالاپ ەتكەن پلاكاتتارمەن ۇندەۋ تاستادى»، - دەلىنگەن حابارلامادا.

«قىز الىپ قاشۋ، كۇشتەپ كۇيەۋگە بەرۋ - ءداستۇر ەمەس، قىلمىس. ۇرلاۋشىلار جاۋاپكەرشىلىكتەن جالتارىپ، لاس جۇمىستارىن اياقتاۋعا بىردە- ءبىر مۇمكىندىگى بولماۋى كەرەك. ءاربىر ادامنىڭ ءومىرى قىمبات جانە ءبىز وسى زۇلىمدىقتى توقتاتۋ ءۇشىن دەرەۋ ارەكەت ەتىلۋىن تالاپ ەتەمىز. ءبىز ايەلدەردى قورلاپ قانا قويماي، كەيدە زورلىق- زومبىلىققا، ءتىپتى ولىمگە اكەلەتىن «ادەت- عۇرىپقا» قارسىمىز»، - دەدى «جاڭا ادامدار» جاستار قوزعالىسىنىڭ بەلسەندىسى عازيزا ۇلىقمانوۆا.

بۇعان دەيىن ەلىمىزدە قىز الىپ قاشۋ ارەكەتىنە جاۋاپكەرشىلىك كۇشەيتىلەتىنىن جازعان ەدىك. قازىر ۋاكىل كەڭسەسى تۇرمىستاعى ءارى وتباسىنداعى زورلىق- زومبىلىق پەن ايەلدەردىڭ قۇقىقتارىن بۇزۋ ماسەلەلەرىنە تالداۋ جۇرگىزىپ جاتىر.